KONFERENCA E KRYETARIT TË PD-së, SALI BERISHA ME GAZETARËT
EKSTRAKT
Kryetari i Partisë Demokratike, Sali Berisha, në një deklaratë për media, reagoi pas kërkesës së SHBA-së drejtuar autoriteteve shqiptare për të luftuar kartelet e drogës. Ai theksoi se kreu i karteleve të drogës në Shqipëri është vetë Kryeministri Edi Rama, duke i lidhur ato me grupe të fuqishme kriminale si Troplinët, Çelajt dhe Bajrët. Berisha denoncoi operacionin “Ura”, i cili, sipas tij, ka nxjerrë në pah lidhjet e drejtpërdrejta të Edi Ramës dhe anëtarëve të kartelit të Troplinëve, duke përfshirë edhe Altin Dumanin dhe figura të tjera të njohura të politikës dhe krimit. Ai akuzoi drejtësinë shqiptare për mbrojtjen e personave të lidhur me këtë kartel, duke sjellë si shembull vonesat në arrestimin e anëtarëve të tij, që sipas Berishës, kanë mundur të fshehin provat dhe të vazhdojnë aktivitetet e tyre kriminale.
Gjatë konferencës për mediat, kryedemokrati Sali Berisha, i ka kërkuar presidentit Donald Trump dhe qeverisë së SHBA që të shpallin kartelet shqiptare si organizata terroriste. Ai e theksoi këtë kërkesë duke i lidhur këto grupe me pastrim parash dhe aktivitete kriminale që përfshijnë miliarda euro të fituara nga trafiku i drogës. Berisha akuzoi Edi Ramën për udhëheqjen dhe mbështetje të këtyre karteleve, duke i lidhur ata me politikanë të tjerë të lartë të Shqipërisë, si Olsi Rama, Taulant Balla dhe Ervin Hoxha. Ai theksoi se Partia Demokratike është e gatshme të ofrojë çdo provë që tregon implikimin e këtyre individëve në aktivitetet e karteleve më të rrezikshme të rajonit dhe botës.
Lideri i demokratëve, Sali Berisha, ka denoncuar ndërhyrjen e karteleve të drogës në zgjedhjet e 11-majit, duke sjellë fakte dhe shifra që dëshmojnë përpjekjet e grupeve kriminale për të manipuluar rezultatin zgjedhor. Ai ka veçuar figura të njohura, si Arkend Balla dhe Blendi Xhabafti, të cilët sipas Berishës janë rekrutuar dhe mbështetur nga kartelit e Troplinëve dhe Xhabaftëve për të forcuar ndikimin e krimit në politikë. Berisha ka sjellë si shembull kandidatin Arkend Balla, i cili mori një rritje të jashtëzakonshme të votave, nga 2,463 në 20,718, duke e lidhur këtë rritje me patronazhin e kartelit Troplini. Ai ka theksuar se Balla është premtuar për postin e Ministrit të Brendshëm pas zgjedhjeve, duke dëshmuar lidhjen e ngushtë mes politikës dhe krimit të organizuar. Berisha ka akuzuar qeverinë dhe zyrtarët e saj se po i mbrojnë këto figura, duke përdorur media të kontrolluara për të mirëmbajtur imazhin e tyre.
Kreu i PD-së Sali Berisha, ka akuzuar mediat që mbështesin qeverinë se po përpiqen të censurojnë informacionet dhe denoncimet ndërkombëtare që zbulojnë lidhjet e krimit të organizuar me administratën shqiptare. Ai ka theksuar se, edhe pse ka pasur një kërkesë të fortë nga Prokurorja e Përgjithshme e SHBA-së për të luftuar kartelet e drogës në Shqipëri, këto mesazhe janë censuruar në mënyrë të qëllimshme nga media të kontrolluara nga qeveria dhe krimi i organizuar. Berisha ka deklaruar se mediat e lidhura me qeverinë dhe krimin janë duke bërë gjithçka për të manipuluar opinionin publik dhe për të paraqitur si të rregullt një proces zgjedhor që, sipas tij, ishte një farsë totale.
