FJALA E KRYETARIT TË PD-së, SALI BERISHA NË TAKIMIN E ELBASANIT
EKSTRAKT
Kryetari i Partisë Demokratike Sali Berisha ka zhvilluar një takim me anëtarët e PD në Elbasan me rastin e 34 vjetorit të themelimit të kësaj dege. Gjatë fjalës së tij ai theksoi se demokratët ia dolën që të transformojnë Shqipërinë.
Nga Elbasani, kryedemokrati Sali Berisha ka akuzuar Edi Ramën se ‘u përpoqën të na ndryshojnë emër dhe flamur, ja ku jemi sot me emrin dhe flamurin e lirisë së shqiptarëve’. ‘Çdo premtim që kam bërë këtu dhe do bëj kudo, iu garantoj se do e mbaj 100 përqind’, tha kreu demokrat gjate takimit në Elbasan.
‘Ndër vendimet më të para do vendoset minimumi jetik 200 euro’. ‘Kjo do të thotë, vijoi Berisha, që 57 përqind e pensionistëve, të cilët marrin jo pension të plotë, do marrin 200 euro’. ‘Kjo do të thotë se çdo pensionist shqiptar me pension të plotë 170 euro e poshtë, do marrë 200 euro’. ‘Kjo do të thotë se çdo shqiptar pa pension do marrë 200 euro’. ‘Kjo do të thotë se çdo i papunë do marrë 200 euro’. ‘Kjo do të thotë se çdo shqiptar me ndihmë ekonomike do marrë 200 euro’, tha lideri i opozitës në fjalën e tij para simpatizantëve elbasanas.
Kryetari i Partisë Demokratike Sali Berisha, gjatë fjalës së tij në takimin me anëtarët dhe simpatizantët demokratë në Elbasan tha se, ‘asnjë qindarkë nuk do paguhet në asnjë rrugë apo tunel të Shqipërisë’. ‘Nuk ka forcë politike më vitale se kjo forcë’. ‘Por, vijoj Berisha, do meritojë çdo gjë kur të përmbysë diktaturën e tyre, kur të përmbysë këtë bandë hajdutësh të shpërfytyruar që nuk njohin asnjë kufi’.
FJALA E PLOTE:
Dua më së pari të përulem me nderimin më të madh, mirënjohjen më të pakufishme para të gjithë atyre burrave dhe grave, djemve dhe vajzave që në kushtet e një terrori vërtet të egër, të paparë, themeluan në këtë qytet 34 vite më parë PD-në, si partinë e idealeve më të larta, më fisnike të qytetarëve të këtij qyteti dhe të shqiptarëve në tërësi.
Një përshëndetje të përzemërt për të gjithë ju këtu, për të gjithë qytetarët e Elbasanit, drejtuesit, deputetët, dhe të shpreh bindjen se këtë 34-vjetor nuk e kemi për histori, por e kemi për një start të ri drejt fitores së 11 majit, fitores së shumëpritur nga shqiptarët.
Të dashur miq, 34 vite më parë, vendi sundohej nga një forcë politike terroriste që kishte ndërtuar më shumë burgje dhe kampe se sa stadiume apo terren dëfrimi.
Sundohej nga një forcë politike, e cila në zbatim të doktrinës terroriste kishte vendosur në Shqipëri si në asnjë vend tjetër ish-komunist të Europës, diktaturën e tiranisë së mjerimit, e hiperkolektivizimit, diktaturën e izolimit më të thellë, diktaturën e kasaphanës së luftës së klasës.
Burrat dhe gratë, djemtë dhe vajzat që në dhjetor të ’90 morën guximin të krijojnë kundërshtarin e saj, të krijojnë forcën politike të idealeve për të cilat shqiptarët kishin sakrifikuar më shumë se çdo komb tjetër në diktaturën komuniste, forcën politike të lirive dhe dinjitetit njerëzor, të krijojnë forcën politike të interesit kombëtar përballë forcë politike të krijuar nga Beogradit si organ i tradhtisë kombëtare, të krijojnë forcën politike si forcë të mendimit të shqiptarësisë, të rilindjes, të Elbasanit, të të ardhmes.
Miqtë e mi, ditët ishin të vështira, por ajo kohë provoi se qëndresa dhe urtësia ishin më të forta se topat dhe tanket që u shpalosën në këtë qytet, që përgjakën këtë qytet.
