Dy vite luftë Rusi-Ukrainë/ Xhemal Gjunkshi: Lufta e Putinit dhe sistemi i pushtetit të tij autoritar dhe oligark  përbën rrezik dhe kërcënim të rëndë ndaj stabilitetit, vlerave të demokracisë dhe paqes në Europë

 

 

Reagimi i Sekretarit për Sigurinë Kombëtare dhe Koordinimin Euro-Atlantik në PD, Xhemal Gjunkshi

 

Dy vite luftë Rusi – Ukrainë

 

Lufta Rusi – Ukrainë hyri në vitin e saj të tretë këtë të shtunë, duke shënuar një tjetër moment historik të zymtë në një konflikt që OKB-ja ka paralajmëruar se do të këtë një ndikim “që do të ndihet ndër breza”.

 

Dy vite pas fillimit të sulmeve të agresionit rus, jo vetëm rajoni por i gjithë komuniteti ndërkombëtar ndodhet  nën rrezikun potencial të kërcënimit të regjimit të Putinit. Sulmi ndaj Ukrainës është i padrejtë, antiligjor dhe kundër çdo konvente apo norme ndërkombëtare për mbrojtjen e kufijve, të drejtat e njeriut  dhe paprekshmërinë e territorit.

 

Në dy vjet me mijëra civilë të pafajshëm janë vrarë dhe zhdukur dhe 10 milionë janë detyruar të largohen nga shtëpitë e tyre, kriza më e madhe e refugjatëve që nga Lufta e Dytë Botërore. Të gjithë kudo mbartin plagët e luftës.

 

Lufta e Putinit dhe sistemi i pushtetit të tij autoritar dhe oligark  përbën rrezik dhe kërcënim të rëndë ndaj stabilitetit, vlerave të demokracisë dhe paqes në Europë e më gjerë dhe rendit të lirë dhe të hapur ndërkombëtar nga i cili ne varemi. Është e domosdoshme që ne të mbrojmë rregullat bazë që kanë mbështetur paqen, sigurinë dhe prosperitetin që nga fundi i Luftës së Dytë Botërore, duke përfshirë sovranitetin, integritetin territorial dhe të drejtën e shteteve për të zgjedhur të ardhmen e tyre dhe përmbysja e regjimit të Putinit mbetet prioritet i gjeopolitikës botërore.

 

Rezistenca dhe forca e popullit dhe shtetit të Ukrainës përbën një  model të jashtëzakonshëm të heroizmit dhe vetëmohimit për demokracitë të zhvilluara apo në zhvillim dhe që janë në unitet për mbrojtjen e këtij vendi, sepse historia e Ukrainës është histori mbijetese me guxim dhe heroizëm. Vetë Aleanca më e madhe e lirisë NATO, Europa, SHBA-ja dhe shumë shtete i gjenden pranë Ukrainës prej dy vitesh, si aleatë.

 

Shqipëria do të vijojë të mbështesë Ukrainën për mbrojtjen e integritetit territorial, rindërtimit dhe kthimit të jetës në stabilitet derisa të marrë fund agresioni që Evropa nuk e ka parë e as imagjinuar dot që prej Luftës së Dytë Botërore.