DEKLARATË E KRYETARIT TË PD, SALI BERISHA
EKSTRAKT
Kryetari i Partisë Demokratike, Sali Berisha, ka bërë publik reagimin e kongresmenit amerikan Joe Wilson, kryetar i Komisionit të Helsinkit në Kongresin e Shteteve të Bashkuara, lidhur me zhvillimet e fundit në Shqipëri.
Në deklaratën e tij, Berisha lexoi mesazhin e Wilson, i cili shprehet i shqetësuar për përshkallëzimin e krizës në Shqipëri, duke theksuar se qytetarët shqiptarë meritojnë liri, shtet ligjor dhe përgjegjshmëri institucionale.
“Qeveria duhet të përmbahet nga të gjitha llojet e dhunës kundër protestuesve. Të rinjtë meritojnë një zë në të ardhmen e vendit të tyre”, thuhet në reagimin e kongresmenit amerikan.
Wilson e cilëson Shqipërinë si aleate të Shteteve të Bashkuara në NATO dhe nënvizon rëndësinë e respektimit të të drejtave të qytetarëve dhe të rinjve në këtë situatë.
Berisha shprehu mirënjohjen për reagimin e kongresmenit amerikan, duke e cilësuar atë si të rëndësishëm në kushtet e zhvillimeve politike dhe protestave në vend.
DEKLARATA E PLOTË
Mirëmbrëma. Të dashur qytetarë dhe qytetare. Me kënaqësi ju informoj se kryetari i Komitetit të Helsinkit të Kongresit të Shteteve të Bashkuara, kongresmeni Joe Wilson, një mik i shquar i shqiptarëve, ka reaguar ndaj zhvillimeve në Shqipëri.
Po lexoj reagimin e kongresmenit Wilson, kryetarit të Komisionit të Helsinkit të Kongresit të Shteteve të Bashkuara: ‘Unë po ndjek me shqetësim të madh përshkallëzimin e krizës në Shqipëri, aleatin tonë në NATO. Populli shqiptar meriton liri, shtet ligjor dhe përgjegjshmëri institucionale. Qeveria duhet të përmbahet nga të gjitha llojet e dhunës kundër protestuesve. Të rinjtë meritojnë një zë në të ardhmen e vendit të tyre.’ Le të shprehim ne mirënjohjen e pafundme për këtë reagim shumë të çmuar dhe të rëndësishëm të kryetarit të Komisionit të Helsinkit të Kongresit të Shteteve të Bashkuara, Joe Wilson. Faleminderit.