Sot, pas 34 vitesh, çdo demokrat, çdo mbështetës i kësaj partie në 34 vite, duhet të ndjehet krenar sepse arriti në rrugë paqësore të përmbysë diktaturën më të egër.
Arriti në vendin e hiperkolektivizimit total, të rikthejë ekonominë e tregut.
Arriti të vendosë sistemin e vlerave, të dinjitetit dhe lirive të njeriut. Të ndërtojë demokracinë.
Arriti të hapë Shqipërinë, ta vendosë atë në anën e drejtë të historisë me aleatët e saj.
Arriti të integrojë Shqipërinë në Këshillin e Europës, të ece më hapa të sigurt drejt BE, ta anëtarësojë atë në NATO.
Në vitin 2008, shqiptarët që në shekuj përjetuan varfërinë më të mëdha, arritën të largohen nga grupi i kombeve të varfra dhe të kalojnë në grupin e kombeve më të ardhura të mesme të larta.
Kjo ishte një meritë e jashtëzakonshme e qytetarëve të lirë të këtij vendi që e bënë Shqipërinë të ecë drejt zhvillimit me hapa më të shpejta se ndonjë vend tjetër.
Miqtë e mi, po ta shohësh në rrafshin filozofik, çfarë ishte kjo parti? Kjo parti ishte parti e të vërtetave të mëdha të njeriut.
Idealet tona janë të vërteta, dinjiteti njerëzor është thelbi i lirive. Familja është shenjtëria më e madhe e shoqërisë.
Iniciativa e lirisë është forca jetike e një shoqërie.
Interesi kombëtar është shtylla, pa të cilën asnjë forcë politike nuk meriton të ekzistojë.
Këto ishin vlerat, parimet mbi të cilat ne u mbështetëm. Ne qëndruam të vërtetë edhe në kohërat tona më të vështira. Në vitin 1997, ne morën përgjegjësi për lejimin e skemave piramidale. Por po rikujtoj këtu secilin prej jush. Rebelimin komunist me armë e dominuam me zgjedhje.
Vendosëm të shkojmë tek sovrani. Të gjykojë pavarësisht se mendonte në mënyrë të gabuar se ne kishim marrë paratë e tij. Kurrë nuk i kishim prekur ato.
Por aty ka pasur një moment që nuk duhet ta harrojmë. Në qytete ku kërciste edhe kallashi, përfaqësuesit e PD deklaronin se një borxh që nuk është marrë, nuk mund të njihet.
Rivalët tonë deklaronin se do u japim çdo qindarkë. Pra, ne nuk pranonim të mashtronim, pavarësisht çmimit që mund të paguanim. Por nuk ishte opsion gënjeshtra për ne.
Kjo ishte arsyeja se pse 4 vitesh shqiptarët na votuan ne, pavarësisht nga gabimet që kishim bërë.
Qëndruam të vërtetë në çdo kohë ndaj dhe ia dolëm të transformojmë Shqipërinë.
Ia dolëm të krijojmë një metropol Tiranë-Elbasan-Durrës.
Ia dolëm që shqiptarët në këtë tokë të bekuar, të paguheshin më mirë se të gjitha kombet e tjera të rajonit, përfshi rumunët dhe bullgarët.
Dhe unë u them ju se në atë kohë, objektivi ynë ishte Sllovenia, e cila sot ka rroga të barabarta dhe pensione me vendet e zhvilluara të Europës.
Dorëzuam pushtetin me rotacion.
Respektuam çdo rregull.
Miqtë e mi, asnjë forcë politike në historinë e Europës nuk ka përjetuar një agresion që përjetuam ne.
Dhe pse? Sepse duhej të fshihej nga historia.
Duhej që Edi Rama të hakmerrej për pushtetin e etërve të tij, duhej që marksistë-leninistë amerikanë dhe të tjerë, të çrrënjosnin fuqinë e konservatorëve të Shqipërisë.
Duhej pra që woke-culture, reminishencë e revolucionit kulturor kinez, të vërshonte mbi Shqipërinë.
Shqipëria të shndërrohej në kopshtin e Xhorxh Sorosit, më keq se në kopshtin e Xhorxh Oruellit.
Sepse Sorosi tejkalon në doktrinë edhe Marksin. Në qoftë se Marksi ishte për njeriun e ri, Sorosi ndërhyn në identitetin e gjinisë njerëzore.
Por ne, sado që u përpoqën të na bëjnë copë-copë, ja ku jemi sot më të bashkuar se kurrë.
