EKSTRAKT
Kryetari i PD, Prof. Dr. Sali Berisha gjatë konferencës për shtyp të mbajtur ditën e sotme se, prokurorët e SKAP-it, Arben Kraja dhe Dritan Premçi u shndërruan në mburojë të Erion Veliajt në konflikt flagrant interesi.
Në konferencën me gazetarët, së bashku me anëtarin e Kryesisë së PD, Belind Këlliçi, Kryetari i PD, Sali Berisha tha se, kjo amnisti që SPAK po i bën vjedhjes së shekullit është akti më kriminal, ku përbën një akt cinik dhe dhunim të ligjit, ku për një vjedhje e cila sot është 130 milionë euro, dhe që në kontratë shkon 1 miliardë euro, pasi hetohet përë vite me radhë arrestohen si përgjegjës për bashkinë e Tiranës dy drejtorë.
Berisha tha se, Veliaj do të vjedhë edhe 12 milionë euro me inceneratorin, dhe shprehu mirënjohje për punonjësit e administratës të cilët ndihmuan me dokumentet. Kryedemokrati tha se, çdo informacion rreth tyre do të qëndrojë i sigurt.
Berisha me tej shtoi se, pasi u shndërruan në mburojë të Erion Veliajt, Arben Kraja, u kujtua të lajë duart me dosjen dy javë para se dosja të shkonte në gjykatë. Kraja e bëri këtë se mori 1 milionë, apo se kishte nipin dhe mbesën në sqetullat e Erion Veliajt. Kurse Dritan Prençi ishte i lidhur këmbë e krye me Zoton, por njëkohësisht i lidhur me famëziun McGonigal, pra me grupin e strukturuar kriminal Rama-McGonigal-Neza dhe Duçka.
Kryetari i PD, Sali Berisha tha në konferencën për shtyp se, kreu i SPAK, Dumani është një majtist i pakorrigjueshëm. Berisha tha se, vetë SKAP-i është i kapur nga McGonigal dhe bashkë vunë gjobat.
FJALA E PLOTË
Mirëdita!
Edhe njëherë, asgjë nuk do të ndalojë dot, nuk do të ndërpresë dot vullnetin e hekurt, vendosmërinë e PD për të denoncuar para mediave dhe shqiptarëve amnistinë e shekullit që SKAP-i i partisë i ka bërë vjedhjes së shekullit me firmëtarë kryesorë Edi Ramën, Engjëll Agaçin, Erion Veliajn, Artur Metanin, Gjiknur dhe kompani.
Nuk ka akt më kriminal pas vjedhjes së shekullit se sa amnistia e shekullit. Kjo përbën aktin më cinik, dhunën më të egër ligjore, shkelmimin më të rëndë të parimit të së drejtës kur për një vjedhje e cila gjer më sot është 130 milionë euro, dhe që në kontratë shkon 1 miliardë euro, pasi hetohet vite e stër-vite arrestohen si përgjegjës për bashkinë e Tiranës dy drejtorë të cilët ju them unë ju në çdo të drejtë po t’i gjykosh janë gjysmë fajtorë gjysmë pa faj.
Janë fajtorë nuk ka diskutim, sepse kanë votuar në komisionin e dhënies me partneritet publik privat të 8 pikëve për kompaninë fantazmë që nuk ekziston, dhe ka një parim universal, kurrë të mos zbatosh diçka të paligjshme.
Ata kanë firmosur, po thashë gjysmë për gjysmë se ata kanë një meritë, se publikisht kanë kundërshtuar, kanë denoncuar pamundësinë e Bashkisë së Tiranë spër të financuar vjedhjen e shekullit, inceneratorin e Tiranës. Gjë të cilën, bosi i tyre Erion Veliaj e ka marrë përsipër më firmë dhe me vulën e tij.
