Berisha: Kemi paraqitur amendimin për njohjen e çdo dokumenti biometrik të vendit ku jetojnë emigrantët! PS po minon procesin e votës së diasporës

FJALA E KRYETARIT TË PD, SALI BERISHA NË KONFERENCËN ME GAZETARËT

EKSTRAKT

Kryetari i Partisë Demokratike, Prof. Dr. Sali Berisha gjatë konferencës së mbajtur ditën e sotme me gazetarët kritikoi pengesat ndaj votimit të emigrantëve, duke propozuar njohjen e dokumenteve biometrike të vendeve ku jetojnë për të shmangur përjashtimin e tyre. Berisha akuzoi qeverinë Rama për manipulim dhe frikë nga vota e diasporës, duke bërë thirrje për respektimin e së drejtës kushtetuese të votës për të gjithë shtetasit shqiptarë.

Kryedemokrati, Sali Berisha paralajmëroi protesta të fuqishme dhe mosbindje civile ndërkombëtare nëse qeveria përjashton 1 milion emigrantë nga votimi për shkak të mungesës së dokumenteve shqiptare. Berisha iu drejtua KQZ dhe qeverisë Rama për shkelje kushtetuese dhe diskriminim ndaj diasporës, duke bërë thirrje për respektimin e të drejtës së votës së çdo shqiptari.

Kryetari i PD, Sali Berisha deklaroi se procesi i primareve në PD do të zhvillohet në bazë të statutit, i cili kërkon që kryetarët e degëve të dorëhiqen nëse kandidojnë për deputet. Për drejtuesit politikë të qarqeve do të vendosë Këshilli Kombëtar. Berisha ftoi demokratët të angazhohen për regjistrimin masiv të votuesve nga diaspora dhe siguroi për përfshirjen e tyre në listat e deputetëve, edhe pse aktualisht statuti nuk adreson kuotat për diasporën. Ndryshimet e nevojshme statutore do të shqyrtohen në të ardhmen. Ndërkohë, mosbindja civile dhe protestat brenda dhe jashtë vendit do të vazhdojnë.

Lideri opozitar, Sali Berisha deklaroi se pas mbarimit të mandatit të administratës Biden do të lobojë për heqjen e “non-grata”, duke e quajtur vendimin të korruptuar dhe të motivuar nga lobimet e Edi Ramës dhe George Soros. Ai theksoi se deri tani ka ndjekur vetëm rrugën ligjore dhe do të konsultohet me juristë për hapat e ardhshëm. Lobimi do të mbështetet nga figura konservatore amerikane.

Kryetari i PD, Sali Berisha tha se përjashtimi i 1 milion shqiptarëve nga zgjedhjet për shkak të mundësisë së falsifikimit të dokumenteve biometrike është i pajustifikueshëm. Ai theksoi se verifikimi i dokumenteve është i thjeshtë dhe i mundshëm në vendet përkatëse, ndërsa rastet e falsifikimit janë sporadike dhe të parëndësishme. Sipas tij, është e papranueshme të prioritizohet frika nga abuzimet mbi të drejtën e votës së një mase të madhe qytetarësh.

Kreu i PD, Sali Berisha akuzoi Edi Ramën dhe vëllain e tij, Olsi Ramën, për përdorimin e dyshimtë të një makine, duke kërkuar shpjegime për përdorimin e saj pesë herë. Berisha e lidh këtë çështje me aferën McGonigal dhe përmendi një transferim të dyshimtë prej 225 mijë dollarësh, duke paralajmëruar veprime për zbardhjen e këtyre akuzave.

Kryetari i PD, Sali Berisha komentoi deklaratën e kryeminstrit Ramës për situatën në spitalin Onkologjik, duke e cilësuar atë si një përpjekje për të shpëtuar veten dhe duke e akuzuar për përgjegjësinë kryesore në krimin shtetëror që po ndodh në shëndetësi. Berisha tha se shteti është përgjegjës për mungesën e ilaçeve dhe aparaturave, dhe akuzoi qeverinë për korrupsion dhe dështim në menaxhimin e situatës. Kryedemokrati theksoi se Edi Rama është kryetari i një organizate kriminale lidhur me sterilizimin dhe inceneratorët, duke e akuzuar për përfitime të paligjshme dhe fshehje të korrupsionit në sektorin shëndetësor.

Lideri i PD, Sali Berisha kritikoi deklaratën e Ramës, i cili tha se do të votojnë vetëm ata që kanë dokumente shqiptare. Berisha e quajti të pabesueshme një deklaratë të tillë, duke theksuar se shumica e shqiptarëve në diasporë nuk i kanë dokumentet shqiptare dhe se pasaportat e huaja, si ajo amerikane, gjermane apo franceze, janë më të fuqishme se pasaporta shqiptare. Berisha u shpreh se Rama e ka kuptuar se ka një urrejtje të madhe ndaj tij nga diaspora dhe tani po tenton t’i kufizojë të drejtat e emigrantëve.

