Me vettingun politik krimi dhe qeveria nuk do të jenë të ulur në karrige. Rama nuk e do vetingun politik dhe do të bëjë gjithçka për ta bllokuar

  

• Në bindjen time më të thellë, çlirimi nga sovrani i parlamentit të uzurpuar nga kriminelët dhe hajdutët,  përmes mobilizimit qytetar, është rekursi i vetëm në gjendjen e emergjencës kombëtare, ku shteti ka rënë, ku nuk ka më gjykata dhe prokuroria ka rënë, siç e demonstron qartësisht rasti i Emiliano Shullazit dhe jo vetëm. 

• Është e qartë se në qoftë se Edi Raman vazhdon ta qeverisë Shqipërinë, nuk do të jetë e largët dita kur nuk do të kemi asnjë prokuror që të mund të përballet me banda. Nuk do të kemi asnjë gjyqtar që do të guxojë të gjykojë bandit. Do të vazhdojmë të kemi politikanë të lidhur me banditët në Kuvend dhe Kuvendi do të vazhdojë të bëjë të vetmen gjë që po bën dhe sot: vjedhjen me ligj të shqiptarëve. 

• Duket qartë që Edi Rama nuk e do vetingun politik dhe do të bëjë gjithçka për ta bllokuar atë. Me vettingun politik, asnjë nga krerët aktualë të pushtetit nuk mund të qendrojnë më në karriget që kanë uzurpuar. Emiljano Shullazi, Sajmir Tahiri dhe Edi Rama janë një dhe vetëm një. 

• Suke nisur nga java e ardhshme, do të nisim një konsultim mbarëkombëtar me qytetarët shqiptarë për të marrë vendimin final të opozitës në raport me emergjencën kombëtare ku ndodhet vendi.  

• Pjesë e platformës se opozitës është Ligji Antimafia për shpronësimin, sekuestrimin e pasurive të të gjitha kompanive dhe individëve, oligarkëve që kanë lidhur kontrata korruptive, PPP-je, tenderash dhe koncesionesh me Edi Ramën dhe lukuninë e tij barbare të hajdutëve. 

• Naivëve, të paditurve dhe veglave të Edi Ramës që pyesin përse PD dhe opozita nuk janë sot në Kuvend, iu themi qartë dhe prerë; Teatri nuk është shkaku por pasoja e emergjencës kombëtare. Një parlament i mbushur me shërbëtorë të krimit nuk është vendi për të kërkuar zgjidhje, por është vendi për të marrë fshesën dhe për të pastruar. 

• Nuk do të ketë më asnjë ligj, asnjë reformë, asnjë pakt, asnjë negociatë, asnjë bisedë pa zgjidhur këtë çështje themelore, që është, largimi i politikanëve të lidhur me krimin. 

• Nëse kjo nuk ndodh nëpërmjet shansit të fundit institucionalisht, ligjit për vetingun e politikanëve, atëherë është detyra e qytetarëve shqiptarë që së bashku me ne, opozitën e vendin, t’i japim zgjidhjen që i jep çdo vend i civilizuar kur institucionet, Kushtetuta dhe ligji uzurpohen nga kriminelët, hajdutët dhe politikanët e lidhur me ta.

FJALA E PLOTË E KRYETARIT TË PARTISË DEMOKRATIKE, LULZIM BASHA NË TAKIMIN E JASHTËZAKONSHËM TË OPOZITËS NË VLORË

Të nderuar zonja dhe zotërinj deputetë të opozitës,

Të nderuar kryetarë të partive të koalicionit opozitar. Më lejoni ta nis me një shprehje mirënjohjeje për mikpritësit tanë vlonjatë, të cilët mirëpresin sot tryezën e opozitës së bashkuar në qytetin e Vlorës edhe në emër të tyre t’i uroj mirëseardhjen gjithsecilit prej jush, në këtë tryezë të katërt të vendimeve opozitare në gjendjen e emergjencës kombëtare që po kalon vendi.

Zonja dhe zotërinj, ndërkohë që ne jemi mbledhur në këtë sallë, në sallën e Kuvendit të Shqipërisë një maxhorancë e korruptuar dhe e inkriminuar deri në palcë po ndërmerr një akt të paprecedentë në historinë treqindvjeçare të Europës.