Sot, në këtë kuadër jemi për të denoncuar një akt tjetër skandaloz në vjedhjen e shekullit. Në një kohë kur Edi Rama për sipërmarrjen e tij me qeverinë e tij organizatë kriminale, vendos në buxhetin e votuar për 5 minuta 12 milionë euro për djegësin e Tiranës, Erion Veliaj vendos shumë tjetër për të mbushur xhepat në buxhetin e bashkisë dhe për këtë, z.Belind Këlliçi i cili de facto me dokumente të pakundërshtueshme po i bën gjyqin publik Edi Ramës, Erion Veliajt dhe të gjithë eksponentëve kryesorë të vjedhjes së shekullit, po i bën gjyqin publik Arben Krajës, këtij ish-xhelati të policisë sekrete shqiptare dhe prokurorit të lidhur këmbë e kokë me Zoton por dhe me McGonigal, Dritan Prençi, të cilët janë autorët e amnistisë së Erion Veliajt.
Që të dy në konfliktin më flagrant të interesit, pasi u shndërruan në mburojë të Erion Veliajt për vite e vite, ish-xhelati, oficer i Sigurimit të Shtetit Arben Kraja, u kujtua të lajë duart me dosjen, me mburojën që kishte bërë dy javë para se dosja të shkonte në gjykatë.
Dhe Kraja e bëri këtë se mori 1 milionë, apo e bëri këtë se kishte nipin dhe mbesën në sqetullat e Erion Veliajt, atë unë nuk mund ta them.
Kurse Dritan Prençi ishte i lidhur këmbë e krye me Zoton, por njëkohësisht i lidhur me famëziun McGonigal, pra me grupin e strukturuar kriminal Rama-McGonigal-Neza dhe Duçka.
Sot, z. Këlliçi sjell fakt tronditës. I ka kapur në flagrancë me vjedhjen e fundit në djegësin e Tiranës.
Një moment ju lutem, shfrytëzoj rastin për të falënderuar me mirënjohje të gjithë ata punonjës të administratës të cilët na ndihmuan të ishim sot të saktë para jush. Sepse siç e shihni, gjë më ‘bizarre’ se kjo, kjo do të thotë se nuk na mjaftoi vjedhja prej 12 milionë, por duhet të vjedhim 24 milionë. Dhe i garantoj ata punonjës të përgjegjshëm se burimi ruhet dhe do ruhet në mënyrë absolute në çdo rast, por kjo që ju patë dhe dëgjuat kur u lexua, sigurisht nuk mund të dilej dhe paraqitej para jush pa bërë verifikim të plotë, sepse del jashtë çdolloj imagjinate.
Pra, qeveria jep, dhe ai është ligj parlamentar, 12 milionë, dhe në kontratë dhe çdo gjë ky është fondi që duhet paguar, që s’duhej paguar asnjë qindarkë, por SKAP-i është i kapur dhe nga ana tjetër Erion Veliaj tani do të vjedhë 12 milionë të tjera. Kjo është gjë e paimagjinueshme. Po është e imagjinueshme sigurisht, kur mburojë e patundur e vjedhjes qeveritare qendron SKAP-i i partisë.
Ndaj edhe të dashur qytetarë, ne i sjellim këto para jush në mënyrë që ju të bëheni prokuri publik i këtyre vjedhjeve të tmerrshme në bashkëpunim qeveri-bashki-SKAP.
Ermal Rizai, SYRI TV: Sa i takon çështje për inceneratorin e Tiranës, Dumani në një takim informal me gazetarët ka deklaruar se; Çështja e inceneratorit të Tiranës është në fazë hetimesh paraprake që vazhdojnë në drejtim të çdo faktori që mund të kenë kryer veprime penale, apo persona të tjerë që kanë patur në duar vendimmarrje. Hetimet po bëhen në kuadër të të njëjtit procedim, jo me fraksion (pyetje: edhe ndaj Veliajt). Do sqarohet pozita e secilit, çdo veprim po verifikohet. Si e shikoni ju këtë deklaratë të tij. Ndërsa një pyetje për dokumentet; herë pas here ju keni deklaruar se punonjësit e administratës nuk firmosin se kanë frikë. Si është situata të administratë.