U përpoqën të na ndryshojnë emër dhe flamur, ja ku jemi sot me emrin dhe flamurin e lirisë së shqiptarëve.
U përpoqën të na burgosin, të na fshijnë nga harta politike e Shqipërisë, por është radha jonë, 11 maji është dita jonë, është dita e fitores.
Miq, historia është histori, por ne magnet kemi të ardhmen, magneti ynë është e ardhmja.
Ndaj dhe këto 4 muaj duhet ta bëjmë natën ditë në shërbim të fitores që presin shqiptarët.
Presin shqiptarët që na duan ne dhe Shqipërinë. Por edhe shumica e shqiptarëve që kaq shumë nuk na duan ne, por shohin të zezën më të madhe në krahun tjetër.
Të dashur miq, nuk mund të na qortojë kush për ADN-në tonë. ADN-ja jonë është respekti i njeriut, lirisë së tij, dinjitetit të rij. ADN-ja jonë është respekti i familjes, vendosjes së saj në piedestal. ADN jonë është patriotizmi, dashuria jonë për Shqipërinë. ADN-ja jonë është liria dhe të drejtat e njeriut.
Pra, nuk ka qenie njerëzore të lirë që të mos dojë dhe respektojë këtë ADN.
Ndaj dhe ne të mos harrojmë se në 34 vite mund të ishim harruar disa herë në histori, në qoftë se ne nuk do ishim burrat dhe gratë, djemtë dhe vajzat e tolerancës.
Mos harroni, njeriu i lirë është njeri tolerant. Njeriu dinjitoz është njeri tolerant. Fanatiku është fanatik. Fanatiku udhëhiqet nga inatet, ka deleguar ndërgjegjen. Kurse ne jo.
Këtu në Elbasan, me 13-14 dhjetor, u nxorën tanket, u përdorën armët e zjarrit. Idealistët e Elbasanit nuk rrëmbyen armët, por qëndruan përballë tyre. U burgosën, u dënuan, nuk u mposhtën.
Sot ne u bashkuam. Por ne nuk duhet të rreshtim përpjekjet për të bashkuar me ne çdo demokrat dhe demokrate.
Pse e them unë këtë?
Ne jemi njerëzit e të vërtetave. Nuk ka asgjë më të vërtetë se kontributi i njeriut, sesa djersa dhe përkushtimi i tij në një forcë politike, në një punë, në një proces dhe ne kurrë nuk e shkelim atë, nuk e mohojmë atë.
Duhet të udhëhiqemi nga ky parim dhe pastaj të shohim, të ulemi me çdo qytetar të Elbasanit, pavarësisht nga bindjet e tij, pavarësisht nga kritikat që mund të ketë ndaj nesh, pavarësisht se për cilin ka votuar më parë.
Ju jeni dhe ai është 10 herë më afër me ju, 10 herë më afër me njëri-tjetrin se sa me drejtuesit e tij.
Miqtë e mi, ne që kujtojmë 34 vite më parë, e dimë shumë mirë se Shqipëria sot është 34 herë më ndryshe.
Por, po të ndalemi, çfarë kemi sot?
Ka disa ngjashmëri të pamohueshme.
Ngjashmëria e parë e madhe është se njëlloj si diktatori dhe elita e tij, Edi Rama dhe organizata e tij kriminale janë të shkëputur në mënyrë përfundimtare nga qytetarët shqiptarë.
Ata nuk kanë asnjë lidhje as me demokratët, as me socialistët, as më ata pa parti.
Ai lëron tokën me parmendë, Edi Rama udhëton me çarter privat personal.
Ai nuk ka çati, Edi Rama blen vazon kullë të fildishtë dhe e vendos në oborr dhe u uron Vitin e Ri.
Ai merr 70 euro, Edi Rama merr 50-fishin e tij.
Pra, miq, këta kanë krijuar një hendek të tmershëm me qytetarët, pavarësisht nga bindjet e tyre.
Është detyra jonë të ulemi me secilin sepse ne vërtet kemi një program, kemi një zotim, kemi një kontratë për të firmosur me secilin shqiptar.
Për ta nisur së pari aty ku ushëtojnë sirenat e urisë, varfërisë, mjerimit.
Miqtë e mi, çfarë ndodhi këto 10 vite? Këto 10 vite, 1 milion e 99 mijë shqiptarë u larguan nga Shqipëria drejt BE. U larguan nga skamja e varfëria. Sepse shqiptarët çdo vit ranë poshtë e më poshtë me rrogat dhe pensionet e tyre.