Nuk dua ta shpjegoj nga pikëpamja kushtetuese për të mos i dhënë mundësinë asnjë qytetari të thjeshtë të humbasë në argumenta politike. Por le t’i themi çdo nëne, babai, të riu dhe të reje se çfarë po ngjet, Edi Rama dhe hajdutët dhe kriminelët  e tij në Parlament bashkë me një tufë delesh, u kapën flagrant në vjedhje, në aktin e vjedhjes përmes procedurës së përshpejtuar dhe ligjit të vjedhjes përmes ligjit special “Rama-Fusha” për grabitjen e pronës publike, të Teatrit Kombëtar me qëllim që së bashku me mafien e drogës dhe përfaqësuesit e tyre në industrinë e ndërtimit të ngrinin 7 kulla me një vlerë prej 200 milionë eurosh.

Nga Uashingtoni në Bruksel nuk ka njeri që nuk e kupton më se Edi Rama është një hajdut me damkë, qëllimi i vetëm i të cilit është të mbahet pas karriges për të zhvatur edhe centin e fundit dhe pasurinë e fundit të shqiptarëve. U kapën në një akt vjedhjeje.

Kur një qytetar, cilido qoftë ky kapet në një akt vjedhjeje, çfarë e pret? Çfarë ndodh me të?

Media ka raportuar këto ditë e fundit disa raste vjedhjesh ordinere dhe se çfarë ka ngjarë me këta qytetarë, njëri prej tyre kryefamiljar, pikërisht këtu në zonën e jugut arrestohet, ndiqet penalisht dhe çohet në burg.

Kur Edi Rama dhe delet e tij në Kuvendin e Shqipërisë kapen në një akt vjedhjeje rikthehen aty dhe përpiqen ta ridekorojnë vjedhjen me një ligj fasadë si ai që duan ta kalojnë sot.

Nuk ka pra për Edi Ramën dhe hajdutët e tij ligj njësoj si për qytetarët e thjeshtë që kapen duke kryer një vepër penale. Përkundrazi sot nga Kuvendi i Shqipërisë, nga salla e Kuvendit të Shqipërisë këta hajdutë të babëzitur do të votojnë përsëri të njëjtin ligj, me një zbukurim, me një falsitet që e shtyn 30 ditë aktin e konsumimit të vjedhjes.

Nuk ka rëndësi nëse Fusha kësaj radhe do të quhet kodër, mal apo breg, Edi Rama është i vendosur t’i shkojë deri në fund vjedhjes, grabitjes me ligj.

Vjedhja është e dënueshme kudo.

Çfarë ndodh në një vend ku vidhet me ligj?

Kjo është pyetja së cilës duhet t’i japim përgjigje së bashku me qytetarët shqiptarë.

Çfarë duhet të bëjmë me hajdutët që vjedhin me ligj?

Çfarë duhet të bëjmë me ata që kanë uzurpuar karriget e Kuvendit të Shqipërisë, jo për t’u shërbyer njerëzve por për t’i vjedhur me ligj; për t’iu marrë edhe qindarkën e fundit, pasi iu kanë hequr ndihmën ekonomike dhjetëra mijëra familjeve, pasi kanë ngritur çmimin e karburantit në qiell më të lartat në Europë, pasi kanë ngritur çmimin e energjisë elektrike, pasi kanë ngritur çmimin e ujit, pasi kanë rritur taksat për të gjithë në përjashtim për bixhozin kur janë vetë aksionerë.

Tani ka filluar grabitje me ligj e pronave të shqiptarëve.

Cila është Policia që duhet të arrestojë ligjvënësit që vjedhin me ligj? Para cilës drejtësi do të paraqiten ata?

Policia është një shtojcë e organizatave kriminale, siç tregon gjendja në Vlorë, në Shkodër e në gjithë Shqipërinë.

Drejtësia, e tregon rasti i Emiliano Shullazit, se ku e katandisi Edi Rama me një grusht shërbëtorësh të korruptuar dhe të blerë me paratë e drogës shqip-folës apo jo.

