DEKLARATË E KRYETARIT TË PD, SALI BERISHA NË SELI
EKSTRAKT
Kryetari i PD, Sali Berisha ditën e sotme në një deklaratë për media ka denoncuar publikisht ndërhyrjen skandaloze të kryeministrit Rama që po bën në fushatën elektorale të Turqisë.
Lideri i opozitës synoi që nëpërmjet kësaj deklarate t’i përccojë një mesazh komunitetit shqiptar i cili ndodhet në Turqi. Gjatë fjalës së tij, Berisha theksoi se Rama është një armik i vërtetë i votës së lirë, dhe po manipulon duke shkelur në mënyrë flagrante ligjet që qytetarët të votojnë për presidentin aktual të vendit në fjalë.
Kryetari i PD, Sali Berisha tha se Edi Rama nëpërmjet metodave që po varfëron, mashtron, manipulon dhe varfëron shqiptarët, por kërkon t’i shtrijë kufijtë e tij mafioze edhe më gjerë sesa Shqipëria. Berisha iu bëri thirrje qytetarëve me origjinë shqiptare në Turqi që të mos mashtrohen nga Edi Rama, por të votojnë të lirë për dinjitetin dhe të ardhmen e tyre.
FJALA E PLOTË
Mirëdita!
Jam sot këtu për të denoncuar publikisht ndërhyrjen skandaloze të Edi Ramës në fushatën elektorale të vendit mik, Turqisë.
Me një mesazh të gjatë që synon t’i adresohet komunitetit të gjerë shqiptar në Republikën e Turqisë, Edi Rama një armik i vërtetë i votës së lirë në shkelje flagrante të ligjeve të vendit dhe atyre ndërkombëtare, u kërkon shqiptarëve, qytetarëve turk të votojnë më 14 maj për presidentin aktual në largim të Republikës së Turqisë.
Me këtë rast, duke dënuar këtë ndërhyrje të pafalshme, të palejueshme të një njeriu që nuk respekton asnjë ligj, normë kombëtar, ndërkombëtare. I rikujtoj komunitetit shqiptar në Turqi, duke i shprehur atij nderimin tim më të madh, se njeriu që iu bëri thirrje nga Tirana, se për kë duhet se për kë duhet të votojnë, është një armik i vërtetë i lirive të qytetarëve shqiptarë, i votës së tyre, i pasurive të shqiptarëve, i ligjeve të vendit.
Edi Rama, pasi ka përqendruar me metodat më mafioze, të gjitha pushtetet në duart e tij, ndërtoi në Shqipëri narko-shtetin e parë dhe të vetëm në Europë.
Ai dhe administrata e tij, kanë vjedhur dhe përvetësuar nga taksat e qytetarëve shqiptarë jo qindra, por miliarda euro. Kanë vjedhur dhe përvetësuar nga pasuria publike miliarda e miliarda euro.
Me këto mekanizma, me këtë vjedhje më e madhja në pesë shekujt e fundit në Shqipëri, Edi Rama ia doli të vendosë me shpejtësi tiraninë e varfërisë. 10 vite më parë, shqiptarët ishin qytetarët me rrogat më të larta në rajon, përfshi këtu edhe dy vende anëtare të BE, Bullgarinë dhe Rumaninë. Sot, qytetarët shqiptarë kanë rrogat më të ulëta në rajon, 30-40% më të ulëta se vetë Kosova.
Tirania e varfërisë, tjetërsimi i pasurive publike, sundimi i mafies, pasiguria e madhe e qytetarëve ka bërë që shqiptarët, vëllezërit tuaj të gjakut në trojet shqiptare në Shqipëri, të braktisin këtë vend sa asnjë komb tjetër në gjendje lufte apo katastrofash në planetin tonë.
Në 8 vite, u larguan nga Shqipëria 35% e popullatës së vendit, më shumë se u larguan nga Siria në luftë civile apo se ç’po largohen nga Ukraina pas agresionit barbar.
Lidhjet personale të Edi Ramës me presidentin Erdogan nuk janë në përputhje me standardet e lidhjeve tradicionale mes kombeve tona të lira dhe mike. Këto lidhje janë para së gjithash në funksion të pushtetit të njëri-tjetrit.
Sikundër, theksoj për të gjithë ju që ndjeni sadopak krenari me origjinën tuaj shqiptare se neo-otomanizmi është doktrinë vasaliteti, larg së qenit një doktrinë kulturale dhe miqësore mes vendeve.
Për të gjitha këto, ju bëj thirrje të flakni me neveri, me përçmim thirrjen dhe mesazhin e Edi Ramës, e një njeriu që shkel çdo rregull, e një njeriu që nuk ka pikën e moralit t’u drejtohet ju se për kë duhet të votoni.
Në emër të PD dhe opozitës shqiptare, në respekt të plotë të ligjeve, të Shqipërisë dhe Turqisë, thirrja ime për çdo qytetar turk me origjinë shqiptare është të votojë për liritë e tij, të votojë për dinjitetin e tij, të votojë për një Turqi të ëndrrës së tij dhe të mos ndikohet nga asnjë thirrje e një njeriu që ka përqendruar çdo pushtet në duart e tij dhe e përdor atë kundër qytetarëve të vendit të tij për varfërimin dhe dëbimin e tyre nga Shqipëria.
