FJALA E KRYETARIT TË PD, SALI BERISHA NË MBLEDHJEN ME KRYESINË E PD
EKSTRAKT
Gjatë fjalimit të mbajtur në mbledhjen para anëtarëve të kryesisë së PD-së, kryetari i PD, Prof. Dr. Sali Berisha theksoi se dënimi i deputetit Ervin Salianji është një akt hakmarrjeje nga qeveria e kryeministrit Edi Rama dhe rrjete kriminale që ai pretendon se kontrollojnë vendin.
Berisha e përshkroi Salianjin si një deputet guximtar që, në emër të qytetarëve dhe demokratëve, ka denoncuar lidhjet e ministrit të brendshëm Fatmir Xhafaj dhe kryeministrit me krimin e organizuar, duke përmendur vëllain e Xhafajt, Geron Xhafaj, si një trafikant droge të dënuar. Sipas Berishës, ky dënim është një sulm i hapur ndaj opozitës dhe lirisë së qytetarëve shqiptarë.
Sali Berisha përmendi rastin e Durim Bamit, i cili kishte bërë një kallëzim të rremë për një komplot të pretenduar nga Ilir Meta, por nuk u dënua. Në kontrast, Berisha thekson se Ervin Salianji, i cili denoncoi publikisht lidhjet e kryeministrit Rama dhe ministrit Xhafaj me krimin e organizuar, u dënua vetëm sepse është opozitar. Ai e quan këtë akt një luftë të hapur kundër opozitës dhe lirisë së fjalës, duke e krahasuar me praktikat e diktaturave. Berisha e përshkruan dënimin e Salianjit si një formë hakmarrjeje nga kriminelët dhe trafikantët që kanë lidhje me pushtetin, dhe kritikon mungesën e respektit për të drejtat kushtetuese të opozitës.
Në fjalimin e tij, lideri demokrat, Sali Berisha kritikoi ashpër qeverinë e Edi Ramës, duke thënë se Rama synon të fitojë mandatin e katërt duke burgosur liderët dhe deputetët e opozitës. Berisha theksoi se në asnjë vend tjetër në Evropë, madje as në regjime autoritare si Rusia e Putinit apo Bjellorusia e Lukashenkos, nuk ndodhin të tilla përndjekje politike. Berisha përmendi rastet e deputetëve dhe kandidatëve të opozitës që janë burgosur ose ndjekur penalisht, si Ervin Salianji dhe kryetari i zgjedhur i bashkisë së Himarës, duke akuzuar Ramën se po përdor drejtësinë dhe policinë për të dobësuar opozitën dhe për të ruajtur pushtetin e tij. Sipas tij, këto veprime tregojnë një strategji për të shkatërruar demokracinë dhe për të krijuar një opozitë të pavlerë në Shqipëri.
Kryetari i PD, Sali Berisha iu drejtua me tone të ashpra kryeministrit Rama për shtypjen e opozitës dhe përpjekjet e tij për të fituar mandatin e katërt duke burgosur liderët e saj. Ai deklaroi se në një vend ku opozita shtypet dhe përndiqet, nuk ekziston sovraniteti i brendshëm. Berisha përmendi rastet e Ervin Salianjit dhe Gazment Bardhit si shembuj të hakmarrjes personale të Ramës ndaj atyre që denoncojnë krimet dhe aferat e tij. Sipas Berisëhs, arrestimet dhe burgosjet e opozitarëve janë mënyra që Rama përdor për të mbjellë terror dhe për të dobësuar demokracinë.
Berisha tha se, Rama shprehet kundër qeverisë teknike, dhe kjo si një justifikim për humbjen e zgjedhjeve, duke theksuar se qëllimi i vetëm i një qeverie të tillë është sigurimi i zgjedhjeve të lira dhe të ndershme. Sipas Berishës, Rama nuk bën zgjedhje të drejta, por i manipulon ato. Përballë kësaj situate, lideri opozitar u bën thirrje demokratëve të dalin ballë për ballë, të mbrojnë opozitarizmin, Kushtetutën dhe sovranitetin e vendit, duke refuzuar çdo formë të shtypjes apo burgosjes së padrejtë të opozitarëve.
Lideri i PD, Sali Berisha thekson qëndrimin e tij të fortë ndaj qeverisë aktuale, të drejtuar nga Edi Rama. Ai kritikon ashpër qeverinë për shtypjen e opozitës dhe për abuzimin me pushtetin, duke e përshkruar si një regjim që nuk respekton Kushtetutën dhe i trajton institucionet e shtetit si pronë private. Berisha thekson se opozita duhet të përballë këtë situatë me rezistencë të ashpër dhe të pamëshirshme, duke promovuar protestat dhe kundërshtimin publik si mënyrën kryesore për të luftuar regjimin aktual.