Keni parë se çfarë ka ndodhur dje në gjyqin e Emiliano Shullazit? Bllokuar prej tre muajsh, që nga qershori. Dje e gjithë trupa e prokurorëve ka refuzuar duke u larguar nga mbledhja, farsën e organizuar nga kamikazja, ushtarja e Edi Ramës dhe Fatmir Xhafës në Prokurorinë e Krimeve të Rënda, Donika Prela, për gjoja një short të ri, për të caktuar prokurorë të rinj të çështjes.

Sot gjyqi ndaj kryebanditit Shullazi është pa prokuror.

Nuk ka prokuror për të gjykuar banditët.

Kjo është vepra e Edi Ramës me reformën në drejtësi. Nga një instrument i drejtësisë është kthyer në një instrument të politikanëve të lidhur me krimin.

Sepse Emiliano Shullazi, Sajmir Tahiri dhe Edi Rama janë një dhe vetëm një.

Ky është shërbimi i Edi Ramës ndaj Emiliano Shullazit dhe dhjetëra shullazëve të tjerë brenda në qeli, që po lirohen nga qelitë, apo që mbeten në liri.

Drejtësia në kolaps, shteti në kolaps. Pa Gjykatë Kushtetuese, pa Gjykatë të Lartë, pa prokuror, që ndjekin çështje të mprehta të kriminalitetit, nuk mund të jetë zgjidhja për vjedhjen me ligj që votohet sot në Kuvendin e Shqipërisë.

Ne ndodhemi në një emergjencë kombëtare ku nuk ka më shtet, ku shteti ka rënë, ku nuk ka më gjykata, nuk ka gjykata dhe prokuroria ka rënë, siç e demonstron qartësisht rasti i Emiliano Shullazit dhe jo vetëm.

Ne jemi në një shtet ku policia dhunon qytetarët, për të mbrojtur oligarkët, siç ndodhi para dy ditësh në Jalë me kryebanditin Meta i cili mbron pronat e oligarkut Alban Xhillari dhe shkatërron shtëpitë e qytetarëve të pafajshëm dhe pastaj kërcënon opozitarët që janë në

krahë të qytetarëve në misionin e tyre.

Cili është roli i opozitës parlamentare dhe i koalicionit opozitar?

Çfarë mund të bëjmë ne, duke u rikthyer në Kuvendin e Shqipërisë në këto kushte? Së pari, fasadën e krimit e të kriminelëve që ndodhen aty; nga Taulant Balla tek Jurges Çyrbja, te fatmir Xhafa e te Edi Rama. A është kjo mënyra për t’u shërbyer qytetarëve shqiptarë dhe interesit të tyre, demokracisë dhe shtetit ligjor? Cili është roli i qytetarëve, kur parlamentin e kanë marrë peng një tufë banditësh, kriminelësh dhe hajdutësh? Në bindjen time më të thellë, çlirimi i parlamentit nga sovrani, çlirimi i parlamentit të uzurpuar nga kriminelët dhe hajdutët, përmes mobilizimit qytetar, përmes mobilizimit të sovranit, është rekursi i vetëm në gjendjen e emergjencës kombëtare ku ndodhemi sot.

Kjo emergjencë kombëtare merr shprehje në iniciaticën tonë për vettingun politik, që është mënyra kushtetuese dhe ligjore për të larguar politikanët e lidhur me mafian, nga karriget e parlementit, nga karriget e ministrave dhe të kryeministrit, nga karriget e kryebashkiakëve dhe të institucioneve të tjera të vendit. Duket qartë që Edi Rama nuk e do vetingun politik dhe do të bëjë gjithçka për ta bllokuar atë. Arsyet janë të qarta. Me vettingun politik, asnjë nga krerët aktualë të pushtetit nuk mund të qendrojnë më në karriget që kanë uzurpuar. Sekreti i tyre nuk është as vizioni, as plani, as oferta, as alternativa, as zgjidhjet për shqiptarët. Sekreti i tyre është marrëdhënia me krimin. Në momentin që humbasin krimin, ata humbasin pushtetin. Kjo është arsyeja pse refuzojnë vettingun politik.