FJALA E PLOTË

Para se të filloj, do t’i jap një përgjigje Florianës për një pyetje që më shtroi duke ardhur. Më tha se: më thonë se ke ardhur në këmbë në seli, dhe si nuk i the të të filmonim pak.

Po i them tani se: ecja në këmbë e njeriut që ecën më shumë nuk përbën asnjë lajm, prandaj dhe nuk njoftova.

Unë e kam atë, eci, eci.

Sot jam këtu për një problem themelor të këtij procesi zgjedhor.

Për herë të parë në 34 vite, emigracionit dhe diasporës shqiptare, me ligj dhe vendime të Gjykatës Kushtetuese, iu dha mundësia të votojë, të ushtrojë të drejtën e tij kushtetuese.

Natyrisht ushtrimi i kësaj të drejte nga të gjitha vendet e botës ku ndodhen shqiptarët, nuk mund të ishte një proces i përsosur, por sot në epokën digjitale, ky është një proces plotësisht i mundshëm.

Arritëm të përcaktojmë rregulla të pranueshme nga të dy palët, në mënyrë që të mos kontrollohet procesi nga njëra palë. Procesi i regjistrimit dhe votimit të diasporës.

Në këtë proces, qytetarët tanë jashtë vendit hasin vështirësi reale.

Vështirësi, të cilat diktohen nga kërkesat e vendosura sidomos për adresën, në mënyrë që të mos ketë abuzime.

Vetë procesi i aplikimit kalon në disa etapa.

Ne e vëzhgojmë atë në çdo aspekt.

Tani, meqenëse Edi Rama dështoi të vendosë kontrollin e tij edhe mbi këtë proces online, ai po përdor metoda të tjera absolutisht të dënueshme, antikushtetuese, për ta kontrolluar procesin.

Në funksion të këtij procesi, KQZ ka kërkuar që të lëvizen datat e paraqitjes së partive, koalicioneve, kandidatëve, dhe ne, ndonëse nuk kemi bindje se është një diçka e domosdoshme, por përsëri për t’i dhënë një hapësirë dhe mundësi për qëndrimin më të madh në këtë proces, kemi shprehur gatishmërinë tonë të angazhohemi në ndryshimet ligjore të nevojshme që kërkohen për këtë proces.

KQZ ka propozuar gjithashtu një praktikë që është ndjekur në të gjitha zgjedhjet e tjera, përveçse në Himarë, se e refuzoi se donte ta merrte me çdo kusht me Vangjel Tavon, një tradhtar edhe i shqiptarëve, edhe i grekëve, por edhe besnik i mafies së Edi Ramës.

Pra, KQZ kërkoi të shtyhet afati i dokumenteve shqiptare dhe kjo ka ndodhur edhe në zgjedhjet e tjera. Ky është një akt periodik që del sa herë vijnë zgjedhjet dhe kjo është normale.

Por tani, për arsye të mbrapshta, duke parë urrejtjen që ka shpërthyer ndaj Edi Ramës dhe PS në diasporë, Edi Rama kërkon të dënojë, sipas llogarive tona, të paktën dy të tretat e shqiptarëve që ndodhen jashtë vendit, të cilët janë të sistemuar në këto vende dhe disponojnë dokumentet biometrike të vendeve ku jetojnë.

E vërteta është se dokumentet shqiptare i disponojnë më së shumti ata që nuk janë legalizuar në vendet ku jetojnë dhe për këta ka statistika. Këta janë më pak se një e treta.

Ne kemi përgatitur amendamentin dhe ne kërkojmë me ligj që këtyre t’u njihet çdo dokument biometrik i vendit ku jetojnë. Qoftë letërnjoftim, qoftë pasaportë.

Jashtë kësaj kërkese, ne nuk mund të pranojmë kurrë të përjashtojmë dy të tretat e emigrantëve dhe diasporës tonë nga votimi.

Ne mendojmë se ky është një akt i pashembullt, një diskrimin që nuk ka asnjë lloj baze.

Ka vetëm një kriter themelor që duhet të respektojë çdo qytetar që duhet të ushtrojë të drejtën e votës, shtetësia shqiptare.

Të gjitha të tjerat pastaj, duhet përgjigjur, por nuk duhet të jetë kurrë letërnjoftimi shqiptar, më epror se letërnjoftimi amerikan, kanadez, gjerman, belg, etj.