Berisha bëri thirrje për një opozitë të guximshme dhe të vendosur, e cila do të mbrojë interesat e qytetarëve, pavarësisht presioneve dhe rreziqeve të mundshme, duke përfshirë burgosjen apo ndjekjen penale. Sipas Berishës, kjo betejë nuk është për individë të veçantë, por për të ruajtur sovranitetin e brendshëm dhe për të garantuar që qeveria të mos abuzojë me pushtetin pa pasur një opozitë të fuqishme përballë.
Ai i ka drejtuar thirrje qytetarëve dhe anëtarëve të PD-së të përqafojnë modelin e rezistencës në rrugë dhe sheshe si një objektiv kryesor për të ndalur abuzimet e qeverisë.
Berisha ka nënvizuar gjatë fjalimit të tij në mbledhjen me kryesinë e PD rëndësinë e veprimit dhe kreativitetit si përgjigje ndaj shtypjes së qeverisë aktuale, duke deklaruar se është koha për përballje të drejtpërdrejtë me regjimin e Edi Ramës.
Berisha thekson se fjalët nuk janë të mjaftueshme në këtë moment kritik dhe se opozita duhet të kalojë në veprime konkrete për t’i bërë ballë regjimit. Ai thotë se në këtë përballje do të triumfojnë guximtarët, duke shtuar se një numër i vogël njerëzish të guximshëm mund të destabilizojë qeverinë. Sipas tij, mijëra demokratë janë të gatshëm për t’u mobilizuar dhe për të ndjekur një udhëheqje të vendosur.
Berisha kritikon gjithashtu paradoksin në politikën shqiptare, ku skandalet dhe aktet antikombëtare duket se rrisin mbështetjen për qeverinë dhe tradhtarët.
Kryetari i PD, Sali Berisha u bëri apel demokratëve dhe drejtuesve të PD për të dalë në shesh dhe për t’u përballur me regjimin e Edi Ramës, të cilin e quan “kryebandit” dhe “kryehajdut”. Berisha kërkon një mobilizim total kundër qeverisë, duke theksuar se opozita nuk duhet të lejojë që të shtypet apo të poshtërohet nga regjimi i Ramës dhe bandat e tij.
Lideri demokrat, Sali Berisha e ka vënë theksin mbi rastin e dënimit të Ervin Salianjit si një simbol të padrejtësisë që po përjeton opozita, duke deklaruar se çdo anëtar i PD-së është në vendin e Salianjit. Sipas Berishës, Salianji u dënua vetëm sepse denoncoi krimet e regjimit dhe trafikimin e drogës nga Geron Xhafa, për të heshtur zërat kritikë ndaj qeverisë.
Megjithatë, Berisha thekson se opozita nuk do të heshtë dhe nuk do të pranojë të shtypet, duke premtuar një “betejë të pandalshme” për të mbrojtur lirinë dhe të drejtat e qytetarëve.