Emergjenca kombëtare kurrkund tjetër nuk merr shprehje kaq të dhimbshme e të përgjakur sa në qytetin e Vlorës. Këtu në Vlorë vetëm në 12 muajt e fundit ka një bilanc lufte, i cili i atribuohet drejtpërdrejtë klaneve kriminale “Habilaj”, “Xhafaj” dhe kriminelëve të tjerë që e kanë kthyer Vlorën në çifligun e tyre, ku dhunojnë, vrasin, presin dhe ushtrojnë terror mbi qytetarët, pa ju hyrë gjemb në këmbë nga policia e bërë njësh me krimin.

Prishja e pazareve të drogës, përplasja midis banditëve kanë shkaktuar 6 të vdekur dhe 11 të plagosur midis të cilëve edhe një fëmijë 8-vjeçar. 5 makina janë djegur apo janë hedhur në erë, shkrumbuar, 15 ngjarje kriminale të rënda janë regjistruar në një periudhë fare të shkurtër kohore, duke nisur me tritolin e vendosur në makinën e Flamur Lamajt, duke vazhduar me vrasjen e parë, të regjistruar me 9 shkurt, ku Klodian Pashaj dyshohet se vrau Aldrin Lulushin, me 10 prill këtu në zonën e Skelës kemi ekzekutimin me 15 plumba të Elidon Mehmetit, akoma e pazbardhur; 10 ditë më pas kemi Ergys Gjoveshajn të vrarë dhe 4 persona të tjerë të plagosur, në një local këtu në këtë qytet, me autorin e krimit të identifikuar si Aranit Kondin. Më 24 maj në zemër të Vlorës, vrasja e dyfishtë e biznesmenit Ervin Hyseni dhe drejtorit rajonal të OSHEE-së Taulant Saliui. Më 26 qershor vrasja e Fatjon Sinanajt, dhe pak më vonë, eksplozivi në automjetin e Elton ismailajt. 33 ditë më vonë kemi vrasjen e Renato Ymerit në Lungomare, në kulmin e mbipopullimit të asaj zone nga qytetarët. Më 1 tetor kemi atentatin ndaj Ferdinand Llanajt dhe birit të tij 8-vjeçar si dhe Dritan Begajt. Me 21 nëntor, djegia e makinës së Zihni Zenelajt, inspector i policisë. Më 27 nëntor, eksplozivi shpërthyer që plagosi 25 vjeçarin ines Hajrullai, me 500 gr. eksploziv; me 16 dhjetor, eksploziv poshtë makinës së Endrit Sabadinajt… Kjo është kronika e përmbledhur e krimit që sundon qytetin, ku i pari i listës së “Rilindjes” kriminale është vetë kryeministri, i ndjekur nga i vetmi ministër i brendshëm në Europë, që e ka vëllain të dënuar për trafik droge, i cili ishte, siç u ekspozua nga media, baroni i drogës në Vlorë.

Jo vetëm kaq, Vlora është qyteti rekord i personave të zhdukur pa lënë gjurmë. Adriano Jaho 52 vjeç, Harisel Maze, 28 vjeç, të zhdukur prej datës 3 korrik, Ksandro Ymeraj, 32 vjeç, Albano Ymeraj 26 vjeç,  Albano Xhaferri dhe Ervis Troçe… Në tërësi, sipas të dhënave që mbahen sekret nga policia e korruptuar e Fatmir Xhafës, 18 persona të zhdukur pa lënë gjurmë. Trefish i personave të zhdukur në çdo qark tjetër, të marrë së bashku, në të gjithë territorin e Shqipërisë.

Ky bilanc kriminal është kaq i rënduar në Vlorë për dy arsye të thjeshta. Edi Rama, kryedeputet i Vlorës ia dorëzoi kontrollin e këtij qyteti dhe këtij qarku Saimir Tahirit dhe pas komprometimit të tij të plotë, përmes hetimeve të antimafias italiane Fatmir Xhafës. Por të gjithë e dimë, se nëqoftëse i pari e bënte drogën me kushërinj, i dyti e bën drogën me vëllain e tij. i dyti nuk mjaftohet me drogën, ai u ka dhënë carta bianka bash të dënuarve të vëllait të tij, të zotërojnë dhe të kapin 1/3 e lojërave të fatit anembanë Shqipërisë, industrinë e bixhozit, me anë të të cilit pastrohen paratë e pista të krimit.