Lideri i opozitës, Sali Berisha, ka reaguar ashpër ndaj zgjedhjeve të 11 majit, duke i quajtur ato një farsë të pastër dhe duke theksuar se opozita nuk mund të presë më gjatë për të vepruar. Ai ka shprehur bindjen se Edi Rama është i gatshëm të bëjë gjithçka për të manipuluar zgjedhjet dhe se kjo është pasqyrë e një keqfunksionimi të plotë të demokracisë në Shqipëri. Berisha ka nënvizuar se, përveç opozitës, qytetarët shqiptarë kanë mbështetje nga shumë grupe dhe parti ndërkombëtare. Ai ka përmendur me krenari mbështetje të gjerë nga 108 parti politike të Internacionales Demokrate të Qendrës, 87 të Partisë Popullore Europiane, dhe 83 të Bashkimit Ndërkombëtar Demokrat. Këto parti, sipas tij, kanë theksuar se zgjedhjet në Shqipëri nuk ishin të lira, por thjesht një farsë elektorale, e cila u paralajmërua edhe nga shumë forca të qendrës së djathtë në Evropë.
Kryetari i Partisë Demokratike, Sali Berisha, ka reaguar pas tentativave të qeverisë Rama për të ushtruar presion mbi vëzhguesit ndërkombëtarë, duke theksuar se beson në integritetin dhe profesionalizmin e tyre. Ai ka deklaruar se, pavarësisht përpjekjeve monstruoze për të manipuluar raportet e vëzhguesve, besimi i tij është i palëkundur se ata do të qëndrojnë të paanshëm dhe nuk do të lejojnë që Edi Rama të diktojë ose ndryshojë vlerësimin e tyre.
Berisha ka theksuar se ka pasur ndërhyrje të drejtpërdrejta nga nivelet më të larta të qeverisë, duke u përpjekur të ndryshojnë raportin që vëzhguesit ndërkombëtarë kishin përgatitur për zgjedhjet. Megjithatë, ai është i bindur se këto përpjekje nuk do të kenë sukses, dhe se raporti përfundimtar do të pasurohet me shumë më tepër prova dhe dokumente që dëshmojnë shkeljet dhe manipullimet që ndodhën gjatë zgjedhjeve.
FJALA E PLOTE
SHBA, përmes të dërguarit të saj, kërkojnë nga autoritetet shqiptare të luftojnë kartelet e drogës.
Unë e përshëndes këtë kërkesë, si një kërkesë të një rëndësie shumë të madhe.
Por theksoj gjithashtu se kreu i karteleve të drogës, të Troplinëve, Çelajve, Bajrëve, etj, ndodhet në karrigen e kryeministrit të Shqipërisë dhe ky është Edi Rama.
Operacioni i fundit, i quajtur Ura, nxori lakuriq, si anëtar të kartelit më të rrezikshëm të Ballkanit dhe Europës, që është karteli Troplini, sepse është karteli që zotëron 100 përqind Portin e Durrësit, anëtarët e këtij karteli janë Ergys Agasi, Altin Dumani, Vangjush Dako, Edi Rama.
E vërteta është se Ergys Agasi, Elvis Doçi, Vangjush Dako dhe Edi Rama, gjatë fushatës elektorale kanë zhvilluar një seri takimesh sipas burimeve, dëshmitarëve, në vilën e Vangjush Dakos në plazhin e Durrësit.
Por vetë operacioni Ura zbulon Altin Dumanin, Irena Gjokën, Ergys Agasin dhe Edi Ramën si anëtarë apo drejtues të kartelit.
Autoritetet italiane prunë urdhër-arrestet me datën 19 shkurt.
Nga kjo, Irena me 5 mbiemra, delinkuente, e dënuar me burg në vendin fqinj dhe që mbahet si turpi i drejtësisë shqiptare në detyrë nga Edi Rama dhe KLGJ-ja e tij, mbajti dosjen 42 ditë.
Pas 42 ditësh, ajo firmosi, por Altin Troplini alias Dumani, e mbajti dosjen edhe 20 ditë të tjera, nga data 30 prill deri më datën 20 maj, sa bosi i kartelit, Elvis Doçi, iu dha koha e mjaftueshme për të përmbushur misionin, për të transferuar, për të fshehur të gjitha tonelatat e tij me kokainë dhe narko-euro dhe tani jeton i qetë.
Altin Troplini në pafytyrësinë më të madhe u deklaroi shqiptare se shtymë arrestin, të marrë vesh me autoritetet italiane dhe të tjera.