FJALA E PLOTË
Mirëmbrëma dhe përshëndetje zonja, zotërinj anëtarë të kryesisë së PD. Zotërinj drejtues të kësaj mbledhje. Zoti Noka, zoti Bylykbashi, zoti Bardhi, zoti Boçi, zoti Paloka. Ju përshëndes ju të gjithëve. Përshëndes të gjithë anëtarët dhe qytetarët që ndjekin këtë mbledhje të kryesisë së PD, të thirrur me urgjencë pas një ngjarje plotësisht të parashikuar, por të pandodhur që nga vitet më të zeza të diktaturës gjer sot ndonjëherë në Shqipëri. Sot, deputeti Ervin Salianji, me padinë e narkotrafikantit ndërkombëtar, Geron Xhafa prestanome i Fatmir dhe Edi Ramës, u dënua me një vit burg për guximin që ai tregoi, për detyrimin që ai përmbushi ndaj demokratëve, ndaj qytetarëve, ndaj zgjedhësve të tij, duke denoncuar një lidhje të tmerrshme kriminale, e cila kishte pasoja trafiqe të egra, zhdukje personash, vrasje të njërit prej klaneve më të fuqishme, klanit të ministrit të Brendshëm, Fatmir Xhafaj. Me këtë akt, të dashur qytetarë, Edi Rama shpalli luftë të hapur PD-së, shpalli luftë të hapur opozitarëve dhe mbarë qytetarëve. Asnjë njeri i ndershëm nuk mund ta konsiderojë ndryshe dënimin e deputetit Ervin Salianji veçse një ndëshkim, një hakmarrje primitive, e verbër e klaneve më të egra mafioze, të cilat midis një prite diku në errësirë, zgjodhën narkoshtetin për t’i dhënë përgjigjen hakmarrëse që mendonin. Të dashur demokrate e demokratë, sot Geron Xhafa prestanome i Fatmir Xhafës dhe Edi Ramës, arriti të dënojë deputetin guximtar Ervin Salianji. Pse? Sepse ai në ndërgjegjen e tij, në idealet e tij, zgjodhi të jetë përfaqësuesi juaj i vërtetë. Ai zgjodhi midis kokëuljes, midis indiferencës, midis moskokëçarjes, zgjodhi t’i thotë derrit, derr. T’i thotë kriminelit, kriminel. Pavarësisht se ai ishte vëllai i ministrit të brendshëm dhe byrazer i kryeministrit. Pra, ky përfaqësues i juaji zgjodhi më të ndershmen ndaj jush. Zgjodhi më dinjitozen, më të guximshmen. Nuk pranoi t’i arkivojë, por doli në shesh, u tha shqiptarëve se Geron Xhafa drejton trafiqet nga Vlora, ndërkohë që është i dënuar në Itali dhe ka mburojën e vëllait të tij dhe sivëllait Edi Rama. Nuk shpifi, nuk mashtroi. Ai ishte i dënuar, ai vazhdonte drogën. Pra, sot Ervin Salianji është i dënuar se në emër tuaj, se për ju, ai guxoi t’i dalë ballë për ballë kreut të krimit në Shqipëri.
Por, të dashur anëtarë të kryesisë, të dashur demokratë, unë do u sjell një rast tjetër.
Durim Bami, i cili mori përsipër të kallëzoje se Ilir Meta kishte porositur tek ai vrasjen e një eksponenti të lartë politik. Fund e krye mashtrim.
U gjykua për kallëzim të rremë dhe shkoi në shtëpi të vet.
Ervin Salianji bëri denoncimin publik, nuk dërgoi asgjë në prokurori.
Por denoncoi Ramën dhe Xhafën se ishin bërë mburojë e trafikantit kryesor të Vlorës dhe për këtë ai, opozitar, dënohet në një proces që ndoshta edhe në diktaturat më të zeza, më të egra, shumë vështirë të ndodhte.
Por, theksoj një moment këtu, diktatura komuniste kishte ligje që po të sulmoje kryeministrin verbalisht apo ministrin, dënoheshe. Ligjet e vendit nuk kanë një gjë të tillë, por efekti është i njëjtë, edhe më keq se padinë e bën krimineli, e bën trafikanti.
Pra, miqtë e mi, ky është një akt lufte që na shpallet.
Është koha, të nderuar anëtarë të kryesisë, por edhe të gjithë demokratët, të bëjmë një bilanc të shkurtër.
Ne kemi tre vite që bëjmë një përpjekje që vendi të ketë një opozitë të vërtetë.
Ne veprojmë me të gjithë- pavarësisht nga e gjithë dhuna, bëjmë gjithçka që të kemi një opozitë brenda të gjitha rregullave, ligjeve të rendit.
Vendimet tona shumëzohen me zero, pavarësisht se ato në parlament mund të jenë 100 përqind kushtetuese.
Jo vetëm një shpërfillje e plotë e atyre të drejtave kushtetuese që kemi, por Edi Rama, për mandatin e katërt, u rikthye në origjinën e tij plotësisht.
Sot, nuk ka asnjë vend tjetër në Europë, asnjë vend, që tre liderët e opozitës t’i ketë në proces politik.
Nuk ka asnjë vend tjetër në të cilin deputeti i opozitës të dënohet se denoncoi trafikantin e dënuar në Itali dhe që mbrohej nga vëllai i tij në Shqipëri.
Se kandidati që fitoi zgjedhjet në Himarë, dënohet dhe burgoset sepse Edi Rama kërkon me çdo kusht t’i marrë mandatin për pronat e tij.
Pra, unë mendoj dhe besoj se sot për çdo demokrat është e qartë një strategji, e cila synon shndërrimin e një opozite, e opozitës në një opozitë pa vlerë.