Ndërkohë, ekonomia e Vlorës është në kolaps total. Papunësia është në nivele rekord. Numri i të rinjve vlonjatë që largohen nga qyteti i tyre dhe nga vendi është konkurrues me numrin e të rinjve të një tjetër qyteti fqinj, atij të Fierit.

Krimi i organizuar, në bashkëpunim me Edi Ramën, e ka shndërruar Vlorën në një zonë lufte të vërtetë. Lufte për kontroll dhe treg midis bandave kriminale, ku viktimat janë qytetarët e pafajshëm, janë prindërit dhe fëmijët e tyre, janë biznesmenët e ndershëm, është ekonomia e këtij qyteti, është e ardhmja e këtij qyteti, i cili ka një vend të veçantë për krenarinë historike dhe tipike, dhe që sot është kokëulur dhe kokëpërdhe. i heshtur, i trembur, i terrorizuar.

Ndaj jemi sot këtu, për të çjerrë maskën e takimeve fallco dhe fasadë që Edi Rama mban me kukullat dhe vartësit e tij, për të treguar këtu nga Vlora të vërtetën tronditëse të një qyteti e komunteti të tërë të marrë peng nga krimi, për arsyen e thjeshtë dhe të vetme: Sepse kryeministri është peng i krimit.

Por Vlora nuk mund të rrijë peng i krimit!

Shqipëria nuk mund të rrijë peng i krimit!

Fatura që ne po paguajmë për këtë është tepër e lartë, me jetë njerëzore, me pasiguri, me papunësi, në varfëri dhe siç u bë e qartë dje nga Tirana, në bllokimin total të përparimit të mëtejshëm të Shqipërisë drejt integrimit europian. Asnjë vend në Europë nuk do dhe nuk mund të votojë për hapjen e negociatave të një vendi që drejtohet nga një kryeministër me lidhje kriminale, ku ligjin e bëjnë shokët dhe miqtë e banditëve nga Taulant Balla te Jurgis Çyrbja me shokë. Ku zbatimi i ligjit dhe ndëshkimi i kriminelëve i besohet një ministri të brendshëm të bërë njish me krimin, siç është Fatmir Xhafa.

Këtij kolapsi, që është prodhimi i vetëm i kësaj bashkëqeverisje të Edi Ramës me krimin, i shtohet edhe kolapsi në drejtësi. Kapja e qeverisë nga krimi i organizuar, dorëzimi i territorit dhe ekonomisë tek krimi i organizuar, është vetëm njëra pjesë e degradimit dhe emergjencës Kombëtare ku e ka future Edi Rama, Shipërinë.

Ndërkohë, ka nisur dhe po përparon ekzekutimi i pjesës së dytë të skenarit mafioz: Asgjesimit të sistemit të drejtësisë. Përveç rastit të Emiljano Shullazit, i cili tregon qartë se sot nuk kemi më prokurorë të gatshëm për të ndjekur penalisht krimin e organizuar, rasti tjetër që tregon fare qartë këtë kolaps, është ai i Ardian Dvoranit. Dështimi i procesit të vettingut simbolizohet me rastin e Ardian Dvoranit. Komisioneri publik, për turpin dhe faqen e zezë të tij, nuk e ankimoi vendimin për të mbajtur në sistemin e drejtësisë, gjyqtarin e korruptuar Ardian Dvorani, praktikisht ushtarin e Edi Ramës në Gjykatën e Lartë dhe kandidatin e tij për të uzurpuar Gjykatën Kushtetuese.

Konfirmimi në detyrë i Ardian Dvoranit, është prova e qartë e korruptimit të procesit të vettingut për shërbëtorët e qeverisë dhe për hesap të Edi Ramës, Saimir Tahirit, Fatmir Xhafës, Agron Xhafës, Olsi Ramës dhe bandave të tjera kriminale në Shqipëri.

