Belind Këlliçi

Mësimet e para i mori në shkollën Pjetër Budi dhe më pas ndoqi shkollën e mesme “Harry Fultz” ku u zgjodh president i Qeverisë Studentore në vitin shkollor 2004-2005. Është marrë me sportin e tenisit që në moshën 6 vjeçare duke përfaqësuar Shqipërinë në shumë turne ndërkombëtare, dhe fiton titullin kampion kombëtar për të rinjtë në vitin 2004.

Falë arritjeve në sport dhe rezultateve të shkëlqyera gjatë katër viteve në shkollë të mesme fiton bursë të plotë për të studiuar Menaxhim në Coppin State University në SHBA. Pasi përfundoi universitetin si studenti më i mirë i brezit, Belindi vendosi të kthehej në Shqipëri, jo vetëm për t’u kujdesur për prindërit, por edhe për të ndjekur vokacionin për angazhim politik.

Karrierën e nisi në 2009 nga baza, si anëtar i thjeshtë Forumit të Rinisë së Partisë Demokratike dhe i ngjiti shkallët një e nga një si anëtar i Kryesisë së degës 10, anëtar i Këshillit Kombëtar, dhe anëtar i Kryesisë së partisë. Në 2015 fitoi garën për t’u zgjedhur kryetar i FRPD, ndërsa në 2021 u zgjodh si deputeti i tretë më i votuar nga radhët e opozitës. Në dhjetor 2022 konkurroi dhe fitoi në primaret për bashkinë e Tiranës dhe është sot kandidati i koalicionit opozitar Bashkë Fitojmë.