Igli Cara

Ka lindur më 16 mars 1969 në qytetin e Durrësit. Ka përfunduar shkollën e mesme “Naim Frashëri” në Durrës dhe më pas ka vijuar studimet e larta në Tiranë, në degën Biokimi, pranë Fakultetit të Shkencave të Natyrës, përgjatë viteve 1987 -1992. Pas përfundimit të ciklit universitar të studimeve, zoti Cara ka punuar për një periudhë të shkurtër kohore si arsimtar. Me ngritjen e strukturës së Policisë Financiare, ju besua detyra e përgjegjësit të grupit, pranë Sektorit të Antikontrabandës për rreth dy vite.

Në periudhën 1994 – 2009 zhvilloi aktivitetin në sektorin privat pranë një Agjencie Doganore. Në të njëjtën kohë u zgjodh Kryetar i Shoqatës së Agjentëve Doganorë, funksion që e ushtroi për disa vite. Në harkun kohor 2005 – 2009 u zgjodh Anëtar i Asamblesë dhe Kryesisë së Dhomës së Tregtisë dhe Industrisë Durrës.

Në vitin 2007 u zgjodh anëtar i Këshillit Bashkiak Durrës nga lista e Partisë Demokratike, njëherësh edhe Kryetar i Komisionit të Strehimit. Këto funksione i ushtroi deri në vitin 2009, kur u zgjodh Kryetar i Degës së Partisë Demokratike të Durrësit. Në Qershor 2009 zgjidhet Deputet në Kuvendin e Shqipërisë dhe Sekretar i Komisionit të Ekonomisë dhe Financave. Rizgjidhet deputet gjatë periudhës 2013 – 2017, duke mbajtur pozicionin e anëtarit të Komisionit të Ekonomisë dhe Financave. Pas kësaj periudhe u rikthye në sektorin privat, duke qenë sërish aktiv në jetën politike, si Anëtar i Këshillit Kombëtar të Partisë Demokratike.

Në vitin 2021 ishte pjesë e listës së deputetëve të Partisë Demokratike për Qarkun e Durrësit. Në vitin 2022 u rizgjodh në detyrën e Kryetarit të Partisë Demokratike, Dega Durrës. Në Dhjetor të po këtij viti dha dorëheqjen, pasi u përzgjodh kandidat për Kryetar i Bashkisë të Durrësit.

Lidhja e tij me Partinë Demokratike daton që prej krijimit të saj. Në vitet ’90 ju bashkua Lëvizjes Studentore, që u përshkallëzua me Grevën e Urisë së studentëve të Universitetit të Tiranës, ku mori pjesë edhe zoti Cara. Gjatë gjithë aktivitetit të tij profesional dhe politik ka treguar një shkallë të lartë integriteti dhe përkushtimi në të gjithë funksionet që ka ushtruar.

Igli Cara është i martuar, ka dy fëmijë dhe jetën e tij e ka lidhur ngushtë me Durrësin, qytetin e tij të lindjes.