Sali Berisha: Fakti që janë disa duar në inceneratorin e Tiranës është përgënjeshtrimi më i mirë që i bëhet deklaratës së zotit Dumani. Por fakti që vetë zoti Dumani ka pasur një çështje të veçantë, e përgënjeshtron zotërinë e tij. Dhe ky copëzim është identik me copëzimin e loteve, e rrugëve në lote të panumërta. Mos harroni kurrë dy praktika, Edi Rama jepte leje ndërtimi, nëse pallati ishte me katër shkallë, ai jepte një leje për dy hyrjet dhe një leje tjetër për dy hyrjet dhe po të ishte me gjashtë edhe një leje për dy hyrjet e tjera, në mënyrë që të vidhte sa më shumë gjoba 20-përqindëshe. Kjo është e njohur. Nga rrugët, këtë praktikë ndjek Skapi me dosjen. Skapi e merr dosjen, e thërrmon, njërën ia jep Prençit dhe Krajës, tjetrën Dumanit dhe Millonait, të tretën këtij dhe atij dhe kjo është absolutisht praktika se si të gjobiten më rëndë. Në praktikën e Edi Ramës, flas. Arsyeja pse e bëjnë këtë është se këta nuk guxojnë kurrë që qeverinë e partisë së tyre- se unë ju kam thënë që ky Dumani është një majtist i pakorrigjueshëm- pra ky nuk mund të pranojë që qeveria e partisë së tij të shpallet organizatë kriminale. Se nëse e merr në zhvillim ose në tërësi çështjen e inceneratorëve, për çdo njeri normal, kryetar ka Edi Ramën, zëvendëslejtnant ka Engjëll Agaçin që ka marrë pushtetin që nuk i takon, ka pastaj ministra, Erion Veliajn fill pas Ramës dhe me radhë. Mirëpo kjo nuk mund të ndodhë. Partia e Rilindjes nuk mund të jetë organizatë kriminale, ndaj dhe e copëzojnë. Por ky është sistem gjobitjesh në rrugë. Këtu, po të merrni ju Beqajn dhe Erion Veliajn, kush është më rëndë, është Erioni, se të paktën Beqaj doli në gjykatë. Dhe përsëri çfarë besimi kanë skapistët? Formuluan amnistinë e dytë për Beqajn. Pra, Skapi është një institucion politik, zhvatës, gjobëvënës, një instrument që përdoret për ambiciet politike të Edi Ramës. Ndryshe nuk ka njeri që mund të kuptojë talljen e tmerrshme me amnistinë e dytë të Ilir Beqajt. Pra, asgjë nuk qëndron, fakti është amnistia. Fakti është se është e pakonceptueshme të arrestosh Tushën dhe Simixhiun që u ka ndenjur kushërira si xhelat për të firmosur, siç thonë, e të tjera me radhë.
-Edhe një pyetje tjetër sa i takon deklaratave të Dumanit. Ai ka thënë se po kryhen hetime edhe për çështjen McGonigal. Mendoni se do të ketë zhvillime në lidhje me këtë çështje, meqë edhe ju e keni denoncuar fuqimisht këtë çështje.
Sali Berisha: Vetë Skapi është i kapur nga McGonigal. McGonigal ka disa aspekte. Po marrim aspektin e parë. Tradhti e lartë ndaj SHBA si i rekrutuar nga shërbimet ruse. Nuk faktohet, siç thonë deri më tani, por edhe për mua, edhe po të faktohej, nuk është kjo më e rënda. Është një akt tradhtie, në botën e spiunazhit nuk është gjë e jashtëzakonshme. Por McGonigal, aspektin më të zi nuk e ka se është marrë me dosjen e Sali Berishës. Jo! Është ideologjikisht i motivuar kundër parimeve të Berishës dhe e lufton. Ajo që është më e zeza, më kriminalja, më e turpshmja është sistemi i gjobave që vuri me Edi Ramën, Dorian Duçkën, Agron Nezën dhe ka mundësi dhe skapistë. Ajo është e paimagjinueshme. Ajo tejkalon çdo lloj standardi. Njeriu mund të vendosë t’i shërbejë një vendi tjetër, por njeriu të vijë dhe të vendosë gjoba, të marrë miq të ngushtë të Edi Ramës, t’i çojë në avion dhe t’i gjobisë me 5 milionë euro, bashkë me dëshmitarë të rremë, për të vërtetuar se është komplot puçist nga Presidenti i Republikës ndaj teje apo jo. Apo për të marrë miqtë e tjerë të Edi Ramës, për t’i thënë jep kaq se unë do të heq nga lista. Kjo është më e rënda, por këtë Dumani as nuk mund të imagjinojë, se të hetojë zotëria e tij, duhet të thërrasë Edi Ramën dhe të hetojë jo ç’porosi ke dhënë për Sali Berishën, jo, fare. Por të hetojë se cili është roli yt në sistemin më të paimagjinueshëm që vendosi, sistemin e gjobëvënies ndaj biznesit shqiptar. Mendon se vërtet mund të ketë hetim? Mos e pyet, asnjë hetim nuk do ketë. Është e vërtetë se Gazment Bardhi ka dorëzuar një dosje para dy muajsh, por është e vërtetë se ajo dosje do ketë fatin e të gjitha të tjerave.
