FJALA E KRYETARIT TË PD, SALI BERISHA NË SAMITIN E IDU-së NË BRUKSEL
EKSTRAKT
Në fjalimin e tij në samitin e IDU-së në Bruksel, Kryetari i Partisë Demokratike, Prof. Dr. Sali Berisha e cilësoi procesin zgjedhor të 11 majit 2025 në Shqipëri si një farsë të parashikuar dhe të realizuar në kushte të një klime terrori politik të paparë më parë. Berisha theksoi se këto zgjedhje ishin të manipuluara dhe të kontrolluara nga një regjim që e ka kthyer Shqipërinë në një narkoshtet, duke akuzuar kryeministrin për shkelje flagrante të standardeve demokratike dhe të drejtave të njeriut.
Lideri Opozitar, Sali Berisha tha se, për të siguruar një mandat të katërt, Kryeministri ka përdorur metoda të dhunshme dhe të papranueshme për të përmbushur objektivat e tij elektorale. Sipas Berishës, shumë figura kryesore të opozitës janë arrestuar ose janë nën ndjekje penale. Ky kontroll i fuqishëm mbi opozitën, shtoi Berisha, është një pasqyrë e përpjekjeve të regjimit për të eliminuar çdo mundësi për një zgjedhje të lirë dhe të ndershme.
Në vijim të fjalës së tij në samitin e IDU-së në Bruksel, Kryetari I PD, Sali Berisha theksoi se Shqipëria, si narkoshtet, është shndërruar në një vegël për organizatat kriminale, të cilat janë përdorur gjerësisht për të siguruar vota për kryeministrin. Berisha foli edhe për një individ në zyrën e kryeministrit që koordinon aktivitetet e këtyre organizatave kriminale brenda dhe jashtë vendit, ku akuzoi se ata kishin për detyrë të sillnin 28 deputetë të mbështetur nga pagesat dhe presionet e organizatave kriminale. Sipas Berishës, shumë nga kandidatët më të votuar ishin individë të lidhur me këto grupe të krimit të organizuar.
Kryetari i PD, Sali Berisha gjithashtu akuzoi përdorimin e administratës shtetërore si një mjet për realizimin e qëllimeve elektorale të kryeministrit. Berisha foli mbi shpërndarjen e dhuratave financiare, si 100 euro për pensionistët, dhe shpalljen e një amnistie për gjobat e pa paguara, si mënyra për të sigurua mbështetje popullore në prag të zgjedhjeve. Berisha po ashtu denoncoi përdorimin e burimeve shtetërore për të financuar aktivitete elektorale, duke përfshirë financimin e organizatës private për eventin e Giro d’Italia, që u mbajt në ditën e zgjedhjeve, vetëm për qëllime propagandistike.
Një tjetër aspekt që Berisha theksoi ishte censura e mediave dhe kontrolli i informacionit, duke përmendur ndërhyrjen në mediat kombëtare dhe bllokimin e TikTok-ut, për të parandaluar kritikat ndaj qeverisë. Ai e konsideroi këtë si një përpjekje të sistematizuar për të kontrolluar informacionin dhe për të kufizuar lirinë e shprehjes.
Në përfundim të fjalimit të tij, kryetari i PD, Sali Berisha kërkoi mbështetje nga IDU, PPE, CDI dhe qeveritë ndërkombëtare për të siguruar që shqiptarët të mund të votojnë në kushte të lira dhe demokratike. Berisha theksoi se solidariteti ndërkombëtar ishte kyç për të mundësuar një ndryshim të vërtetë në Shqipëri dhe për të mbrojtur të drejtat themelore të qytetarëve shqiptarë.
Lideri Opozitar, Sali Berisha paralajmëroi se, nëse nuk ndërhyhet, vendi mund të përballet me një krizë të thellë dhe të vazhdueshme të demokracisë.
FJALA E PLOTË
Faleminderit shumë, z. President.
Dua të informoj Bordin Ekzekutiv të IDU-së se zgjedhjet e 11 majit 2025 në Shqipëri ishin një farsë e qartë, e paralajmëruar, një farsë masive, e parashikuar në rezolutën e IDU-së, në rezolutën e PPE-së, në rezolutat e CDI-së dhe në qëndrime të tjera ndërkombëtare.