Ky është një mashtrim i turpshëm që ai u ka bërë autoriteteve italiane dhe autoriteteve të tjera si bashkëpunëtor në një krim të rëndë me kartelin më të fuqishëm të drogës në Europë, kartelin që disponon portin kryesor të vendit.
Por në qëndrimin e SHBA, ka një ndryshim cilësor, shumë të rëndësishëm.
Prokurorja e përgjithshme Bondi flet për kartele droge.
Presidenti Donald Trump, kartelet e drogës në disa vende i ka shpallur si grupe terroriste.
I bëj thirrje presidentit Trump dhe qeverisë së SHBA të deklarojë terroriste këto grupe shqiptare, të cilat janë ndër më të rrezikshmet në rajon, Europë dhe në botë.
Të cilat lëvizin miliarda, miliarda, miliarda euro, para droge dhe që i lajnë ato lirshëm, pa asnjë lloj kufizimi në Shqipëri me firmën e kreut të këtyre karteleve, kreut të organizatave kriminale, Edi Rama.
Deklarimi si organizata terroriste i organizatave mafioze të Shqipërisë është një kontribut serioz, i madh, për sigurinë në Shqipëri, për sigurinë në rajon, për sigurinë e NATO-s dhe Europës e më gjerë.
Ndaj dhe garantoj se PD është e gatshme të paraqesë çdo dokument, çdo provë që fakton implikimin direkt të Edi Ramës, Olsi Ramës, Taulant Ballës, Ervin Hoxhës dhe shumë të tjerëve në aktivitetet e karteleve më të rrezikshme të rajonit dhe botës.
Pra, jam këtu para jush për të theksuar edhe njëherë para shqiptarëve se dita e djeshme shënon një moment kthese shumë të rëndësishme për shqiptarët, për Shqipërinë, rajonin dhe Europën, damkosjen e grupeve kriminale shqiptare, organizatave të lidhura me qeverinë dhe Edi Ramën, si kartele droge.
Të gjithë ata të cilët hezitonin apo u dukej paksa i largët, si i çuditshëm, etiketa e narkoshtetit në Shqipëri, tani nuk duhet të kenë më asnjë dyshim.
Shqipëria është shteti i karteleve të drogës.
Shqipëria ishte dhe është narkoshtet edhe para krijimit të karteleve, por krijimi i karteleve është rezultat i politikave zyrtare që Edi Rama ndoqi nga viti 2015 gjer sot.
Kartelet e drogës në Shqipëri janë edhe vendimmarrësit më të fuqishëm në qeveri, në parlament, në qeveritë vendore.
Ato diktuan me dhunë dhe drogë rezultate zgjedhjesh në zgjedhjet e fundit, duke i transformuar zgjedhjet e 11 majit 2025 në farsën elektorale më të shëmtuar në historinë e vendit në 34 vite.
Tani, për të ilustruar disa momente të ndërhyrjes së kartelit Troplini në zgjedhje, kemi këtu famozin Arkend Balla, për të cilin dje zyra e shtipit të Edi Ramës shpërndante editoriale që i botonin lakejtë e tij, duke e marrë në mbrojtje se çfarë malli është ky.
Arkend Balla, në vitin 2021, kur kumbarët e kartelit nuk e kishin rekrutuar akoma, mori 2463 vota.
Arkend Balla në vitin 2025, nën patronazhin e kartelit Troplini, Elvis Doçit, mori 20718 vota.
Pra këtij pothuaj iu dhjetëfishuan votat në patronazhin e kartelit Troplini.
Arkend Balla ishte premtuar dhe është premtuar për ministër i Brendshëm i kartelit Troplini pas zgjedhjeve.
Ndaj dhe dje, zyra e shtypit të kryeministrit, u shpërndante editoriale portaleve të kontrolluara prej qeverisë dhe krimit, me të cilat përpiqeshin të mirësonin imazhin e Arkend Ballës, e këtij produkti të kartelit Troplini.
Në vitin 2021, Orlando Rakipi ka marrë 3528 vota në Vorë, natyrisht i mbështetur nga Xhabaftët pa diskutim.
Në vitin 2025, votat e tij pjesëtohen me dhjetë sepse ka hyrë në garë Blendi Xhabafti. Ministri Xhabafti ka marrë 4759 vota dhe i dyti pas tij ka marrë 10 herë më pak vota.