Është e qartë dhe përtej çdo dyshimi, se Ardian Dvorani, me zbatimin e të njëjtit standard siç është zbatuar për një numër të madh gjyqtarësh dhe prokurorësh të tjerë, duhet të ishte larguar. Organet e vettingut kanë fshehur dhuratën prej 17 milionë lekësh që Albtelekomi i ka bërë në vitin 2013-të, Ardian Dvoranit. Kjo ishte pjesa e mbetur e këstit të papaguar për shtëpinë që Albtelekomi i bleu Dvoranit, në kohën kur ishte pjesë e bordit të kompanisë shtetërore. Organet e vettingut mbyllën sytë para faktit të fshehjes së rreth 100 milionë lekëve që Ardian Dvorani nuk i ka deklaruar në deklaratën e tij të pasurisë.

Organet e vettingut, me porosi të Fatmir Xhafajt, nuk e hetuan lidhjen e ngushtë që Ardian Dvorani ka me familjen mafioze Xhafaj dhe anëtarët e tjerët të grupit të strukturuar kriminal Xhafaj, të dënuar me vendim të formës së prerë nga gjykatat italiane.

Organet e vettingut injoruan faktin se Ardian Dvorani, pre katër vitesh shkel Kushtetutën duke qëndruar në detyrë përtej mandatit të tij, në kundërshtim me vendimin e Gjykatës Kushtetuese vetëm për të shërbyer si vegla e Edi ramës në Gjykatën e Lartë.

Organet e vettingut dështuan të hetojnë ankesat për veprimtari korruptive dhe konflikt interesi në çështje gjyqësore. Organet e vettingut shpërfillën faktin se Ardian Dvorani është prokurori i diktaturës që në vitin 1991, ka kërkuar dënimin me 15 vjet të rinjve të Shkodrës pas rrëzimit të bustit të Enver Hoxhës.

Me këtë akt organet e vettingut dhe Komisioneri Publik, kanë vulosur, jo vetëm para opozitës, por para të gjithë shqiptarëve mungesën totale të integritetit të tyre dhe kanë shkatërruar besimin e publikut tek integriteti i procesit të vettingut.

Vetë vettingu, pas mbajtjes në detyrë të Ardian Dvoranit, është vërtetuar si një proces me standarte të dyfishta, ku ka dy palë të korruptuara: të korruptuarit që largohen dhe të korruptuarit më të barabartë së të korruptuarit që largohen, por që mbahen për ti shërbyer Edi Ramës.

Kapja e qeverisë nga krimi i organizuar, kapja e shtetit nga krimi i organizuar, diktoi edhe kapjen e vettingut nga qeveria, pra, kapjen e vettingut nga krimi i organizuar.

Sot procesi i vettingut është i diskretituar para shqiptarëve dhe çdokush që analizon faktet, këto standarde të dyfishta dhe mbajtjen në detyrë të Ardian Dvoranit dhe të paktën dhjetë magjistratëve të tjerë të kapur flagrant duke liruar vrasësit e policëve, duke tjetërsuar pronat e qytetarëve, duke mos justifikuar pasurinë e tyre, nuk bëjnë gjë tjetër veçse zbulohet para shqiptarëve si një armik i drejtësisë së pavarur dhe institucioneve të pavarura të drejtësisë.

Zonja dhe zotërinj!

Është e qartë se nëqoftëse Edi Raman vazhdon ta qeverisë Shqipërinë, nuk do të jetë e largët dita kur nuk do të kemi asnjë prokuror që të mund të përballet me banda. Nuk do të kemi asnjë gjyqtar që do të guxojë të gjykojë bandit. Do të vazhdojmë të kemi politikanë të lidhur me banditët në Kuvend dhe Kuvendi do të vazhdojë të bëjë të vetmen gjë që po bën dhe sot: vjedhjen me ligj të shqiptarëve.

Në kushtet e kësaj emergjence kombëtare, propozimi ynë për vettingun politik, propozimi që do diskutohet sot për ndryshimet në ligjin Antimafia, që do të sekuestrojnë pasuritë e çdo individi që merr pjesë në koncesione, PPP dhe tendera publikë korruptivë dhe që nuk arrin të justifikojë veprimtarinë korruptive në bashkëpunim me entet qeveritare, si dhe shpalosja e platformës për zgjedhje të lira e të ndershme dhe platormës për të shpëtuar reformën në drejtësi nga kapja politike, janë në rendin e ditës.

