Departamenti i Shëndetësisë së PD, prezanton platformën me profesionistët e fushës në qytetin e Durrësit
Dhjetëra mjekë e specialistë të fushës në Durrës, diskutuan me Departamentin e Shëndetësisë së Partisë Demokratike mbi problematikat, shqetësimet dhe zgjidhjet për ti ardhur në ndihmë qytetarit dhe pacientit.
Departamenti i Shëndetësisë prezantoi dhe platformën e PD në këtë sektor, ku u theksua vënia në qendër të sistemit shëndetësor të pacientit, parim që do të jetë motori lëvizës i reformës në shëndetësi. Pacienti do të zgjedhë lirshëm mjekun apo institucionin që do të marrë shërbimin, dhe shpenzimet do të jene të rimbursuara nga sigurimet shëndetësore.
Në takim morën pjesë dhe drejtues të PD, si z. Osman Stafa, Tritan Shehu, Drejtues i Departamentit te Shëndetësisë, dhe anëtarë të tjerë të Departamentit të Shëndetësisë, si dhe mjekë, stomatologë dhe farmacistë të zonës së Durrësit.
Nga diskutimet u theksua se nuk mund të ketë reformë në shëndetësi dhe sukses të saj pa përfshirjen në proces të profesionisteve. Objektivi i reformës do të jetë rikthimi i dinjitetit të mjekëve, si nga ana profesionale, statusit shoqëror dhe shpërblimit dinjitoz.
Nga ana tjetër, pjesëmarrësit përmendën situatën e vështirë ku gjendet shërbimi shëndetësor në Durrës gjatë 2-3 viteve te fundit, ku vërehen disa problematika: e gjithë zona e Durrësit ka vetëm një pike urgjence në spital, ndërkohe që duhet të hapen disa pika urgjence me qëllim ofrimin e shërbimit sa me afër pacientit dhe shfryrjen e ngarkesës së spitalit. Gjithashtu, u theksua mungesa e barnave në spitale dhe qendrat shëndetësore, që e bën të pamundur ofrimin cilësor të kujdesit shëndetësor. Ne qendrat shëndetësore është shkurtuar buxheti, duke çuar në mungesë të barnave të urgjencës.
Njoftim për media e Partisë Demokratike, 10 mars 2016