Për të parë këtu efektin e kartelit Xhabafti, që ka portën hyrëse të Tiranës. Kontrollon hyrjen e Tiranës.
Ja ku është banditi, shkon dhe kërcënon te qendra e votimit për Blendi Gonxhen. Ky është anëtar i kartelit.
Ja, këta janë.
Ja zgjedhjet në Vorë. Kur karteli i drogës Xhabafti, shkon dhe terrorizon qytetarët në hyrje të qendrës së votimit.
Të dënuar në Itali për drogë, droga në Tiranë futet nëpërmjet tyre. Kontrollohet prej tyre, këta marrin përqindjen.
Ushtrojnë terror…
Opozita këto mund të bëjë, opozita nuk arreston dot njeri.
Pra, u njohët këtu me një ilustrim mbi brutalitetin e karteleve të drogës, kartelit Troplini dhe kartelit Xhabafti në rezultatin e zgjedhjeve.
Por këtu tek karteli Troplini mund të themi se Arkend Balla është vetëm njëri prej deputetëve, se janë trefishuar votat edhe Ilir Ndrazhit. Edhe ky është në patronazhin e kartelit të famshëm të Troplinëve, etj.
Është shumë interesante, dëgjoni, Arkend Balla ka marrë 5 mijë vota më shumë se Edi Rama në vitin 2021.
Ministri i Brendshëm i kartelit Troplini ka marrë 5 mijë vota më shumë se Edi Rama.
Se ç’është një këtu një Erion Meka, që ka marrë në vitin 2021, 2200 vota, në vitin 2025, 3400 vota, pra nuk ka pasur ndonjë lëvizje domethënëse.
Është po kështu i mbështetur nga karteli Troplini, Gjushi dhe Gys Agasi është edhe Ani Dyrmishi, i cili ka marrë 13700 vota.
Siç e shihni, vetëm në rrethin e Durrësit, karteli Troplini i ka dhënë Edi Ramës, kreut të kartelit, me 4 deputetë, rreth 50 mijë vota.
Pa llogaritur votat në zonat e tjera.
Ndaj dhe uroj që së shpejti të dekretohen si organizata terroriste, të cilat rrënojnë të ardhmen e këtij vendi, shkatërrojnë normat demokratike, demokracinë, por edhe ekonominë nëpërmjet narkoeurove dhe narkoekonomisë.
PYETJE PERGJIGJE ME GAZETARET
Marsi Korreshi, SYRI TV: Teksa ju vijoni të bëni denoncimet tuaja të përditshme, nga ana tjetër KQZ-ja po vijon me shpalljen e rezultateve zgjedhore. Si do e kundërshtoni ju këtë situatë, ku KQZ po certifikon rezultatin e zgjedhjeve pavarësisht zgjedhjeve.
Sali Berisha: Nuk ka dyshim që narkoshtetit do të certifikoje farsën e tij. Por qëndrimi ynë është ky; nuk njohim zgjedhjet dhe ne po paraqesim para shqiptarëve fakte të pakundërshtueshme të një farse më të shëmtuar elektorale që ka ndodhur në 34 vite.
Ju jeni dëshmitarë. Këtu zhvillohet një betejë mediatike e egër, midis megafonëve të qeverisë të lidhur me qeverinë dhe nëpërmjet qeverisë me krimin, të cilët bëjnë gjithçka të dezinformojnë qytetarët shqiptarë, të mashtrojnë qytetarët shqiptarë, tu shesin farsën si proces të rregullt zgjedhor.
Bëjnë gjithçka të censurojnë raportet e ndërkombëtarëve që denoncon pikë për pikë shkeljen e 16 traktateve, konventave dhe dokumenteve ndërkombëtare për zgjedhjet, të cilat mishërojnë parimet ndërkombëtare të zgjedhjeve.
Censuruan në mënyrë të paimagjinueshme kërkesën e Prokurores së Përgjithshme të SHBA-së për luftën kundër karteleve. E censuruan, nuk mund ta jepnin sepse janë të lidhura me kartelet nëpërmjet qeverisë ose direkt.
Lexoni ju artikullin e shkruajtur nga Fuga për Arkend Ballën se, sa njeri i mirë është ky, se si i bihet në qafë këtij të pafajshmi.
