21 MAJ 2026
FJALA E KRYETARIT TË PD-së, SALI BERISHA NË TAKIMIN E LGDSH DHE FONDACIONIT SUEDEZ
EKSTRAKT
Kryetari i Partisë Demokratike, Sali Berisha duke folur në tryezën ‘Gratë politikane të rajonit, Suedisë dhe EPP-së bashkë për Integrimin’, është shprehur se, integrimit në Bashkimin Europian është prioritet për demokratët. Por sipas tij, Shqipëria po rrëshqet drejt autokracisë djhe këtë e kanë konfirmuar edhe raportet ndërkombëtare.
‘Nëse shikoni zgjedhjet e 11 majit të kaluar në Shqipëri, do të gjeni se ato u karakterizuan si zgjedhje ku kufiri mes institucioneve shtetërore dhe strukturave partiake ishte zbehur ose zhdukur. Kjo do të thotë zgjedhje që u zhvilluan në një shtet-parti, në një model të partisë-shtet. Dhe këto nuk do të konsiderohen kurrë zgjedhje të mirëfillta. Ky është një problem shumë themelor i autokracisë në Shqipëri’, tha Berisha.
Gjatë fjalës në takimin për gratë dhe integrimin të organizuar nga Lidhja Demokratike e Gruas dhe fondacioni ‘Jarl Hjalmarson’, kryedemokrati Sali Berisha u shpreh se, Shqipëria është narkoshteti i parë në Europë. Sipas tij, krimi i organizuar po mban peng rotacionin politik në vend, duke mbështetur qeverinë.
‘Në Shqipëri nuk ka Rusi. Ka drogë dhe një fuqi të jashtëzakonshme që vjen prej saj. Prandaj, në fakt, kartelet e drogës dhe krimi i organizuar nuk lejojnë në këtë vend rrotacionin e pushtetit. Këtu është instaluar një narkoshtet. Ky është i pari dhe i vetmi narkoshtet në Europë. Cilat janë pasojat? Shkatërruese’, u shpreh kryetari i PD-së, Sali Berisha.
Duke folur në takimin për rolin e grave në integrimin, kryetari i PD-së, Sali Berisha foli edhe për raportin e IBAR, që u amendua në mënyrë serioze nga Komisioni Europian dhe Parlamenti Europian. Sipas tij, pavarësisht miratimit të sotëm, IBAR është amenduar për shkak të sjelljes së qeverisë ndaj korrupsionit dhe drejtësisë.
‘IBAR u votua sot për Shqipërinë, por siç e keni dëgjuar ju, u amendua. U amendua në mënyrë serioze pas qëndrimit të qeverisë ndaj hetimeve, ndaj drejtësisë, ndaj luftës kundër korrupsionit. Pra, ka pasur reflektime të mëdha të problemeve për t’u adresuar. Shpresoj që Bashkimi Evropian do ta mbajë fokusin te rajoni ynë. Rajoni ynë është i rëndësishëm.’, tha Berisha
FJALA E PLOTE:
Së pari dua të shpreh mirënjohje ndaj fondacionit Jarl Hjalmarson, një aleat shumë i çmuar, i kahershëm i Partisë Demokratike, presidentes Gustafsson dhe bashkëpunëtorëve të saj.
Dua gjithashtu të shpreh mirëseardhjen zonjave të nderuara deputete, personalitete të shquara nga Suedia, Kroacia, Kosova, Mali i Zi, Serbia, pra nga rajoni. Të shpreh vlerësimin tim për çështjet që keni zgjedhur në këtë konferencë.
Dua të shpreh vlerësimin tim të thellë për temat e zgjedhura për këtë debat. Janë tema shumë themelore, më themeloret: zgjerimi i Bashkimit Evropian, NATO dhe siguria.
Këto janë, pa diskutim, çështjet më të rëndësishme për Shqipërinë, dhe jo vetëm për Shqipërinë, por edhe për vendet e Ballkanit Perëndimor që po punojnë për t’u integruar në Bashkimin Evropian.