Këto zgjedhje u zhvilluan në një klimë terrori politik të paparë më parë, ku Kryeministri, i cili tani udhëheq një narkoshtet, i pari dhe i vetmi narkoshtet në Europë, për të siguruar mandatin e katërt, vuri në burg, në arrest shtëpie apo nën ndjekje penale, tre drejtues të partive kryesore të opozitës, u hoqi mandatet kryetarëve të bashkive dhe burgosi deputetë të opozitës.
Së dyti, si narkoshtet që është, Shqipëria u bë vegël e organizatave kriminale që u përdorën gjerësisht për të siguruar vota për Kryeministrin. Në zyrën e tij ka një person që koordinon aktivitetin e organizatave kriminale shqiptare brenda dhe jashtë vendit. Në këto zgjedhje, këta individë kishin për detyrë të sillnin në Parlament 28 deputetë përmes pagesave dhe terrorit. Në fakt, sot njerëzit më të votuar janë kandidatë anonimë të këtyre bandave dhe organizatave kriminale.
Për të fituar, Kryeministri e ktheu të gjithë administratën dhe shtetin në një makineri të madhe elektorale. U përdorën mjete publike financiare për të blerë vota. Konkretisht, çdo pensionisti iu dhanë 100 euro si “dhuratë” në mes të fushatës zgjedhore, si një dhuratë nga Kryeministri. Por, zonja dhe zotërinj, pensionistët përbëjnë sot 48% të elektoratit në Shqipëri, pasi në 10 vjet janë larguar rreth 600,000 të rinj.
Po ashtu, dy ditë para zgjedhjeve, Kryeministri shpalli një amnisti për të gjitha gjobat dhe interesat 10-vjeçare, me një total mbi 200 milionë euro. Punonjësit e administratës publike u vunë nën presion, u kërkua që secili të siguronte 10 vota nga familja dhe rrethi i tij. Ata u përdorën si patronazhistë në një sistem të vjetër diktatorial stalinist, ku votuesit kontrolloheshin në çdo mënyrë dhe pranë qendrave të votimit u ngritën zyra për të ushtruar presion.
Zgjedhjet, e përsëris, u zhvilluan në një narkoshtet. Gjatë fushatës, Kryeministri dha 138 licenca për mbjelljen e dhjetëra mijëra rrënjëve kanabisi, ku një rrënjë në Shqipëri vlen rreth 1,000 euro, përdori drogën për vota. Po ashtu, masivisht u bënë punësime në administratën qendrore, lokale dhe ndërmarrje publike për qëllime elektorale.
Ai financoi me 7 milionë euro një organizatë private për ngjarjen Giro d’Italia, që u mbajt në ditën e zgjedhjeve dhe ditën para tyre, thjesht si propagandë. Kontroll i plotë u ushtrua mbi të katër mediat kombëtare. Ai bllokoi TikTok-un, u bë personi i tretë pas Habibullah të Kabulit dhe Ajatollahut të Teheranit që e bëri këtë, vetëm që të mos kritikohej.
Jemi mirënjohës që këto veprime janë reflektuar nga vëzhguesit ndërkombëtarë si: OSBE, Parlamenti Europian dhe Këshilli i Europës, të cilët nxorën një raport shumë serioz.
Z. President, zgjedhjet ishin farsë. Nëse nuk u kthejmë të drejtën për të votuar shqiptarëve, vendi po zhduket. Sipas Eurostat, në 10 vitet e fundit, mbi 1,099,000 shqiptarë janë larguar drejt Bashkimit Europian.
Faleminderit edhe një herë për mbështetjen shumë të çmuar që keni treguar. Kërkoj sërish mbështetje nga qeveritë, nga IDU, PPE, CDI dhe qeveritë në pushtet që kombi im të mund të votojë i lirë. Sigurisht, ne do të bëjmë çdo përpjekje, por solidariteti ndërkombëtar është vendimtar për të fituar.
Faleminderit shumë!