Pra, sigurisht që organet e administrimit të zgjedhjeve, janë organe të narkoshtetit, por ne po bëjnë punën tonë, po paraqesim para jush dhe shqiptarëve, fakte dhe të vërteta të pamohueshme, të pakundërshtueshme që dëshmojnë se, në Shqipëri kishte një farsë të shëmtuar elektorale.
Aspekti i karteleve është vetëm njëri dimension. Do të rikthehemi përsëri tek dimensionet e tjera. Është multidimensionale farsa dhe kësaj here është shpalosur me të gjithë shëmtinë e saj.
Marsi Korreshi, SYRI TV: Ju keni thënë më herët se në parlament kemi 28 deputetë nga krimit që janë futur në parlament. Cili do të jetë qëndrimi i opozitës në shtator dhe a do të presë opozita vjeshtën, për një aksion opozitar kundër asaj që e cilësoni si masakra më e madhe zgjedhore.
Sali Berisha: Opozita nuk mund dhe nuk duhet të presë vjeshtën. E kam thënë dhe e them, këto zgjedhje treguan se Edi Rama është i aftë të bëjë gjithçka, të paguajë çdo çmim, për ti shndërruar në farsë.
Opozita do të bëjë gjithçka për tu kthyer shqiptarëve votën e lirë.
Sot shqiptarët nuk kanë vetëm zërin e opozitës.
Sot shqiptarët kanë zërin e 108 partive politike të Internacionales Demokrate të Qendrës.
Kanë zërin e 87 partive politike të Partisë Popullore Europiane.
Kanë zërin e 83 partive politike të Bashkimit Ndërkombëtar Demokrat, të cilat paralajmëruan se Shqipëria nuk zhvillon zgjedhje, por zhvillon farsa elektorale.
Farsa elektorale e 11 majit u paralajmërua botërisht, nga të gjithë ata që i besojnë votës së lirë.
Vetëm në rezolutën e Valencias, ku kanë votuar forcat e qendrës së djathë të mbarë Europës, sanksionohet se Edi Rama po blen vota, dhe është para datës 11 maj, po blen vota me lek, po blen vota me kanabis.
Do merrni ju vesh së shpejti se cili është krimi me kanabis. Shumë shpejt do njiheni me përmasat me krimin me kanabis.
Po blen vota me punësime, po blen vota me prokurorime.
Defakto Valencia i hodhi në kosh zgjedhjet e 11 majit.
Partia Demokratike dhe Aleanca për Shqipërinë Madhështore po përpilon raportin të cilin do të ua paraqesë të gjitha forumeve, institucioneve ndërkombëtare dhe qeverive të vendeve të lira.
Natyrisht fjalën e fundit do ta thonë qytetarët shqiptarë.
Kush është i gatshëm të sakrifikojë për votën e lirë.
Kush mendon dhe beson se, ky vend pa votën e lirë nuk ka të ardhme, duhet të ngrihemi dhe të mos pranojmë kurrë një farsë të tillë të shëmtuar, ku Xhabaftët, Troplinët, Çelët, Bajrët, diktojnë rezultatet e zgjedhjeve.
Anisa Kadesha, RTSH: Ju akuzoni kryeministrin dhe ministrin e Jashtëm se i kanë bërë presion vëzhguesve të huaj për zgjedhjet. A i druheni në këto kushte një ndryshimi të raportit për zgjedhjet nga ai paraprak.
Sali Berisha: Unë kam besim të madh në integritetin e vëzhguesve, profesionalizmin, kompetencën e tyre. Por ato që kam thënë janë absolutisht të vërteta. Janë bërë përpjekje monstruoze për t’u bërë presion shumë të madh pikërisht për asgjë tjetër përveçse për raportin që kanë shkruar.
Janë bërë ndërhyrje në nivelet më të larta me telefona dhe rrugë të ndryshme, por përsëri besimi im është i madh tek ata zyrtarë të mbledhur nga shumë vende, midis tyre edhe parlamentare të tre institucioneve kryesore ndërkombëtare, se Edi Rama nuk do mundet kurrë të diktojë dhe as të ndryshojë raportin e tyre, përkundrazi ne do e pasurojmë atë raport me qindra e qindra dokumente.
Dhe unë kam besim të madh sepse me të vërtetë ka njerëz për ët cilët vota nuk ka rëndësi, por këta janë një pakicë e pakicës së pakicës. Në tërësi në vendet e lira, vota është themel i shtetit ligjor, themel i lirive të njeriut.