Disa prej tyre janë anëtare të NATO-s. Pra, temat dhe çështjet janë jashtëzakonisht të rëndësishme.
Integrimi në Bashkimin Evropian për Shqipërinë dhe për Partinë Demokratike është prioriteti kryesor. Sepse ne besojmë se një e ardhme në BE do të thotë më shumë liri, më shumë mirëqenie dhe më shumë siguri për qytetarët shqiptarë.
Kjo është arsyeja pse për partinë tonë ky është prioriteti kryesor i programit.
Ne besojmë se ky proces duhet të bazohet në meritë. Vetëm një proces i bazuar në meritë u garanton qytetarëve tanë liritë dhe të drejtat e njeriut, një drejtësi të pavarur, një ekonomi funksionale tregu dhe ‘acquis communautaire’ për vendin.
Shqipëria sot ndodhet në një moment shumë të veçantë. Pak muaj më parë, V-Dem e klasifikoi Shqipërinë si një autokraci elektorale.
Në fakt, autokracitë elektorale janë diktatura autokratike në kuptimin që ato e pranojnë pluralizmin, por e shtypin atë.
Nëse diktaturat totalitare nuk e pranojnë pluralizmin, nuk e lejojnë fare ose krijojnë një pluralizëm të rremë, siç bëri Tito gjatë sundimit të tij dhe siç e kopjoi Ramiz Alia në vitet e fundit të diktaturës, diktaturat autokratike, ose të quajtura autokraci elektorale, shkatërrojnë mekanizmin më themelor të një shoqërie demokratike, që janë zgjedhjet e lira.
Nëse shikoni zgjedhjet e 11 majit të kaluar në Shqipëri, do të gjeni se ato u karakterizuan si zgjedhje ku kufiri mes institucioneve shtetërore dhe strukturave partiake ishte zbehur ose zhdukur.
Kjo do të thotë zgjedhje që u zhvilluan në një shtet-parti, në një model të partisë-shtet.
Dhe këto nuk do të konsiderohen kurrë zgjedhje të mirëfillta. Ky është një problem shumë themelor i autokracisë në Shqipëri.
E dyta, që e bën këtë rast të ndryshëm, ne kemi modele autokracie edhe në Gjeorgji.
Por e dyta që e bën të ndryshme. Ne kemi këto modele edhe në Gjeorgji.
Por në Gjeorgji ndryshimi është si vijon: në Gjeorgji ekziston një ‘vëlla i madh’, që është Rusia. Me të gjitha instrumentet e saj, gazin dhe mjetet e tjera që mbajnë në pushtet regjimin dhe shtypin opozitën.
Në Shqipëri nuk ka Rusi. Ka drogë dhe një fuqi të jashtëzakonshme që vjen prej saj. Prandaj, në fakt, kartelet e drogës dhe krimi i organizuar nuk lejojnë në këtë vend rrotacionin e pushtetit.
Një nga europarlamentarët më të njohur, i cili kryesoi misionin e Parlamentit Europian në zgjedhje, u ngrit në Parlamentin Europian dhe tha se në Shqipëri krimi i organizuar nuk lejon rrotacionin e pushtetit.
Këtu është instaluar një narkoshtet. Ky është i pari dhe i vetmi narkoshtet në Europë.
Cilat janë pasojat? Shkatërruese.
Pra, euro, që është monedha më e fortë dhe unike në Europë, në Shqipëri është zhvlerësuar me më shumë se 32%.
Cila ishte pasoja e këtij zhvlerësimi? Qindra e mijëra ndërmarrje eksportuese falimentuan sepse ato punonin me euro. Dhjetëra mijëra punonjës humbën punën dhe u larguan nga vendi.
Por nëse studioni zhvlerësimin e euros në botë, do të gjeni se në Meksikë zhvlerësimi është 17.4%, ndërsa në Shqipëri, në 10 vite, është 32%.