Ne do të konkludojmë sot me opozitën e bashkuar, për të katër këto çështje themelore dhe duke nisur nga java e ardhshme, do të nisim një konsultim mbarëkombëtar me qytetarët shqiptarë për të marrë vendimin final të opozitës në raport me emergjencën kombëtare ku ndodhet vendi.

Duke qenë që mediat e kapura nga Edi Rama kanë vendosur të shkëpusin sinjalin… po bëjmë një pauzë, presim derisa të rilidhemi përsëri në lidhje direkte me ta.     

(Ndërpreje e transmetimit në media)

Falenderoj edhe një herë ato media që janë rikthyer me transmetimin e drejtpërdrejt të mbledhjes së jashtëzakonshme të opozitës nga qyteti i Vlorës.

Sikundër i bëj thirrje disa mediave që vazhdojnë të bëjnë fasadën e qeverisë, ta ndërpresin lidhjen me Arta Markun se Arta Marku po të ishte prokurore, sot duhej të arrestonte të paktën një duzinë prej atyre prej të cilëve po u flet.

Po Arta Marku është shërbëtore e Edi Ramës dhe jo Prokurore e Republikës.

Kështu që vendosni të vazhdoni të transmetoni shërbëtorët e qeverisë e kuptoni vetë se çfarë ju bën ju të nderuar pronarë dhe kryeredaktorë të medias, një akt i tillë.

Pra, falënderoj edhe një herë të gjitha mediat që janë rikthyer online në këtë  takim.

Nuk ka asnjë kuptim t’i jepni shqiptarëve iluzionin, se në Kuvend po ndodh diçka tjetër, përveç vjedhjes.

Në fakt, prania e kryeprokurores kukull të Edi Ramës në Kuvendin e Shqipërisë, është çertifikata e vjedhjes.

I vetmi rol dhe i vetmi justifikim për praninë e Prokurorit të Përgjithshëm të Republikës në Kuvendin e Shqipërisë, sot do të ishte nqse do të kishte shkuar me pranga dhe të tërhiqte zvarrë një duzinë hajdutësh dhe politikanësh të korruptuar dhe të lidhur me krimin në atë sallë, të cilët bashkë me pjesën tjetër të rilindësve dele, po përgatiten të konsumojnë edhe një herë aktin e vjedhjes me ligj.

Ç’kuptim ka  të raportojmë statistika, se sa vjedhës qepësh dhe preshësh paska kapur policia dhe paska ndjekur prokuroria, kur mazhorannca po vjedh dhe është kapur me presh në duar madje edhe në prani të kamikazes së tyre në Prokurorinë e Përgjithshme, dhe asgjë nuk i hyn në këmbë.

Ky është një teatër i shëmtuar, i cili duhet të marrë fund një orë e më parë.

Opozita, Partia Demokratike, aleatët tanë, të gjithë ne i kemi ndëgjuar thirrjet e qytetarëve.

Edhe thirrjet e artistëve me të cilët pata dje një takim të gjatë, për të ndarë një shqetësim të gjatë, të tyrin, jo vetëm të tyrin për aktin kriminal që konsumohet sot në Kuvendin e Shqipërisë.

I kemi dëgjuar po kështu thirrjet e intelektualëve publikë për t’i dhënë fund teatrit, fasadës së demokracisë, duke marrë së bashku me qytetarët fatin tonë dhe duke u kërkuar qytetarëve të hedhin të vetmin hap që ka mbetur në një demokraci të kapur, në një shtet ligjor të shkatërruar, pa institucione, ku ligjin e bëjnë kriminelët.

Ku territorin dhe ekonominë e kontrollojnë kriminelët, ku kryeministri është peng i kriminelëve, dhe ka marrë pend drejtësinë.

Zgjidhjet tona për lidhjet e krimit me politikën i keni të qarta të dashur qytetarë, me apo pa delet e rilindjes dhe kriminelët e rilindjes, dita do të vijë kur me votën tuaj, jne do ta bëjmë vetingun politik realitet.

Asnjë politikan i lidhur me krimin nuk do të ulet më në institucionet e vendit.

Sot në nga kjo tryezë do të diskutojmë propozimine dytë.