Pra, duke paraqitur një pretendim të tillë, Edi Rama dëshmon frikën e tmerrshme që ka nga vota e emigracionit dhe diasporës për shkak të alergjisë që kanë shprehur këta qytetarë ndaj narkoregjimit të Edi Ramës.

Pra, ne e bëmë edhe kompromisin, por meqenëse u kërkua dhe në sensin që të bëjmë ndryshime me lëshime reciproke, kjo nuk duhet të jetë fare lëshim se nuk mund të ketë forcë politike që të pranojë të ndëshkojë dy të tretat e shqiptarëve se nuk kanë letërnjoftimet shqiptare apo pasaportat në xhep.

Në këtë kontekst, unë ftoj edhe njëherë, në radhë të parë KQZ që të bëjë demarshet zyrtare dhe të shprehet publikisht sepse zbatimi i vendimit të Gjykatës Kushtetuese është një detyrim madhor kushtetues.

Përndryshe, ne do organizojmë demonstratat më të fuqishme pranë ambasadave të narkoshtetit, por jo vetëm pranë ambasadave.

Pra, do të nisë një lëvizje e re e fuqishme e mosbindjes civile, kjo që është në Shqipëri, do vazhdojë në botë.

Nuk mund të pajtohemi kurrë me një frikë dhe absurditet që tregon regjimi ndaj votës së emigracionit.

Kjo do të thotë të përjashtohesh të paktën 1 milionë shqiptarë nga e drejta e votës.

Sepse është bërë shumë e qartë, Eurostati thotë 1.1 milionë shqiptarë nga viti 2014 deri në vitin 2022. Prej tyre, nja 200 e ca mijë janë të palegalizuar. Të tjerët janë ose bashkim familjar, ose të legalizuar. Pra, dy të tretat ose më shumë janë se duan t’i përjashtojnë në këtë mënyrë.

Unë nuk them se të gjithë këta nuk kanë dokumente, por në tërësi nuk kanë dokumente.

Dhe nga të katër anët e vendit njoftohemi se ne nuk po regjistrohemi dot për shkak të dokumenteve.

Edhe njëherë u bëj thirrje të gjithë emigrantëve dhe diasporës, të përgatiten për protestat më të fuqishme para selive të ambasadave që përfaqësojnë narkoshtetin, i cili kërkon t’i dënojë ata dhe de facto t’ua mohojë të drejtën e votës.

Përbën kjo një shkelje shumë të rëndë, shumë të madhe, përjashtimi i 1 milion shqiptarëve vetëm se nuk kanë dokument shqiptar, është i padëgjuar ndonjëherë.

Faleminderit!

PYETJE-PËRGJIGJE

Elda Menga, TCH: Ju sapo njoftuat protesta në selitë diplomatike nëse kërkesa për të votuar me dokument të huaj biometrike nuk realizohet. A do të ketë veprim konkret në parlament, PD a do kushtëzojë votimin e ndryshimeve në Kodin Zgjedhor me miratimin e dy amendamenteve të saj?

Sali Berisha: Asnjë votim nuk bëhet për këtë çështje në parlament, se ne e nisëm me seriozitetin më të madh këtë, në rast se u mohohet, nëse parlamenti nuk pranon, por sanksionon praktikën e mohimit të 2/3 të shqiptarëve të drejtën për të votuar, as bëhet fjalë që ne nuk pranojmë kurrë këtë. Është jashtë çdo lloj mundësie ta pranojmë këtë.

– A ktheheni ju në një pengesë për lehtësimin e votës së diasporës, për një pjesë tjetër të emigrantëve?

Sali Berisha: Ne po dërgojmë ligjin në parlament, ne kemi dorëzuar ose duhet ta kenë dorëzuar ligjin në parlament, i cili sanksionon njohjen e dokumenteve biometrike të gjithë shqiptarëve që kanë shtetësi shqiptare. Përkundrazi, praktika tjetër është ndëshkuese për shumicën e shqiptarëve. Njëri vëlla që ka një letër njoftim shqiptar voton, vëllai tjetër nuk voton. Një çift burri që nuk e ka  nuk voton, gruaja që e ka ruajtur diku, voton. Kjo është marrëzi, është e turpshme të dëgjohet.

Po a duhet të ketë dokument biometrik, plotësisht dakord. Pa dokument biometrik, ose shqiptar ose të huaja, sepse edhe shqiptarët këtu votojnë me dokument biometrik. Pra janë në kushte të barabarta.

– A rrezikon PD të kthehet në një minues procesi, duke qenë se nëse nuk miratohen ndryshimet në Kodin Elektoral fleta e votimit nuk arrin të prodhohet në kohë për tu dërguar dhe për t’u kthyer në kohë?

