DEKLARATË PËR MEDIA ANËTARI I KRYESISË NË PD, GRIGELS MUÇOLLARI
Në daljen e fundit në media, ministrja e Mjedisit, zonja Kumbaro, mohoi dhe lau duart nga çdo përgjegjësi që lidhet me anijen e mbetjeve të rrezikshme, një çështje që e ka vënë Shqipërinë në një pozitë të pafavorshme dhe nën dyshimin për shkelje të konventës së Bazelit dhe për lejimin e trafikut ndërkombëtar të lëndëve të rrezikshme.
ministrja Kumbaro tha se gjithë fajin e ka subjekti privat që ajo vetë ka licensuar.
Pra, për mijëra ton mbetje të rrezikshme që inspektorët kanë zbuluar pas skandalit, për vendosjen e këtyre sasive në ambjent të hapur, për cënimin e mjedisit e shëndetit, për trafikun ndërkombëtar pa autorizim, për çdo gjë të dyshimtë në këtë histori, ministrja e Mjedisit, nuk ndjen dhe nuk mban asnjë përgjegjësi.
Ndërkohë që anija me mbetjet e refuzuara nga Tajlanda po rikthehet në Shqipëri, Rrjeti i Bazelit një javë më parë ka dërguar një letër te zonja Kumbaro, ku i kërkon transparencë maksimale në testimin e lëndës, pasi të jetë ankoruar në Durrës.
Rrjeti i Bazelit shpreh hapur mosbesimin që ka te qeveria dhe i druhet aftësisë së tyre për të manipuluar rastin, e për të mos i treguar qytetarëve dhe botës të vërtetën.
Rrjeti i Bazelit ka kërkuar praninë e ekspertëve ndërkombëtarë në procesin e testimit, të shoqërisë civile, të BE dhe të OKB.
Po ashtu, ka kërkuar që të bëhen 3 analiza të pavarura nga njëra tjetra, ku vetëm njërën ta kryejë qeveria.
Pyetjet sot për zonjën Kumbaro janë të thjeshta:
A ka marrë kjo ministri masa për testimin dhe verifikimin e mbetjeve të rrezikshme që po kthehen në Durrës, sipas standardeve ndërkombëtare?
A i është përgjigjur zonja Kumbaro shqetësimit që ka Rrjeti i Bazelit për transparencën?
Por më e rëndësishmja, cili është plani që ka kjo ministri për të sqaruar qytetarët se çfarë ndodh me mbetjet e rrezikshme?
Çfarë ndodh me ato që po kthehehen, dhe mijëra tonë të tjera që kanë zbuluar inspektorët e saj?
Këto janë përgjegjësi që kjo ministri ka para ligjit, publikut dhe qytetarëve?
Dhe nuk mund të kalohen me batuta, si ato të daljes së fundit në publik, që e krahason trafikun ndërkombëtar të mbetjeve të rrezikshme, me dikë që ka marrë patentën po nuk respekton sinjalistikën?
Çështja është serioze dhe shqiptarët meritojnë shpjegime.