Para një ore jam informuar se prej 4 vitesh, Skapi mban turshi dosjen e Teatrit Kombëtar. Prej katër vitesh, prokurori Kondoli mban në sirtar dosjen e minimit të Teatrit Kombëtar. Pse e mban në sirtar? Sepse ajo është bërë me porosi të Edi Ramës nga Erion Veliaj. Dhe se ka një procesverbal nga mbledhja e qeverisë, ka pasur edhe aty ministra që kanë shprehur pakënaqësi të madhe me atë që ndodhi me teatrin dhe Edi Rama është shndërruar në avokatin e Erion Veliajt sepse ishte i kapur nga Fusha. Po të lexoni procesverbalin, gjeni një avokati gjer në neveri njerëzore që i bën Edi Rama. Ndaj dhe Kondili, që ishte më i preferuari i Edi Ramës dhe Pëllumb Gjokës për t’u bërë kryetar i Skapit, nuk guxon të hapë dosjen. Imagjinojeni, që aty ka një vendim të Gjykatës Kushtetuese, por është vendim në letër se qeveria nuk e pyet fare. Mirë është të mos e bëjmë shumë objekt konferencash se nuk ia vlen. Skapi është një armë në duart e diktaturës. Siç ka qenë Sigurimi i Shtetit- i cili ka qenë më numerik- në duart e diktaturës komuniste, Skapi është një armë në duart e diktatorit që ka të gjithë pushtetet bazuar në krimin, drogën dhe vjedhjen e shqiptarëve. Është mburojë për këto akte.
Osman Stafa, News24: Ka një kuriozitet shumë të madh, edhe pas deklaratës së tuaj të ditës së djeshme, se nuk do të ketë formë për të ndërprerë komunikimin tuaj me simpatizantët edhe pas çdo vendimi që mund të marrë gjykata. Si mund të realizohet kjo nëse gjykata vendos për ju, masë sigurie ‘arrest shtëpie’ me mbikëqyrje policore dhe ndërprerje komunikimesh me të tjerët.
Sali Berisha: Ajo kërkesë më ka pëlqyer shumë. Po pse më ka pëlqyer ajo kërkesë? Sepse ajo kërkesë tregon më shumë se çdo gjë tjetër dy gjëra. Së pari, se cili është Edi Rama. Bastard, pasardhës i një xhelati që në pamje ishte intelektual, ishte artist, por që firmoste varjen e poetit vetëm për fjalën e lirë. Për fjalën e lirë se këtë kishte Havzi Nela. Ai përpiqej të inspironte të tjerët me parimet e lirisë. Në këtë aspekt, askush më shumë se unë nuk e ka përdorur këtë akuzë kundër Edi Ramës. Në qoftë se Edi Rama do e kishte denoncuar këtë akt, Sali Berisha kurrë nuk do ia kishte përmendur. Pse? Sepse thellë në bindjen time, ti nuk mund të mbash përgjegjës djalin për të atin dhe është shumë e padrejtë që djali ka të drejtë të jetë ai që do të jetë. Por gjersa ky nuk e ka denoncuar një herë të vetme, përkundrazi edhe më keq tha se është pak e dyshimtë ajo firma, i tregon se ka firma ai i ati i tij xhelat, në pamje të parë burrë i pashëm, elegant dhe i kulturuar, me kulturë terroriste. Ai ka firma në raste të tjera, po këtij i takonte se ky ishte poet, ky mund të thoshte aty që t’i falnim jetën, por nuk e bëri. Disa anëtarë të Presidiumit Popullor nuk kanë firmosur. Dhe Edi Rama para dy vitesh tha se ajo firmë nuk e di nëse është origjinale, pra nuk u distancua. Arsyeja e dytë që mua më ka pëlqyer, se kjo del pak paradoks, se është dëshmi e tmerrit që ka ai nga unë. Kjo më pëlqen, të jem i sinqertë. Unë nuk them se kam pasur qëllim tmerrin, unë kam për qëllim betejën. Kështu që përbën një arritje reale të opozitës shqiptare me këtë akt. Pastaj, se kush janë të drejtat e Sali Berishës dhe çfarë mund të bëjnë xhelatët e këtyre të drejtave, koha do e provojë. Presim… Aq më tepër kur zëdhënësi i tyre bëhet ish-oficeri i policisë sekrete të Enver Hoxhës, i cili jeton në atë kohë, prandaj e mban Rama në kundërshtim me ligjin.