Sali Berisha: Minuese e procesit është PS-ja, që i lejon vetes të marrë një vendim të tillë, absurd, përjashtues për 1 milionë shqiptarë. Se këtu bëhet fjalë për 1 mln shqiptarë. Kjo tregon se këta e nisën për tu tallur këtë proces. Çfarë detyrimi kanë ata pasi marrin dokumentet biometrike të vendit ku jetojnë, të mbajnë dokumente shqiptare. Asnjë detyrim nuk kanë ata. Me dokument biometrik kryen çdo lloj veprimi dhe i njihet edhe në Shqipëri, hyn, del. Ky veprim që bën Edi Rama, dëshmon tmerrin e tij nga emigracioni dhe diaspora, kjo është e vërteta. Do të përballet me aktivitet të jashtëzakonshëm, se ne do të mbrojmë të drejtën e qytetarëve. Nuk mund të pajtohemi ne që të përjashtojnë me një të rënë të lapsit 1 mln shqiptarë. Kurrë!

Elda Menga, TCH: Ndërkohë për tu ndalur edhe tek një pjesë tjetër e zgjedhjeve. Ajo e zgjedhjeve të brendshme në PD. Një ditë më parë PD njoftoi se ka hedhur hapat e parë për mbajtjen e procesit të primareve, duke njoftuar edhe kryetarët e degëve që nëse duan të marrin pjesë në primare dhe të futen në garë për deputet, të japin dorëheqje. Një njoftim që nuk është pritur mirë nga deputet i PD, Bujar Leskaj i cili ka vlerësuar kryetarët e degëve dhe sekretarëve si i vetmi institucion që i janë nënshtruar votimit dhe ka sugjeruar që pjesë e primareve të jenë edhe drejtuesit e PD, pra të jenë në listë të hapur. A do e pranojë Sali Berisha një sugjerim të tillë dhe kur do të nisë procesi i primareve?

Sali Berisha: Tani, procesi i primareve është një proces statutor. Qëndrimi i kryetarëve të PD, ose kërkesa për dorëheqjen e kryetarëve të PD është statutore, ka një nen në statutin e PD, i cili thotë; në rast se kryetari i partisë do të kandidojë, ai duhet të japë dorëheqje para se të zhvillohen primaret.

Pse? Sepse ai tjetri që do të kandidojë, ai kërkon garë të barabartë dhe garë të barabartë, unë kryetar dhe tjetri thjeshtë nuk ka. Ndaj dhe kjo është një normë statutore. A do hynë në garë drejtuesit e PD, gara është e hapur për të gjithë.

– Po drejtuesit politikë të qarqeve?

Sali Berisha: Drejtuesit politikë të qarqeve do të vendosë Këshilli Kombëtar. Por lista e mbyllur do të përcaktohet nga gara, nga primaret dhe rezultati në primare.

Por meqë jam këtu tani, unë ftoj të gjithë demokratet, demokratët dhe të gjithë ata që duan të marrin pejsë në garën e primareve. Të fillojnë që sot garën për votën e diasporës. Dmth, të fillojnë që sot regjistrimin e numrit më të madh të mundshëm të qytetarëve me të drejtë vote në emigracion dhe diasporë. Do të jetë dhe ky një kontribut i tyre i madh dhe që padiskutim do të marrë vlerësimin e duhur.

Ermal Rizaj, Syri Tv: Z. Berisha, kur thoni do të jetë kontribut, do të jetë kriter apo kontribut, sepse ka një diferencë. Keni vendosur ju një kuotë të caktuar, që kushdo që të marrë pjesë në primare të arrijë një numër të caktuar të regjistrimit të shqiptarëve që jetojnë jashtë vendit?

Sali Berisha: Statuti nuk e ka një kërkesë të tillë. Sepse votimi i diasporës doli pas statutit, por në mënyrë absolute do të vlerësohet.

– Ju deklaruat se do të ketë protesta në selitë diplomatike jashtë vendit. Kjo do të thotë se do të zhvillohen protesta vetëm në këto ambasada jashtë vendit, apo do të ecet paralelisht edhe në parlamentin shqiptar.

Sali Berisha: Mosbindja civile vazhdon këtu, nuk e citova se ajo është në rend dite, nuk është hequr nga rendi i ditës. Ky është një motiv më shumë.

– Edhe diçka përsa i takon votës së diasporës. Do të ketë ndonjë ndryshim statutor apo do të bëjë diçka PD për të vendosur një kuotë të atyre deputetëve që do të jenë në parlament nga Diaspora, duke parë se për të herë do të votojnë edhe shqiptarët që janë jashtë vendit. Do të ketë një kuotë të caktuar nga PD, që do të vijnë nga diaspora?