Sepse pensionistët sot në Shqipëri marrin një pension 160-170 euro, malazezi që nuk ka as një të dhjetën e pasurive të Shqipërisë, merr një pension 450 euro. Maqedonasi merr një pension 280 euro. Serbi merr një pension 330 euro.
Po pse? Ishim para tyre, çfarë ndodh? Nuk ka qeveri në botë që buron nga vota që të mos ua kthejë paratë që mbledh qytetarëve. Të mos i vendosë ata të parët.
Përveç kësaj qeverie, e cila ka krijuar mekanizma të tmerrshme për të përvetësuar miliarda. Më ka thënë njëherë një avokat i famshëm, takoi kryeministrin e Shqipërisë. E pyeta, si t’u duk. Problemi i tij është ky, më tha, si avokat kam pasur disa klientë miliarderë, por asnjë prej tyre hezitonte të vidhte miliardin tjetër, sepse nuk ngopen. Kështu është historia e Edi Ramës. Kështu është historia e këtyre ministrave.
Tani thonë se ku do i gjejë ky paratë.
Miqtë e mi, çdo premtim që kam bërë këtu dhe do bëj kudo, iu garantoj se do e mbaj 100 përqind. Se 3 muajt e parë, ndër vendimet më të para do vendoset minimumi jetik 200 euro. Kjo do të thotë që 57 përqind e pensionistëve, të cilët marrin jo pension të plotë, do marrin 200 euro. Kjo do të thotë se çdo pensionist shqiptar me pension të plotë 170 euro e poshtë, do marrë 200 euro. Kjo do të thotë se çdo shqiptar pa pension do marrë 200 euro. Kjo do të thotë se çdo i papunë do marrë 200 euro. Kjo do të thotë se çdo shqiptar me ndihmë ekonomike do marrë 200 euro.
Kjo është rruga për t’i thënë stop mjerimit.
Kjo është rruga për t’u dhënë shqiptarëve çdo ditë atë pagë që përjashton mjerimin.
Këtë do e bëjmë 3 muajt e parë.
A e dini ju? E dini sigurisht, qytetarët tanë blejnë me çmimet më të shtrenjta se në Itali, Gjermani ushqimet.
Qytetarët shqiptarë udhëtojnë me çmimet më të shtrenjta, sepse nafta e tyre është më e shtrenjtë se në Singapor.
Merr fund kjo.
Ne nuk do hyjmë në çmimet e ushqimeve, por do u japim kartën e konsumatorit të gjithë atyre që janë me rrogë minimale e poshtë.
Karta e konsumatorit është rreth 450 euro. Është rreth 3 pensione.
Do kompensohet çdo 6 muaj.
Do i ndajmë ndryshe ne këto të ardhura.
Është krijuar një hendek i lemeritshëm. Shoqëria është ndarë si kurrë në historinë e saj.
Pra, pensionisti do marrë edhe 3 pensione shtesë me rikthimin e TVSH-së.
Rrogë minimale nën 500 euro nuk do ketë në Shqipëri.
Dhe ky është fillimi.
Sipërmarrësit të nderuar, duhet ta dinë se PD do bëjë gjithçka për klimën më miqësore ndaj bizneseve të tyre.
Po këtu, zero tolerancë. Shqiptarët do paguhen jo më pak se 500 euro në muaj dhe ky është fillimi.
Ky është fillimi i një vrapi me të cilin ne duhet të dalim në krye për rrogat dhe pensionet në rajon.
Asnjë vend tjetër, edhe dy vende të marra së bashku, nuk kanë pasuritë që ka Shqipëria.
Ato do u kthehen qytetarët. Do i gëzojnë qytetarët me rroga, pensione, shërbime.
Nafta nuk do mund të shitet kurrë me ndryshim më të madh se 10 përqind me Maqedoninë dhe Kosovën.
Ju paguani për litër të naftës 1.1 euro për çdo litër. Nuk ka vend tjetër që e bën këtë. Në SHBA, nafta shitet 0.8 dollarë në pompë. Ky merr për naftën 1.1 euro. Po ti mund ta bësh edhe 1.5, mund të ndalosh edhe makinat, po këto janë çmendurira dhe këto do marrin fund.
Nafta do ketë barrën fiskale të mesatarizuar me Maqedoninë dhe Kosovën.
Kosova naftën e importon nga Porti i Durrësit dhe e shet 40 përqind më lirë se në Tiranë, se në Durrës.