Anisa Kadesha, RTSH: SPAK e ka dërguar në gjykatë kërkesën për mos lejimin e komunikimit tuaj dhe jo kuvendit, ku mori autorizimin. SPAK ja ka kërkuar Gjykatës së Posaçme moslejimin e komunikimit tuaj, dhe jo kuvendit ku mori autorizimin.
Sali Berisha: Kuvendin nuk e kanë për gjë këta. Kuvendi është dëshmia e asaj që Kuvendi është siç ka qenë sigurimi i shtetit. Sigurimi ka qenë mbi të gjitha, mbi kuvendin dhe qeverinë.
Osman Stafa: Lidhur me akuzat që lëshuat ndaj Gjykatës së Lartë, pas vendimit që u publikua, a mos jeni penduar pak për deklaratat që lëshuat ndaj kësaj gjykate, sepse vendimi nuk ka qenë shumë i keq për ju, sipas juristëve.
Sali Berisha: Nuk jam penduar për qëndrimin ndaj Gjykatës së Lartë, sepse ajo gjykatë ka një vendim të saj të vitit 2000 ose 2001, në të cilën ata përjashtojnë në mënyrë kategorike bashkimin e palës së tretë në proces. Është ajo gjykatë që nuk lejon të marrë pjesë në proces ai që nuk ka qenë në proces. Unë nuk e kam lexuar vendimin dhe duhet të rezervohem sepse ndoshta në brendinë e vendimit kjo që them unë, nuk qëndron. Por nga leximi i vendimit mua mu duk se ka legjitimim të palës së tretë. Që në momentin që gjykata pranon të zbatojë jurisprudencën e vet, ajo rrëzonte përfundimisht ankesën e palës së tretë në apel dhe linte në fuqi vendimin e shkallës së parë, regjistrimin në një regjistër sepse nuk ka asnjë proces tjetër. Pra, gjykata nuk e bëri këtë. Nuk mund të pajtohem unë sepse është njëlloj si të pajtohem me Gjykatën Kushtetuese, e cila para një muaji pranon normën kushtetuese që thotë se një e pesta e deputetëve është entitet i pakushtëzuar dhe një muaj më vonë me urdhër politik thotë se është entitet i kushtëzuar. Në të dy rastet është armiqësi absolute ndaj pluralizmit, por rasti i Kushtetutës është armiqësi në doktrinë dhe ata meritojnë çdo lloj përgjigje nga qytetarët sepse këtë nuk mund ta bënin. Firmosën vendosjen e monizmit në Shqipëri.
Enkel Xhangolli, KlanNews: Pas pak SPAK pritet të vendosë për masën e sigurisë. A përfundoi këshillimi me avokatët, a do ta respektoni këtë vendim, nëse vendoset ‘arrest shtëpie’.
Sali Berisha: Tani siç keni konstatuar ju, unë në fushën që është e avoketërve, unë ndjek konsultat me ta. Nuk është momenti të konsultohem paraprakisht. Konsultat vijnë hap pas hapi dhe do të ndjek këshillën e tyre, të cilët kanë treguar gjer tani, përgjegjshmëri të madhe, integritet dhe profesionalizëm të veçantë.
-Në bashkëbisedimin që patët me qytetarët në rrjetet sociale, nëse do të respektoni vendimin e gjykatës për ‘arrest shtëpie’, ju u shprehët se do të ketë një grup që mund të menaxhojë opozitën në terren. A mund të na thoni se kush do të jetë ky grup?