Në një opozitë, kundër të cilës qeveria duke shkelmuar Kushtetutë, ligj dhe rregullore, mund të ndërmarrë çdo akt, çdo sulm.
Me gjithë përpjekjet e saj të mëdha për të kontribuar edhe në këto kushte në procesin ose në mbrojtje të demokracisë në Shqipëri.
Por ndaluni pak.
Ju e patë Edi Ramën në zgjedhjet e majit të vitit 2023. Më thoni pak demokratë, cilin mandat nuk rrëmbeu ai, që përcaktoi se duhet ta rrëmbente?
Që të gjitha pa përjashtim, ku ai përqendroi të gjithë egërsinë e narkoshtetit.
Çfarë po ndodh tani?
Tani po vazhdon i njëjti proces. Cilin mandat nuk heq ai?
Cilin lider të opozitës nuk burgos ai për të fituar mandatin e ri?
Është kështu apo jo?
Pra, në qoftë se Edi Rama mandatin e vitit 2021 e fitoi duke shpenzuar shuma kolosale për riparimet për tërmetin, duke përdorur bandat, mandatin e vitit 2023 e fitoi duke ndëshkuar opozitën.
Mandatin e vitit 2025 do ta fitojë duke burgosur opozitën.
A është kjo reale apo jo?
Kur ka ndodhur në Shqipëri ndonjëherë, në cilin vend të Europës ndodh që tre liderët kryesorë të jenë në procese politike?
Në cilin vend në Europë ka ndodhur që t’i rrëmbehet me polici mandati kryetarit fitues të bashkisë?
Në cilin vend ka ndodhur që deputeti që guxon të denoncojë vëllain e ministrit trafikant, të dënohet me një vit burg?
Në asnjë, në asnjë.
As në Rusinë e Putinit, as në Bjellorusinë e Lukashenkos.
Çfarë ndodh sot? Sot po kundërshtove narkodiktatorin, tani nuk e fsheh, do merrem personal me ju, thotë.
Ju e keni parë ultimatumet dhe paralajmërimet që i bën kryetarit të grupit parlamentar dhe nënkryetarit të PD, Gazment Bardhi.
Sot u dënua Salianji, por ai me Salianjin ai mbaroi punë.
Sot iu përvesh kryetarit të grupit parlamentar, sepse guxoi të rikthejë në skenë Olsin trafikant.
Dhe se ai u përpoq për të njëjtin skenar.
Çfarë do të thotë kjo? U garantoj se secili që të denoncojë krimet dhe aferat e Edi Ramës, do të ketë hakmarrjen e pamëshirë të tij.
Të nderuar anëtarë të kryesisë, demokratë!
Pra, ne jemi në këtë situatë.
Në një situatë ku Edi Rama ka shpalosur si alternativë për të marrë mandatin e tij burgosjen, arrestimin e eksponentëve të opozitës, drejtuesve të saj.
Për të mbjellë terror, për të mbjellë dhunë në një kohë që opozita po bën gjithçka për rikthimin në Shqipëri të votës së lirë.
Kam dëgjuar disa herë analistë që shprehen se Sali Berisha po kërkon qeverinë teknike në mënyrë që mosrealizimi të justifikojë humbjen e zgjedhjeve.
Unë u them ju të dashur demokratë, kurrë nuk është ai qëllim.
Qëllimi është vetëm një, një qeveri teknike për zgjedhje sa më të barabarta.
Me bindjen më të thellë dhe absolute se zgjedhjet i fiton opozita.
Ata që mendojnë dhe interpretojnë ndryshe, ata gabojnë. Ata ndoshta edhe pa dashje e mbrojnë Edi Ramën.
Po pse e them këtë? E them se çdo njeri që ka kulturë minimale elektorale e konstaton se Edi Rama nuk bën zgjedhje, Edi Rama grabit zgjedhje dhe se Sali Berisha dhe PD po përpiqet me të gjitha format që të bëhen zgjedhje në Shqipëri.
Por, rikthehemi te momenti.
Momenti i terrorit kundër opozitës e vë opozitën para dy alternativave: ose të dalë në klandestinitet, çka ne nuk e përfillim kurrë këtë, ose të dalë ballë për ballë.
Të mbrojë opozitarizmin, të mbrojë Kushtetutën, të mbrojë sovranitetin e vendit.
Një vend ku shtypet opozita, nuk ka sovranitet të brendshëm.
Ku shtypet një opozitë, e cila bën të gjitha përpjekjet për funksionimin e Kushtetutës, për funksionimin e ligjeve, për funksionimin e rregullores së parlamentit.