Sali Berisha: Do të ketë përfshirje nga diaspora, por statuti është mungestarë në këtë drejtim se statuti është miratuar para se të zbatohet kjo praktikë. Sigurisht, statuti në rastin e ardhshëm do të pësojë ndryshimet e duhura edhe për këtë problem. Sikundër, statuti do të japë përgjigje edhe për kuotimin e votave të diasporës për deputetët. Pra, ka një seri problemesh për t’u përgjigjur statuti i partisë për këtë formë votimi. Tani për tani, ajo që mund të them është se, diaspora do të përfshihet.

Enkel Xhangolli, KlanNews: Për ta vijuar pak këtë pjesën e primareve, një nga kriteret që përcakton statuti për personat që do të marrin pjesë në primare është që të ketë dhënë kontribut të vazhdueshëm për PD, por gjithashtu të ketë pasur dhe jetë aktive, publike sigurisht, duke mbrojtur interesat e PD. A janë këto pika të cilat mund të bllokojnë që në listat e PD, të futen dhe individë që mund të vijnë nga jashtë rradhëve të PD, nga fusha të ndryshme, shoqëri civile, pedagogë, apo dhe gazetarë që të jenë pjesë e kësaj liste? A i monopolizon kjo emrat e kandidatëve, pra që të vijnë vetëm nga radhët e PD, dhe jo nga fusha të ndryshme?

Sali Berisha: E drejtë ajo që thoni ju. Nuk ka diskutim që i favorizon anëtarët e PD, por absolutisht është hapur dhe për jo anëtarë të PD, mbështetës dhe simpatizantë të saj. Nuk ka dyshim.

Anesti Bajramemaj, A2CNN: Pak ditë më parë Xhon Bolton, ish-këshillar për Sigurinë i Donald Trump në presidencën e tij të parë, ka dhënë një intervistë në A2CNN, ku ka deklaruar se, heqja e non gratës është e mundur. Ju vet, a besoni se administrata Donald Trump, do të heqë non gratën tuaj, dhe a keni në plan për të nisur një lobim, pasi tashmë e gjithë administrata është në mbikqyrjen e Trump?

Sali Berisha: E kam theksuar dhe e theksoj, për sa kohë që ishte në pushtet administrata Biden, unë vendosa të mos loboj asnjë moment.

Pse? Sepse zgjodha gjykatën dhe hodha në gjyq Sekretarin e Shtetit.

Me keqardhje të madhe e kam ndërmarrë këtë veprim, por me bindje të plotë se ishte veprimi më i drejtë që mund të ndërmerrja.

Kështu, nga data 19 maj 2021 deri me datën 20 janar 2025, unë nuk kam bërë asnjë lobim, zero lobim. Kam ndjekur procesin gjyqësor.

Natyrisht me rikthimin e presidentit Donald Trump në Shtëpinë e Bardhë dhe ndryshimin e Sekretarit të Shtetit, unë pa diskutim që do bëj përpjekjet e mia pranë kësaj administrate për anulimin e një vendimi korruptiv fund e krye, të bazuar në lobimin korruptiv të Edi Ramës dhe Xhorxh Sorosit, me qëllimin e vetëm likuidimin e opozitës së vërtetë opozitare në Shqipëri dhe dorëzimin e të gjitha pushteteve Edi Ramës.

Kjo është evidente dhe e sanksionuar në një seri dokumentesh.

Është evidente angazhimi i armikut të egër të demokracisë shqiptare, Xhorxh Soros dhe Aleksis respektivisht, në këto procese.

Dhe është i faktuar angazhimi i të korruptuarit McGonigal, një, unë e them tradhtar i interesave të kombit të vet, pasi siç thotë gjykatësja amerikane, i ngarkuar për të mbrojtur qytetarët amerikanë nga korrupsioni, u bë vetë përfitues i korrupsionit të Edi Ramës.

Pra, pa dyshim që unë do të ndërmarr hapat, por para se t’i ndërmarr këto hapa, do këshillohem kryesisht me juristë se çfarë rruge më sugjerojnë ata për të ndjekur.

Tani nuk kam asnjë lloj problemi, e kam përshëndetur me shumë kënaqësi vendimet e marra nga presidenti Donald Trump për të mos lejuar përdorimin e parave të taksapaguesve amerikanë kundër opozitave konservatore në botë.

Vendimin e tij, ose direktivën e tij kundër drejtësisë së korruptuar politike, të krijuar në SHBA dhe jo vetëm në SHBA, por edhe në vende aleate, dhe siç e patë ju, largimin e një numri të madh, ndër të cilët më duhet të them edhe elementë të korruptuar në Shqipëri, nga administrata e Departamentit të Shtetit dhe të vendeve tjera.

