Kryetari i PD, Lulzim Basha merr pjesë në Kuvendin Zgjedhor të degës së Krujës
Kryetari i Partisë Demokratike Lulzim Basha mori pjesë në Kuvendin Zgjedhor të demokratëve në Krujë. Zoti Basha u ndal gjatë fjalës së tij mbi situatën e rëndë ekonomike dhe sociale që po kalon vendi nën qeverisjen e “rilindjes”. Sipas kreut të PD, sot shqiptarët po e ndjejnë kudo në tavolinat dhe xhepat e tyre mjerimin, taksat po rriten dhe shtohen përditë, papunësi ka arritur majat. Përballë kësaj situate, zoti Basha, ka kërkuar nga drejtuesit e rinjt të PD-së të hartojnë platformat e zhvillimit për zonat e tyre për t’i bashkur më pas në platformën e qeverisjes së vendit.
“Asgjë të re nuk kanë sjellë. Përkeqësim në çdo fushë duke nisur me ekonominë. Taksë pas takse ia morën shpirtin biznesit, ia morën shpirtin konsumatorit. Kredia në nivelet më të ulëta, vendet e punës po treten si bora në diell. Siguria në parametrat e vet më të këqinj. Ne jemi këtu për t’ju dhënë shqiptarëve një platformë zhvillimi. Një alternativë të vërtetë dhe jo rrenë për të krijuar mundësi për punësim për prodhim, për mirëqënie, për siguri, për një të ardhme të sigurtë dhe për një ekonomi të fortë. Ky vizion është dhe detyra e tretë e rëndësishme e këtij kuvendi dhe drejtuesve që do të dalin prej tij”, tha Basha.
Kryetari i PD-së i konsideroi zgjedhjet në parti si shumë të rëndësishme për ringritjen, hapjen dhe bashkimin e saj. Zoti Basha theksoi se duke venë votën e lirë në themel të organizimit dhe sistemit të karrierës në parti i është deleguar çdo anëtari përgjegjësia dhe e drejta të zgjedhë ata që do ta çojnë Partinë Demokratike drejt fitores.