Por këto të gjitha shpërblehen me arrestime. Shpërblehen me burgosje, shpërblehen me dënime, që të gjitha antiligjore, që të gjitha antikushtetuese, që të gjitha hakmarrje primitive.
Ku shkojmë atëherë?
Sot është një thirrje, opozita e cila në vlerësimin tim, pavarësisht nga problematikat, nga dobësitë, nga të metat, nga kompleksi, por ajo përsëri është një opozitë e vërtetë.
Përsëri deputetët e saj bëjnë gjithçka të jenë interpretë të interesave më të mira të qytetarëve shqiptarë.
Të denoncosh krimin e lidhur me Edi Ramën, do të thotë të të ndërsejë të gjitha institucionet e shtetit kundër teje.
Do të thotë të të vendosë në arrest pa asnjë provë, asnjë fakt, asnjë dokument.
Do të thotë të të dënojë me burg.
Atëherë, në këtë situatë, në këtë gjendje, apo kësaj situate, opozita duhet t’i përgjigjet dhëmb për dhëmb.
Të dashur anëtarë të kryesisë së PD, të dashur demokratë, të dashur qytetarë!
Sot, më shumë se kurrë duhet të flasë guximi i opozitës.
Secili prej nesh ka bërë dhe do bëjë detyrën e vet me denoncime në emër tuaj, në emër të qytetarëve.
Por, këto janë absolutisht të pamjaftueshme.
Këto vetëm sa kanë nxitur, kanë inkurajuar dorën e zezë të terrorit të qeverisë ndaj opozitës.
Atëherë, cili do jetë qëndrimi ynë?
Qëndrimi ynë do jetë një opozitë me të madh dhe të vogël, me të gjithë ata që guxojnë, në protestë, në protestë, në protestë.
Qëndrimi ynë do jetë përqafimi i modelit të rezistencës në rrugë, në shesh, të përballjes dhëmb për dhëmb si objektivi më madhor absolut.
Me këtë regjim që nuk njeh Kushtetutë.
Me këtë regjim që bën gjithçka që të mos ketë opozitë.
Me këtë regjim që trajton Shqipërinë si plaçkë personale, si çiflig.
Po prapë të kthehemi edhe njëherë aty ku theksova, pa një opozitë sovrane, nuk ka sovranitet të brendshëm.
Po të ishte puna për sovranitet të jashtëm, Enver Hoxha nga mëngjesi gjer në darkë sfidonte të gjithë botën.
Po ishte Shqipëria një vend sovran? Ishte një vend pa sovranitet të brendshëm.
Kjo betejë duhet të kuptohet jo betejë për individin, as për Salianjin, as për Berishën, as për Metën, as për Mediun.
Por kjo betejë është një betejë për një opozitarizëm që i bën të qartë qeverisë se nuk mund të veprojë kurrë kështu siç po vepron.
Demokrate e demokratë, unë e kuptoj se nuk ka gjë më normale se sa të gjithë ju dhe ne së bashku të konstatojmë dhe mendojmë se jemi në fushatë elektorale.
Por në fakt, Edi Rama fushatën tonë elektorale e ka shndërruar në terror ndaj nesh.
Edi Rama fushatën tonë elektorale e ka shndërruar në burgosje ndaj nesh.
E ka shndërruar në dënime ndaj nesh për fajin e vetëm se denoncojmë krimin.
Për fajin e vetëm se bëjmë avokatinë e qytetarëve.
A mundet pra të ecim në këtë mënyrë?
Të mos harrojmë, si unë, si ju, sot në studiot televizive, fatmirësisht ka edhe analistë gazetarë, të cilët demaskojnë, damkosin çdo natë këtë regjim.
Është e vërtetë kjo.
Pse ua them unë këtë? Ua them që të mos fetishizojmë fjalën. Është koha e veprave.
Nuk jam kundër fjalës, të kuptohemi, unë e vlerësoj shumë fjalën, por tani është koha e veprave, tani është koha e kreativitetit, tani është koha e përballjes.
Çdo njeri që mendon ‘business as usual’ në këtë fushatë ku arrestohet kryetari i partisë dhe problemi nuk është se u arrestua, po si do bëhet me arrestimin e tij, dënohet me burg tjetri pse dënoi krimin dhe problemi është se nuk është krimi, por është ai fajtori.
Këto zhvillime duhet të jenë një elektroshok për çdo demokrat.
Midis jush, dhe është normale, po edhe midis drejtuesve të tjerë më gjerë, me të drejtë shtrohen pyetjet: a janë të gatshëm njerëzit për t’u përballur?