Pra, ka zhvillime jashtëzakonisht pozitive.

– Po thoni që, nuk keni marr anjë hap lobim gjatë administratës së Biden, por emri juaj rezulton vitin e shkuar se keni kontraktuar një kompani lobimi, në ëeb-in zyrtat të lobimeve në amerikë, por nuk keni shpenzuar ende asnjë para. A kanë qenë hapat e parë?

Sali Berisha: Jo, është ndryshe ajo. Ai është një mik i vjetër. Është një ish-këshilltar i Reganit, është një nga eksponentët ligjorë më të njohur të Partisë Republikane, ka qenë këshilltar elektoral me të gjithë presidentët, gjer tek MekKain, ku tek MekKain ka pasur pozicion më kryesor.

Dhe, ai absolutisht me iniciativë të tij, nuk ka paraqitur asnjë kërkesë në asnjë institucion për heqjen e dizenjimit tij, por ka deklaruar se duke u gjetur përpara kësaj padrejtësie të turpshme që është bërë, unë vendosa të përpiqem që Kongresi amerikan të ndërmarrë një hetim për këtë vendim absurd. Dhe kjo përpjekje është pro-bono, pra është pa lekë.

Pra, nuk ka asnjë kontratë me Sali Berishën ai, ai e ka ndërmarrë vetë. Është një njeri shumë i njohur dhe i respektuar në qarqet konservatore amerikane.

Dhe për këtë i jam shumë mirënjohës.

Mariglen Kume, MCN: Pyetja lidhet me çështjen e diasporës, votimet, për kartat biometrike të cilat nuk janë të shtetit shqiptar. Sistemi PER që ka KQZ sot është i lidhur edhe me Identitek, që në momentin kur qytetari bën foton, merr konfirmim nga Identitek, që ka pasaportën dhe kartën e identitetit shqiptare për qytetarin në fjalë. Me kë do lidhet sistemi PER, dhe a është e mundur teknikisht që kjo të bëhet me institucione homologe, siç është Identitek me vendet përkatëse të shteteve të huaja? A është ky një propozim gati i pamundur?

Sali Berisha: Absolutisht është 100 përqind i mundshëm.

Mjafton të marrësh kopjen e dokumentit biometrik dhe pa asnjë diskutim mund të bëhet një check-up në secilin vend ku është lëshuar pa asnjë vështirësi.

Kështu që nuk është këtu çështja.

Domethënë 1 milion shqiptarë lihen jashtë zgjedhjeve sepse karta e tyre e identitetit mund të jetë e falsifikuar.

Duhet të jesh i degraduar në shkallën e katërt nga ana psikike që të marrësh vendime mbi një dyshim të tillë.

Mund të ketë, por ato janë një rast sporadik shumë i parëndësishëm.

Nuk them që nuk ka, por nuk mund të prishë ajo 1 milion. Ti sheh kujt i jep përparësi, i jep votimit të 1 milion, apo spekulimit të një grushti që bëjnë një gjë të tillë.

Isa Myzyraj, OraNews: Z.Berisha, përpara disa javësh deklaruat se në Prokurinë e posaçme ka arritur një letër nga Zaho Koka. Prokuroria e posaçme dhe drejtuesi i saj, Altin Dumani ka pyetur drejtuesen e BKH, Aida Hajnaj mbi ekzistencën ose jo të kësaj letre, dhe znj. Hajnaj ka deklaruar për z.Dumani se, nga verifikimet e kryera rezulton se në BKH nuk ka asnjë letër nga shtetasi, Zaho Koka. Si qendron e vërteta dhe keni kontaktuar me burimin tuaj digjital gjatë kësaj kohe, dhe a ju ka paraqitur ndonjë provë për ekzistencën e këtij dokumenti?

Sali Berisha: Qytetari digjital, i cili ka dhënë hollësira mbi letrën, do të më kthejë përgjigje për pyetjen që shtruat.

Por një gjë, asgjë nuk e shpëton dot Olsi Ramën.

Dhe më të parët që duhet ta mbroni këtë tezë, jeni ju këtu, pasi ju e keni dëgjuar atë, me zë dhe figurë, të deklarojë se atë makinë e kam përdorur vetëm një herë, që kam shkruar në Selanik.

Kurse unë u kam dorëzuar dokumente autentike, zyrtare, origjinale që faktojnë se ai ka përdorur makinën 5 herë.

Atëherë, unë i shtroj pyetjen Edi Ramës, çfarë të shtyn ty që të bëhesh dorëzanë për vëllain tënd, Olsi Rama, përveç bashkëpunimit që mund të kenë pasur.

