Kandidati Gjergj Mero tha se Bashkia e re e Korçës do të rregullojë rrugët dhe do të përfundojë ato që kanë nisur në fshatrat turistike të Korçës,  si Voskopoja, Dardha  dhe Vithkuqi.

Në një takim me biznesin e vogël e të mesëm,  kandidati Mero tha se, infrastruktura e destinacioneve turistike të Korçës është në gjendje të mjeruar dhe se bashkia i ka lënë në haresë.

Veçanërisht kandidati Mero vuri në dukje aksin problematik të Vithkuqit, i cili pengon vajtjen e pushuesve në këtë zonë me vlera të mëdha kuruese.

Gjatë shtjellimit të prioriteteve të programit për turizmin në Korçë, kandidati Mero tha se do të zbatohen projekte për zhvillimin e bujtinave në fshatrat e Dardhës, Voskopojës dhe Vithkuqit,  si dhe do të hapen shtëpitë muze të traditës dhe punimeve artizanale.

Sipas kandidatit Mero programi për bashkinë e re parashikon një numër të konsiderueshëm punësimesh në ridimensionimin e turizmit malor dhe hartës se re turistike.

Punimet artizanale dhe kulinaria do të jenë burimet ku Bashkia e re do të përqëndrojë projektet për zhvilllimin e fshatrave turistikë të Korçës.

Kandidati Mero tha se do të punohet fort edhe me organizatat ndërkombëtare për vënien në eficencë  të pistave të skisë në Dardhë.


Njoftim për shtyp i Partisë Demokratike, 18 Qershor 2015