Sali Berisha: Asnjë ndryshim nuk ka dhe nuk do ketë në kuptimin që statuti përcakton strukturat drejtuese. Kryetari është kryetar, Sekretari i Përgjithshëm është Sekretar i Përgjithshëm, nënkryetarët janë nënkryetarë. Ajo që sot kërkohet, dhe që e kërkoj nga çdo mbështetës dhe anëtar i ynë, kërkohet një kthesë e vërtetë. Një kthesë për të vazhduar betejën pa kthim për rivendosjen e pluralizmit. Pluralizmi, sot në thelb nuk ekziston. Në fasadë ekziston. Por pluralizëm në fasadë, përveç Shqipërisë dhe mundet Koresë së Veriut, kanë pasur të gjithë diktaturat komuniste. Për shembull Polonia kishte Partinë Agrare që qeveriste me Partinë e Punës. Pse them fasadë? Në qoftë se ti, forcës politike opozitare, i mohon të drejtat kushtetuese të ushtrimit të sovranitetit të brendshëm të vendit; në qoftë se si, opozitës së vendit i mohon të drejtën për të përcaktuar kryetarin e saj; në qoftë se si opozitës i mohon të drejtën për të paraqitur ligje në parlament, rezoluta; në qoftë se ti opozitës në vend i mohon për të ngritur komisione hetimore; dhe kulmimi i të gjithave, në qoftë se e skualifikon atë në mënyrën më të paimagjinueshme, nga subjekt me të drejtë të pakushtëzuar për t’iu drejtuar Gjykatës Kushtetuese në subjekt me të drejtë kur të dua unë, atëherë nëse ti merr vulën dhe bën pazar me logon e saj, nuk e regjistron në fletën e votimit, nuk regjistron kryetarin e saj por e burgos, e arreston, e lë në arrest shtëpie, atëherë çfarë mbetet këtu nga pluralizmi? As Frrok Çupi nuk mbetet më. Ose mbetet vetëm Frrok Çupi. Dhe Dritan Hila …
Erneta Shevroja, ABCNews: Shpesh keni paralajmëruar për protesta, a planifikoni protestë kombëtare gjatë muajit janar?
Sali Berisha: Protesta do të ketë. Gjithçka varet nga vendimi i qytetarëve shqiptarë për tu përballur me diktaturën e re, narkodiktatorin dhe armët e diktaturës, Skapin dhe armët e tjera të saj. Sepse tani ne jemi në këto kushte. Do të fillojnë në janar dhe nuk do të ndërpriten protestat gjer ditën që do të përmbyset Rama. Tani është kohë beteje. Ka një vullnet të hekur nga demokratët. Do të mobilizohen edhe më shumë dhe zëri ynë kurrë nuk do të mund të shuhet. As pse do Edi Rama dhe asnjë tjetër.
Kristi Kongo, TCH: Një pyetje në lidhje me hapin e fundit që kanë marrë avokatët tuaj duke depozituar në gjykatë një kërkesë për marrjen e provave, si audiot dhe procesverbalet. Ju dje thatë, që arrestimi do të ndodhë dhe po burgoseni në mënyrë të padrejtë. Atëherë pse po kërkoni më shumë kohë, cila është lëvizja e radhës.
Sali Berisha: Absolutisht asnjë kohë nuk po kërkoj, ju garantoj për këtë. Avoketërit në profesionin e tyre nuk i pengoj. Ata janë përgjegjës jo vetëm para meje, por edhe para jush edhe komunitetit të avoketëve dhe juristëve. Ata nuk mund të pranojnë dhe unë nuk mund ti pengoj dhe nuk do ti pengoj, që të kryejnë detyrën e tyre ashtu siç ua kërkon profesioni. Ata nuk kanë asnjë lidhje me Sali Berishën. Ata janë profesionistë. Nëse ata nuk bëjnë këtë kërkesë, kolegu tjetër ju thotë; po ju ku ishit, e dinit se duhej bërë kjo kërkesë apo jo. Unë nuk kam ndërmend të përzihem në profesionin e tyre, nuk bëj avokatin, por politikanin dhe si politikan më keni këtu.