Sepse në qoftë se ky deklaron se atë makinë e kam përdorur vetëm njëherë aksidentalisht, njeriu mund të thotë se kushedi si i ka ardhur puna dhe e ka përdorur, po të kalojë miu nën mustaqe 5 herë, atëherë miun e ke në xhep ti.

Ndaj dhe askujt nuk mund t’ia shesë Edi Rama këto.

Edi Rama të mos përdorë mercenarë si zëdhënës, por të dalë vetë t’u thotë shqiptarëve se çfarë ka dashur vëllai i tij 5 herë me makinën që udhëtonte kryesisht Gentian Gjonaj dhe Genti Xhixha.

Apo do të thotë se këto nuk i pranoj se janë sekret?

Po ku ka sekret për Sali Berishën?

Ai të mbulojë krimet duke i cilësuar sekret, asnjë njeri në Shqipëri nuk do e bëjë atë.

Unë kam një lehtësi në ëktë mes, se në qoftë se shkoni ju në janar të vitit 2015, në statusin e dytë ose të tretë, unë kam nxjerrë emrin e Olsi Ramës.

Dhe në mënyrë absolute nuk e kam bërë me asnjë tendencë, e kam bërë siç më kanë ardhë informacionet.

Ka qenë Olsi Rama, kanë qenë Dabullët. Që të gjithë janë të lirë të Xibrakës. Përveç Ermal Hoxhës ka qenë edhe Kolaneci i Hoxhës.

Ata kanë jetuar në hotelin e Makbule Çeços. Kanë qenë dy djemtë e Arta Dadës. Ajo ishte fabrika e partisë.

Po nuk reagoi Edi Rama në atë kohë?

Edi Rama t’i kërkojë me shkrim, meqenëse do të pastrohet, t’i kërkojë prokurorisë së Hanoverit t’i japë certifikatë me shkrim, t’i kërkojë DEA-s në Athinë.

Po jo Alfred Shehut, një gënjeshtari publik, Alfred Grecës, se ai është vëllai siamez i Mehmet Grecës.

5 udhëtimet e tij dhe deklarata e tij, betimi i tij se ka udhëtuar vetëm 1 herë, ato marrin rrrugë në të gjithë botën.

Ai ka problemin e tmerrshëm përpara, ka McGonigalin. Ai çdo natë sheh në ëndërr McGonigalin. Po, ua them unë ju. Dhe ne do ndërmarrim veprime.

Ku i mori ky 225 mijë dollarë që ia dha McGonigalit. Nga i gjeti? Me thes i ka çuar. Si i çoi? Se ato janë numëruar në garazh. Ajo është një aferë kriminale ndër më të mëdhatë që mund të ekzistojë, e nivelit më të lartë. E nivelit kryeministër.

Nuk e shpëton më Ulusiu atë. Ulusiu është një hall të madh për veten. Nuk shpëton dot veten se regjistrimet për të janë fatale për Ulusiun.

Osman Stafa, News 24: Ditën e sotme, kryeministri Edi Rama ka folur për Onkologjikun, duke deklaruar se: një grup kriminelësh në Onkologjik shkaktuan një situatë dramatike. Si e komentoni ju këtë deklaratë të kryeministrit, teksa bën me faj mjekët e atij spitali, kur përgjegjës për sigurimin e medikamenteve e kimio është shteti shqiptar dhe Ministria e Shëndetësisë. Kur përgjegjsi për sigurimin e një Petscani, që qeveria jonë nuk e ka, është qeveria shqiptare, ku përgjegjës për mungesën e akserlatorëve linearë që bëjnë të mundur rrezet është shteti shqiptar, ku për mungesën e poltroneve në onkologjik janë vetëm 19, kur ditorë janë 80 pacientë, është shteti shqiptar. Si e komentoni këtë deklaratë të tij?

Sali Berisha: Deklarata e tij është deklarata e Pilatit që do të lajë duart, pasi ka kryer krimin. Dhe unë jam absolutisht 100% dakord me ty, që krimi në onkologjik është krim shtetëror kundër njerëzimit. Ato janë vrasje shtetërore të qëllimshme. Nëse ti le të sëmurë të tillë pa mjekim, ti i dorëzon ata përfundimisht për të pashpresë. Sigurimi i ilaçeve, i aparaturave, mjeteve, është detyrim ligjor i drejtorisë së spitalit, Ministrisë së Shëndëtësi dhe kryeministrisë, detyrim i tyre, dhe janë ata përgjegjësit numër 1. Ajo drejtoresha që thotë ai, është kjo korba e korrupsionit. Drejtoreshë e spitalit numër 1, ka qenë Ogerta. Ministre e tij ka qenë Beqaj i Ramës dhe Ogerta dhe gjendja në spital, është krijuar totalisht nga korrupsioni i tyre.

