EKSTRAKT
Nënkryetari i Partisë Demokratike, deputeti Oerd Bylykbashi gjatë një konference për mediat mbajtur në selinë e PD, ësjhtë shprehur se në vend është shkatërruar pluralizmi edhe në ekonomik, duke sjellë korrupsion, varfëri dhe klientelizëm.
Fjala e mbajtur në hyrje të konferencës:
Është detyrë e opozitës për ta vënë përpara fakteve këtë qeverisje që shqiptarët të kuptojnë se çfarë kanë kaluar dhe çfarë i pret në vitin 2024.
Viti 2023 ishte një vit, i cili karakterizohej nga mungesa e transparencës, nga mungesa e konkurrencës, nga klientelizmi. Të gjitha këto nga korrupsioni.
Të gjitha këto kanë çuar në një mekanizëm gjigant korruptiv, në të cilin paraja publike po grabitet për interesa private të Edi Ramës dhe shpurës që e rrethojnë.
Viti 2023 është një vit që ka shpërfaqur plotësisht mekanizmin e centralizimit të pushtetit nga Edi Rama, i cili ka prodhuar të gjitha këto efekte që thashë më përpara.
Kemi ligje nominale, ligje të bëra për individë privatë, është rasti i Portit të Durrësit por dhe të tjera.
Kemi PPP-të, të cilat së bashku si mekanizëm po krijojnë një moment shumë të rrezikshëm për demokracinë në Shqipëri.
Është prishur ndarja mes pushtetit publik dhe interesave private, duke zhbërë mundësinë e kontrollit dhe llogaridhënies.
Dhe të gjitha këto çojnë në korrupsion, në klientelizëm, varfërimin e ekonomisë sepse i hiqet mundësia pluralizmit edhe në ekonomi për të prodhuar të mira për shqiptarët.
Sot do trajtojmë dy çështje në aspektin e infrastrukturës dhe planifikimit urban.
Mariglen Kume, MCNTV: Kryeministri deklaroi pak ditë më parë se do të synojë shumicën aritmetike për reformën zgjedhore. Edhe Basha doli një ditë më pas dhe tha se është prioritet për ne, reforma, madje kemi dërguar edhe një draf propozim për ndryshimet. Ju do të uleni nëse do të ketë mbledhje të reformës zgjedhore, keni gati një draft ndryshime. E bëj pyetjen duke patur parasysh që opozita ka një aksion dhe nuk merr pjesë në komisione për shkak se nuk miratohen komisionet hetimore.
Oerd Bylykbashi: Asgjë nuk ka ndryshuar nga ajo me të cilën u mbyll sesioni i shkuar parlamentar. Kemi kërkuar dy çështje në parlament. Hetimin e aferave korruptive, pra kjo që paraqitëm sot, një pjesë e komisioneve janë për këtë çështje.
Dhe në fusha të tjera ka komisione të tjera. Kërkojmë të hetojmë se si shpërdorohen paratë publikut nga Edi Rama dhe ministrat e tij. T’i vëmë ata përpara përgjegjësi dhe mundësisht më pas të vendosim barrierat ligjore që pengojnë abuzimin.
Çfarë ndodhi? Më keq akoma se kur filloi aksioni i grupit parlamentar të PD. U miratua në fund një ligj që praktikisht vdes komisionet hetimore.
Ligji që kemi ne sot, është ligj jo i mirë, por tashmë në 20 vite, nga viti 2002, të gjithë jemi mësuar të funksionojmë mbi atë bazë ligjore.
Ajo që miratoi qeveria Rama, parlamenti është vetëm një divizion i qeverisë, miratoi një ligj që është shumëfish bllokues i komisioneve. Sepse nuk do që të hetohen këto që kemi denoncuar.
Pra, këto çështje nuk kanë ndryshuar. Arsyet pse ishim ne në atë aksion në parlament, nuk kanë ikur.
Por unë përmenda një gjë tjetër, mekanizmi i centralizimit të pushtetit atij i shkon në funksion të diçkaje tjetër. Shteti përdor të gjitha resurset për të bërë vota për ta kthyer në pushtet. Drejtësia, SPAK dhe prokuroria e zakonshme nuk kanë bërë asgjë.
Raporti i OSBE në rekomandimin e parë për Shqipërinë, nuk thotë bëni reformën zgjedhore, por zbatoni ligjin që keni miratuar. Hetoni dhe vini përpara përgjegjësisë ata që kanë blerë vota, kanë presion me shtetin, kanë abuzuar me burimet shtetërore.
Ajo që Edi Rama deklaroi, e mori përgjigjen menjëherë nga OSBE. OSBE doli me qëndrim ku kërkonte reformë zgjedhore gjithëpërfshirëse, që synon arritjen e objektivave të përbashkët konsensuale, sepse është pikërisht ajo që ka bërë OSBE. E ka ideuar në vitin 2002 dhe e ka mbështetur në 20 vite një reformë zgjedhore bipartizane.
Kërkesa jonë është refuzuar, kërkesa për të pasur bashkëkryesimin, barazinë në përfaqësim dhe veton e ka opozita, PD, pra ne. Çdo patericë e Edi Ramës në këtë proces, vetëm i bën dëm.
Këtu nuk është çështja nëse Basha e ka çuar i pari, më kujton momentet kur vraponte i pari për të çuar një draft, por më pas ishte i pari që prishte komisionin e reformës. Por kjo nuk ka rëndësi.
Ajo që është e rrezikshme dhe që merr përgjigje nga OSBE, ku përfshihet edhe SHBA, edhe BE, edhe Britania, thotë se reforma duhet të jetë gjithëpërfshirëse, konsensuale nëse përkthehet ajo që thonë ata.
Ne jemi të gatshëm për të marrë kontributin e OSBE, që ata janë të gatshëm të na japin. Jo ajo që thotë Rama, kërkojmë arritjen e numrave. Arritjen e numrave e bëri në vitin 2020 me të cilën rrënoi Këshillin Politik. Dhe e ka bërë në gjithë këto vite që nga viti 2013, kur ndryshimet zgjedhore nuk kanë qenë konsensuale, por të njëanshme.