Tani që jeni në Tiranë, do të shikoni gjithë këto kulla që kemi. Vetëm 20% e parave vjen nga sistemi bankar. Ndërsa 80%, sipas një gazetareje investigative shumë të guximshme, vjen nga burime të panjohura.
Prandaj unë thashë që nëse në Gjeorgji ‘vëllai i madh’ është Rusia, në Shqipëri nuk është Rusia, por droga dhe kartelet e drogës.
Në një situatë të tillë, sigurisht që përballemi me probleme shumë të vështira. Por gratë po luajnë një rol shumë të rëndësishëm. Ato po qëndrojnë dhe do të vazhdojnë të qëndrojnë, pavarësisht vështirësive tona të mëdha.
Pa dyshim që ne do të mobilizojmë të gjitha potencialet tona. Çfarë kërkojmë ne? Kërkojmë një qeveri teknike dhe zgjedhje normale.
Ka pasur probleme të mëdha me Kushtetutën dhe drejtësinë në vend. Kryeministri bllokoi në mënyrë brutale hetimin ndaj zëvendëskryeministres, sepse në fakt ai ishte pas saj në të gjitha veprimet.
Ne përpiqemi ta bëjmë zërin tonë të dëgjohet. Punojmë ngushtë me partitë simotra, me institucionet e Bashkimit Europian dhe me Këshillin e Europës.
Dhe jemi optimistë. Sepse në vitet ’90 diktatura komuniste pretendonte se Shqipëria do të mbetej një fanar ndriçues në detin Adriatik. Por Shqipëria nuk do të mbetet narkoshtet për shumë kohë.
Ne jemi shumë të angazhuar për të përmbushur detyrën dhe pritshmëritë tona. Dhe jemi shumë mirënjohës ndaj të gjithëve ju për mbështetjen.
Jemi mirënjohës ndaj të gjitha grave shqiptare që po mbështesin Partinë Demokratike dhe opozitën.
Ju faleminderit shumë.
FJALA PERMBYLLESE
Edhe një herë do të doja t’ju falënderoja shumë dhe t’ju siguroja se kjo konferencë është me rëndësi të madhe për ne dhe kemi mbështetje të madhe.
Çfarëdo vështirësish të përballemi, ne qëndrojmë thellësisht të bindur që të punojmë fort për integrimin, procesin e integrimit evropian.
Pavarësisht faktit se qeveria përpiqet ta mbajë atë pothuajse si proces të ndarë, jo vetëm për opozitën, por gjithashtu për publikun dhe shoqërinë civile.
Ne qëndruam fort ndaj këtij zotërimi të këtij procesi dhe njëfarë përparimi është bërë.
Disa gjëra u arritën në këtë drejtim, por përsëri ne këmbëngulëm.
IBAR u votua sot për Shqipërinë, por siç e keni dëgjuar ju, u amendua.
U amendua në mënyrë serioze pas qëndrimit të qeverisë ndaj hetimeve, ndaj drejtësisë, ndaj luftës kundër korrupsionit.
Pra, ka pasur reflektime të mëdha të problemeve për t’u adresuar.
Shpresoj që Bashkimi Evropian do ta mbajë fokusin te rajoni ynë. Rajoni ynë është i rëndësishëm.
Jo sepse siç thonë, ballkanasit prodhojnë më shumë histori sesa mund të konsumojnë, kështu që mendoj se mënyra më e mirë për ta bërë atë të prodhojë pak më pak histori dhe më shumë të ardhme, është integrimi evropian.
Ndaj mendoj se pavarësisht problemeve që kanë vendet tona, nuk ka rrugë më të mirë për t’i zgjidhur problemet e rajonit.
Një rajon shumë i rëndësishëm, me potenciale të jashtëzakonshme, burime.
Kështu që mbetem optimist për këtë.
Faleminderit shumë dhe ju uroj suksese në konferencën tuaj.