Çfarë ka ndodhur? Këta kanë përzënë kompanitë e mëdha, të cilat me zemërgjerësi bënin çmime të favorshme, pavarësisht e bliheshin sasi të pakta nga Shqipëria dhe kjo ishte një gjë shumë e mirë. Këta i përzunë kompanitë dhe natyrisht pastaj çmimet shkuan aty ku janë. Ato janë të kushtueshme, shumë të kushtueshme. Disa prej tyre janë shumë të kushtueshme, por ti nuk mund ti lesh kurrë njerëzit pa mjekim. Ata janë gjetur që kanë porositur dy herë, lekët i kanë dhënë, i kanë ndarë njëri me tjetrin, dhe nuk ka ardhur asnjë flakon, asnjë ampulë me ilaçe. Aty nuk mund të lajë duart ai si Pilati se është vetë i implikuar. Siç është vetë i implikuar në sterilizimin. U them shqiptarëve që nëqoftëse ajo u shpall organizatë kriminale nga gjykatësit, kryetar i asaj organizate është vetëm një, është Edi Rama. Dhe mos harroni se ky njeri, dilte me një  gërshërë të thyer dhe me një pincë me një krah dhe thoshte, ja me çfarë operohej para se të bëhej koncesioni i sterilizimit. Një njeri i papërmbajtur në vjedhje, sepse ato nuk operoheshin asnjëra e as tjetra.  Doli sepse i ndaheshin miliona, milion dhe u rrit çmimi 83 herë. Mbetën çdo vit mbi 1 mijë dhe ndaj thotë Beqaj, mos e përlyeni partinë e krimit. Dmth i thotë Edi Ramës, këto e kanë për ty, në fakt kreu i vërtetë i organizatës kriminale të sterizilimit, kreu i vërtetë i organizatës kriminale të inceneratorëve është Edi Rama. Dhe në mënyrë absolute nuk mund të shpëtojë. A kanë mjekët përgjegjësi? Të plotë. Që në momentin kur mjekët bëhen në një farë mënyre, pajtohen të themi me një situatë të tillë, të tmerrshme, të papranueshme dhe fillojnë të justifikojnë ata shndërrohen në mafioze të rrezikshëm. Ka patur kolegë të tyre që kanë ikur për të thënë të vërtetën. Pse e them këtë? Sepse ty i nxjerrin përfitimet padiskutim. Të vijë mjeku e ti fshehë ato, po ato gra që nuk morën 3 vite brankiterapinë për shkak të aparateve që nuk funksionin. Afera është krimi më i shëmtuar, që mund të ketë ndodhur ndonjëherë dhe përgjegjës numër 1 është Edi Rama, Ilir Beqaj dhe korba e korrupsionit që i ka ndarë paret me Ramën dhe ka imunitet të plotë.

Anesti Bajramemaj, A2 CNN: Një pyetje sa i takon çështjes së parë për votën e disaporës. Ju vendosët kusht votimin e amendamentit tuaj për zgjatjen e afateve të dokumenteve të identifikimit për të gjithë shtetasit, por edhe njohjen e dokumenteve biometrike të atyre që nuk kanë dokumentet shqiptare. Pse nuk e keni vendosur këtë kusht në momentin kur PD dhe PS me ndërmjetësimin e KQZ po negocionin një draft të përbashkët për zgjatjen e afateve. Pse nuk u vendos në atë kohë kushti për të patur një draft të përbashkët, por vendoset tashmë dhe mund të themi që mund të jetë dhe një bllokim i votës së diasporës?

Sali Berisha: E drejtë pyetja, por nuk mund të imagjinohej, të them të vërtetën, që dikush do mund të guxonte të thoshte që do votojnë vetëm ata që kanë dokumente shqiptare, se ata shumica dërrmuese nuk i kanë.

Pasi merr pasaportën amerikane, gjermane apo franceze, ajo është pasaportë më e fuqishme shumë se e jotja. Çfarë të duhet ajo. Mund ta kesh, por nuk është kusht.

Çfarë të duhet ajo.

Thjesht ka qenë kjo.

Nuk mund të shkonte mendja se ky mund të ngrihet kundër saj.

Por tani e ka kuptuar që ka një urrejtje të madhe në diasporë dhe emigracion dhe do me çdo kusht t’i kufizojë.

Faleminderit!

Ndiq intervistat e fundit
Artikuj të ndërlidhur
Ndiqeni Partinë Demokratike në rrjete sociale