Shpronësimin, sekuestrimin e pasurive të të gjitha kompanive dhe individëve, oligarkëve që kanë lidhur kontrata korruptive, PPP-je, tenderash dhe koncesionesh, me Edi Ramën dhe lukuninë e tij barbare të hajdutëve.

Sot po kështu do t’i japim formë përfundimtare platformës sonë për ta shpëtuar drejtësinë nga kapja politike dhe për t’i dhënë vendit zgjedhje të lira dhe të ndershme.

Këto katër shtylla të platformës sonë, këto katër shtylla për t’u ringritur nga emergjenca kombëtare ku e ka futur vendin bashkëqeverisja e Edi Ramës me krimin, prej ditës së nesërme, do t’i nënshtrohen një konsultimi të drejtpërdrejt me ju, të dashur qytetarë.

Dhe me ju do të marrim vendimin final për t’i dhënë përgjigjen e merituar shtetit të kapur nga krimi, për të çliruar institucionet e kapura nga krimi, duke filluar me çlirimin e Kuvendit.

Naivëve, të paditurve por edhe kaçurreleve të Edi Ramës që pyesin përse PD dhe opozita nuk janë sot në Kuvend, iu themi qartë dhe prerë; Teatri nuk është shkaku por pasoja e emergjencës kombëtare.

Një parlament i mbushur me kriminelë, me politikanë që bashkëpunojnë haptazi me krimin, e pranojnë këtë pa iu dridhur syri dhe nuk u hyn asnjë gjemb në këmbë, nuk është vendi për të kërkuar zgjidhje, por është vendi për të marrë fshesën dhe për të pastruar.

Nuk do të ketë më asnjë ligj, asnjë reformë, asnjë pakt, asnjë negociatë, asnjë bisedë pa zgjidhur këtë çështje themelore, që është, largimi i politikanëve të lidhur me krimin.

Nëse kjo nuk ndodh nëpërmjet shansit të fundit institucionalisht, ligjit për vetingun e politikanëve, atëherë është detyra e qytetarëve shqiptarë që së bashku me ne, opozitën e vendin, t’i japim zgjidhjen që i jep çdo vend i civilizuar kur institucionet, Kushtetuta dhe ligji uzurpohen nga kriminelët, hajdutët dhe politikanët e lidhur me ta.

Procesi i konsultimit me qytetarët do të nisë pa vonesë.

Ne shkojmë tek ta, jo thjesht me konstatimin e problemeve të rënduara që çdokush i di se i ka provuar në tavolinën e vetë, në xhapat e vetë, në kurrizin e vetë, në papunësi, në gjendjen e arsimit, të shëndetësisë, në mbylljen e bizneseve, në varfëri, në dëshpërim, në mungesën totale të shërbimit dhe përkujdesjes shtetërore, po ne vijmë për të konsultuar zgjidhjet dhe së bashku t;i kthejmë këto zgjidhje në realitet.

Rruga që na pret është e vështirë.

Sfida që do të kalojmë është prova e zjarrit.

Në një vend ku qytetarët e bashkuar vendosin të marrin fatin e tyre në duart e tyre dhe të zbëjnë kriminelët dhe hajdutët nga institucionet e shtetit, është një vend ku kultura demokratike është e konsoliduar dhe një paralajmërim i qartë për pushtetarët e sotëm dhe pushtetarët e nesërm se çfarë i pret nëse dhunojnë Kushtetutën, kapin institucionet dhe vihen në shërbim të krimit për interesat e pasurimit dhe të pushtetit të tyre.

E kundërta është shenjë e qartë se nuk ka më një demokraci, por një diktaturë, një tirani.

Tashmë jo një tirani ideologjike, por një tirani të krimit.

Kam bindjen e thellë se bashkimi qytetar nga Vlora në Shkodër, nga Durrësi në Korçë, duke kulmuar në Tiranë, do t’i provojë të gjithë shqiptarëve dhe botës mbarë se koha kur një tufë banditësh dhe hajdutësh marrin peng Shqipërinë dhe të ardhmen e saj, do të marrë fund shumë shpejt.

Do të nisim pa vonesë diskutimin e platformës, por më lejoni edhe në emrin tuaj, t’i uroj mirëseardhjen kryetarin e Partisë për Drejtësisë Integrim dhe Unitet, z. Shpëtim Idrizi.