Do theksoj dy momente.
Betejat janë të guximtarëve. Dhe u garantoj ju se 500 guximtarë, 300 guximtarë, 50 guximtarë janë një detashment që mund të trondisë në themel këtë regjim.
Por këtu nuk bëhet fjalë për 500, për 50, të jeni të sigurt se janë mijëra e mijëra demokratë që presin udhëheqjen tuaj, që presin mobilizimin nga ju, që presin frymëzimin nga ju.
Ne jemi në një provë të madhe, një provë e tillë sa…
Çfarë ndodh? Shqipëria është i vetmi vend në botë ku skandalet i rrisin kuotat skandalistit, qeverisë.
Në jemi i vetmi vend në botë ku aktet e mirëfillta antikombëtare e bëjnë edhe më kombëtar tradhtarin.
Jo, nuk është kjo, absolutisht nuk janë shqiptarët këta.
Ka një problem, shqiptarët duan mobilizim, duan organizim, duan udhëheqje.
Nuk ka më trima, harrojeni këtë. Jo!
Në të gjithë historinë e tyre, me 50 të zeza të numëruara, dy i kanë ata, inteligjentë dhe trima.
Ai që nuk gjen trimëri tek shqiptari është frikacak për vete.
Ai që i merr për budallenj, ka problem me veten e tij.
Prandaj, të dashur miq, të lëmë çdo gjë. Nga mëngjesi gjer në darkë t’i përkushtohemi betejës.
Nuk jemi ne opozitë për t’u mposhtur në këtë mënyrë.
Nuk jemi ne opozitë për t’u mposhtur nga një kryebandit. Nga një kryehajdut që kombi nuk e ka pasur në histori si Edi Rama.
Nuk jemi ne si opozitë për t’u mposhtur nga bandat e qeverisë.
Ndaj dhe të themi ndal tani, është radha jonë.
T’i kthehemi këtij regjimi, t’i kthehemi ditë për ditë, t’i kthehemi gjer në fitore.
Të lëmë çdo gjë, Salianji është secili prej jush.
Ervin Salianji bëri detyrën që kishin detyrë secili prej nesh.
Ervin Salianji që u dënua sot nga Geron Xhafa, prestanom i Edi Ramës dhe Fatmir Xhafës, u dënua në mënyrë që ne të mos çelim më gojën.
U dënua që të na thonë se fatin e tij do pësoni po na sulmuat.
Atëherë o burra në shesh në një betejë të pandalshme.
Ndaj dhe cilido që mendon ndryshe, do respektohet mendimi i tij.
Por një gjë, opozita kaq e fuqishme nuk mundet kurrë të poshtërohet, të nënshtrohet, të pranojë shtypjen.
Nuk del kurrë në klandestinitet, por i qëndron dhëmb për dhëmb kriminelëve, bandave, kujtdo.
Çfarë misioni mund të kryejmë ne, kur deputeti ynë shkon në burg sepse denoncoi trafikanti Geron Xhafa?
Ndaj dhe, besoj dhe mendoj se opozita do të përmbushë këtë mision me qëllimin më të mirë, opozita në betejën që fillon për mosbindjen civile, ka vetëm një synim, rikthimin e votës së lirë.
Po nuk ka zgjedhje me opozitën në burg. Nuk ka zgjedhje me ndëshkimin e opozitarëve që denoncojnë krimin e kryeministrit.
Nuk ka zgjedhje me një kriminel si Edi Rama, që si përfaqësues i krimit shqiptar ndërkombëtar, kërkon të ndëshkojë shtete islamike për të larë miliardat e krimit në bankat e tij.
Shqiptarët duhet t’i zgjojmë, nuk ka më trima, ta harrojë kush. E kanë faktuar në histori.
Cilido që i beson historisë, gjen në historinë e këtij populli me 100 probleme, aktet më sublime të trimërisë.
Ndaj dhe ju ftoj demokrate e demokratë, ftoj drejtuesit e PD të dalin në shesh të mejdanit.
Salianji është secili prej nesh, Salianji është secili prej qytetarëve, secili prej opozitarëve.
Kriminelëve nuk u shtrihet kurrë qafa, përkundrazi dhëmb për dhëmb dhe ballë.
Shpëtojmë Shqipërinë nga mafia, shpëtojmë Europën nga mafia shqiptare.
Shpëtojmë të ardhmen e kombit shqiptar.
Është radha jonë.
O sot, o kurrë!