-Shqiptarët janë në pritje se kur do të ndodhë. Ju jeni në konsultim me ta…
Sali Berisha: Unë nuk kam asnjë lloj emocioni siç e shikoni ju. Edhe njëherë, unë ata nuk i pengoj se nuk janë robotë në duart e Sali Berishës. Ata do të ushtrojnë profesionin e tyre sipas kodit profesional dhe aftësive që kanë. Asnjë ndërhyrje nuk ju bëj atyre, në sensin e ndjekjes së procedurave që ata e gjykojnë se në emër të ligjit duhet ti ndjekin. As nuk më kanë pyetur dhe as nuk kërkoj të më pyesin për ato kërkesa sepse nuk janë përgjegjës vetëm para meje, janë përgjegjës para vetes së tyre dhe komunitetit që i përkasin.
-Duke përjashtuar mendimin e avokatëve, ju si politikanë, kur mendoni se do të ndodhë. Keni pritshmëri?
Sali Berisha: Nuk kam impresione dhe nuk më intereson fare. Tani, sot, kur të ndodhë. Avoketërit nuk i pengoj se kanë detyrën e vet.
Ardit Hoxha, EuroNews: Përballë këtij procesi të iniciuar nga SPAK ndaj ju, që ju e cilësoni të pastër politik, strategjia juaj mbrojtëse përveç asaj me avokatët, ka qenë dhe një përgjigje fortë dhe e pastër politike, me deklarata dhe kundër akuza ndaj prokurorëve të SPAK. A është kulmi i strategjisë tuaj. A po kërkon Sali Berisha që të arrestohet që në mediat ndërkombëtare të prodhohet lajmin; lideri i opozitës shqiptare përfundon në burg.
Sali Berisha: Do të doja njerëzisht t’u kërkoja diçka. Nëse ktheheni mbrapa, unë në dy vite kam denoncuar në mënyrën më të fuqishme kriminalizimin e Skapit me elementë kriminalë të lidhur me krimin. Unë do e bëja këtë se nuk ka më të tmerrshme se mitet që ngrihen mbi plehun. Nuk ka asgjë më të tmerrshme për një komb. Dhe kultet dhe mitet janë pushtimi i vërtetë. Ju garantoj, e them dhe e kam thënë, jam njeriu me respektin më të madh dhe më të padiskutueshëm për atë që zbaton ligjin. Por nuk mund të pranoj kurrë që institucioni i akuzës, që siç e tha Edi Rama, paguhet më shumë se presidentët, të mbushet me bashkëpunëtorë krimi. Nuk mund të pranoj kurrë se unë nuk kam sulmuar kurrë pa fakte. Emrin e Sali Berishës si person në hetim, Skapi i partisë e ka regjistruar vetëm me datën 2 tetor. Hetimin për klubin Partizani e kanë pasur si çështje dhe jo me personat, por emri im dhe i Jamarbër Malltezit është regjistruar si person nën hetim vetëm me datën 2 tetor. Sali Berisha ka 2, 3 vjet dhe do të vazhdojë pa lëkundje kundër krimeve që Skapi kryen me hetimin e dosjeve, kundër pranisë së kriminelëve në Skap. Dhe ju them këtu se do ketë protesta të fuqishme. Pse? Absolutisht jo për Sali Berishën, kurrë. Por protesta se ata shkelmojnë në mënyrën më të paimagjinueshme interesat e vendit. Çfarë do të thotë kjo, të zëvendësosh me Taulant Tushën dhe atë Simixhiun, Erion Veliajn dhe Edi Ramën, Engjëll Agaçin dhe Artur Metanin? Kujt ia shet ai këto? Sa paguhen ata për të bërë këtë? Çfarë urdhri zbatojnë? Nuk sulmoj unë një njeri që zbaton ligji, kurrë. Por sulmoj një njeri që shkelmon ligjin, që vret të drejtën në selinë e tij aty dhe bëhet një mercenar politik. Dhe janë me dhjetëra e qindra deklarata të mia para tetorit. Arrestimi i Sali Berishës është tmerri i Edi Ramës dhe porosi e Edi Ramës.
Osman Stafa, News24: Ju prej muajsh po zhvilloni takim me Gazment Bardhin dhe deputetët që përfaqësojnë atë. Në rastin se do të merret masa ‘arrest shtëpie’ kë do të delegoni për të përfaqësuar grupin tuaj në këto mbledhje…
Sali Berisha: Do të delegoj Sali Berishën.
Ju përshëndes.