E kuptoni ju? Këta janë shkëputur tërësisht nga njerëzit, këta shohin vetëm kullën e fildishtë, kullën e hajnisë së tyre.
Qytetari i Shkodrës, Kukës, i Peshkopisë e me radhë, jo vetëm për shkak të naftës, por edhe për shkak të tarifave të rrugës, e ka udhëtimin më të kushtueshëm në Europë.
Asnjë qindarkë nuk do paguhet në asnjë rrugë, në asnjë tunel të Shqipërisë.
A e dini se ju paguani për mirëmbajtjen e rrugëve kësaj qeverie 190 milionë euro në vit me taksën e qarkullimit. Atëherë ku shkojnë këto? Shkojnë në xhepa të qeveritarëve. I vjedhin.
Ku do gjenden paratë?
Njëherë jam këtu dhe do i lutem çdo socialisti, edhe çdo rilindësi, t’i bëjë një mesazh Edi Ramës, t’i thotë dil burrërisht para Sali Berishës, ballafaqohu njëherë, këtu në Elbasan po deshe.
Po, po, t’i tregojmë njëri-tjetrit ku janë paratë. Po nuk del dot, se hajduti vetëm ikën, se hajduti vetëm fshihet.
Po vodhe me thasë, sigurisht që lekë nuk ke, lekët i ke për vete, jo për qytetarët.
Po nafta? A e dini ju, Kosova ka gjithsej 440 mijë automjete, Shqipëria ka regjistruar këtë vit 870 mijë automjete. Kosova zhdoganon 630 mijë ton naftë, Shqipëria zhdoganon gjithsej 550 mijë ton naftë. Ku shkon? I vjedh qeveria kontrabandë. Nuk mund të bëhet nafta kurrë kontrabandë pa qeverinë.
Prandaj për të gjitha këto, ju duhet të uleni me çdo qytetar, me çdo socialist.
Mos harroni një gjë, vërtet sot dyqanet janë plot, por janë për një pjesë të madhe të qytetarëve një mollë e ndaluar.
Ky është një potencial i madh për ju. Të krijojmë frontin më të gjerë që ka njohur dhe Elbasani i shquar për urtinë e trashëguar tradicionale mund ta përdorë në mënyrën më të fisshme këtë dialog, këtë debat me bashkëqytetarët, pavarësisht nga bindjet.
Të shkojmë të sigurt…
Nuk ka forcë politike më vitale se kjo forcë. Por do meritojë çdo gjë kur të përmbysë diktaturën e tyrë, kur të përmbysë këtë bandë hajdutësh të shpërfytyruar që nuk njohin asnjë kufi. Nuk ekzistojnë qytetarët.
Lënë për 780 mijë pensionistë 16 milionë euro për vitin 2025. Po ka cinizëm, ka pashpirtësi më të madhe se kjo?
Ai atje, në Prishtinë, ai thotë jo, unë do vendos 100 euro për çdo pensionist, do rris pensionet 20 përqind.
Kurse ky si një, çfarë t’i thuash se nuk dua të përdor epitete që të prish gojën.
Premtoi se do indeksonte pensionet në muajin mars. Nga marsi gjer në tetor nuk indeksoi asnjë qindarkë, i mori si hajdut ordiner ato para dhe thotë tani, ne japim bonus. Tallet me shqiptarët.
Energjia, jo nuk do paguani kurrë siç keni paguar. Do ta paguani më lirë se në vitin 2013. 300 kilovatët e parë do i paguani 70 lekë. Bizneset 60 lekë kilovatin. Rrogëlartit do i paguajnë.
Nuk jam kundër rrogave të larta, por disproporcioni i krijuar me rrogat është çnjerëzor.
Ky ka vendosur diferencën 10-12 herë. Ata do rrinë në vendnumëro gjersa diferenca e rrogës mesatare me rrogën mesatare të zbresë në 4 herë. Atëherë do rriten edhe ato.
Miqtë e mi, kjo betejë ka shumë aspekte, por në këtë betejë ne duhet të angazhohemi mbi të gjitha për hallet dhe dhimbjet më të mëdha të këtyre qytetarëve.
U garantoj se çdo premtim i bërë gjer më sot do bëhet realitet 3 muajt e para të qeverisjes së PD pas majit.
Është radha jonë.
Është radha jonë.
Është radha jonë!
Rrofshi ju, rroftë populli i Elbasanit.
Rroftë Shqipëria.
Fitore, fitore, fitore!
